1 Reve Zofa vuma va Na'ama usu u damma,

2 <<Amayun, majiyan ma̱ va̱

ma zuwa mu ta̱ n usu wu,

adama a na okolo a̱ va̱ o von shi.

3 Mu uwwa ta̱ idanshi ya̱ wu

yu ulambu wu ugbozu,

agba n ta̱ usu wu

o una̱ wu urevu u va̱.

4 Vu gura reve

na̱ a̱ yi n da ɗe nu ufaru,

a mantsa ma na a zuwai

vaɗilima̱ a̱tsuma̱ o uvaɗi,

5 na babu vuma vi iwuya nna

jimai ɗe na̱ ma̱za̱nga̱.

6 Ko na̱ tsugbain tsa̱ yi tsa rawa ta̱ zuva,

waru aaci a̱ yi a̱ ji'wa̱n eleshe,

7 u ta̱ puwa̱n suru suru cine

vu revei a̱ya̱n a̱ yi.

Aza a na e ene niyi ɗe nu ufaru

a ta damma, <Te ɗa u tyoyi?>

8 U ta̱ puwa̱a̱n tsa alavu,

a̱a̱ tsura̱ yi shi.

U ta̱ puwa̱a̱n tsa alavu alavu

a na a yuwain na ayin.

9 Esu a na a̱ shi ene niyi,

a buwa a̱ da̱shi ene yi shi,

uba̱ta̱ u na u shi yuwain wuma wa̱ yi fo,

a buwa a̱ da̱shi ene yi shi.

10 Ko shi a 'yuwan a ciga muwun ma̱ yi

n zami ikambishi diga

uba̱ta̱ wa̱ a̱za̱ o ulambu.

Waru na̱ shi a 'yuwan a ciga

ekere a̱ yi a̱ ka̱mbuwa̱

utsuru u na u shi u usai.

11 Ko na wo o'woi etele a̱ yi

a̱ ta̱ tapu nu ucira,

na̱ ne suru, a̱yi nu ucira wa̱ yi

u to o'wo ma̱buta̱.

12 <<Ko na iwuya i ri peme

o una̱ wu za vi iwuya,

u tsu soko yi ta̱ za̱la̱ ve elentsu a̱ yi.

13 Za vi iwuya tsu lyawa

iwuya yi kasa na̱ yi shi,

o una̱ wa̱ yi u ɗa u tsu guza̱i,

hali u tara mantsa lon.

14 Na̱ ne suru ilyalya ya̱ yi

i ta vadala a̱ a̱a̱tsuma̱ a̱ yi,

u to o'wo tso tsukono

tso yo a̱tsuma̱ a̱ yi.

15 Utsuru u na vuma wuya soɗu yi,

u tsu shaamai ta̱,

A̱sula̱ a ɗa a tsu zuwai

u shaamai diga a̱a̱tsuma̱ a̱ yi.

16 Ili i na za vi iwuya soɗuyi,

u ta̱ tsa̱ tsukono,

u tsu unai ta̱

tsu uka̱ɗu wu yo u tsukono.

17 Za vi iwuya a̱ da̱shi uwwa uyo

wi ili yu uvaɗi u nda shi.

Wuma u ta̱ tapu ni ili i isa'ani ya̱ a̱bunda̱

i na i ri tso ɗolu na ri tsa maani ni ishiki.

18 U ta̱ ka̱mbuwa̱ ili i na u

yuwain melen me izami,

waa gura lyuwa le shi.

Waa uwwa uyo'o wi ili i na ya uwusa yi

a̱tsuma̱ a atsulu na awina shi.

19 Adama a na u ɓongi ta̱

za vu ulambu,

a̱vu u usa u'wa u na

u suwai shi.

20 <<Na amayun a̱a̱tsuma̱ a̱ yi

a̱a̱ tsu cuwa̱n shi,

utsa̱n wa̱ yi u ta̱wa̱a̱ yi

na̱ nden ma asuvu shi.

21 Babu ili i na i la'ai diga utsa̱n wa̱ yi,

wuma wa̱ yi wa asuvu nden waa jima shi.

22 A̱tsuma̱ a̱ a̱bunda̱ o utsuru wa̱ yi,

u ta̱ da̱na̱ na̱ a̱tsumola̱ngu,

a̱tsuma̱lima̱ icu'un icu'un

yu ucira i ta cina yi.

23 Lyawa a̱tsuma̱lima̱ o ndolo

o shiton a̱a̱tsuma̱ a̱ yi,

lyawa A̱sula̱ oco upan wa̱ yi

wu usuɗu aaci a̱ yi,

waru upan wa̱ A̱sula̱

wo o'wo ilyalya ya̱ yi.

24 Ko na̱ shi u la'a e ekere a matsun me pe'eni,

liya vu rumushili na a̱ tewiyin

u ta̱ ba̱ma̱ a̱tsuma̱ a̱ yi.

25 U to foɗo liya'a diga lipu va̱ yi,

combo vu liya'a u ta̱ uta̱ na assuvu a̱ yi,

wovon wu ukwa̱ u ta̱ reme yi.

26 Irumbu pici i ta̱ lo a pura

u soɗu izuwa ya̱ yi,

akina a na a zuwai shi

a ta lyuwa yi,

reve u lyuwa ili i na i buwai

a̱tsuma̱ o u'wa wa̱ yi.

27 Zuva ta̱ pa̱lu'wa̱ iwuya ya̱ yi,

waru iɗa i ta̱ 'yon nla̱ngi na̱ a̱yi.

28 Mini ma̱ a̱bunda̱ ma̱ ta̱ pura̱ u'wa wa̱ yi,

u ta̱ puwa̱a̱n o urana wu upan wa̱ A̱sula̱.

29 A̱yi nda a̱ yi ɗa akunda a na

za vi iwuya a̱ tsura̱

diga uba̱ta̱ wa̱ A̱sula̱,

a̱yi ɗa agadu e ili i na

A̱sula̱ o foɓoo niyi.>>