1 <<Gogo, a̱vu Ayuba,

vu yuwan ɗewu ve ene,

ko nanza ta̱ usu wu!

Malingata ma̱ A̱sula̱ mo ro ma̱ tu lo

na vaa vadala a̱ tyo ya̱'a̱ yi?

2 Amayun, upan u tsu

una ta̱ za tsulo,

waru tsushu'un tsa tsu

una ta̱ za vu ulambu u majiyan.

3 Me ene ta̱ ulo a̱ nden n lafiya,

amma babu usa̱n

reve n yuwaan u'wa wa̱ yi una̱.

4 Muwun ma̱ yi ma̱a̱ tsura̱

nden n lafiya shi,

a̱a̱ tsura̱ uge'etosu wa amayun shi,

waru a̱a̱ tsura̱ za na a wawa le shi.

5 Aza ambulu o to koto

itana yu uɗuma̱ wu ulo,

hali fo ni ishina i na

i pusa̱i a̱tsuma̱ awanda,

aza a na a̱ ri na akuli

a ta yuwan tsushu'un

nu utsuru wa̱ yi.

6 Iwuya i tsu uta̱

diga a̱tsuma̱ e iɗa shi,

ne ɗa fo a̱tsuma̱lima̱

a̱ tsu uta̱ diga e iɗa shi.

7 Ee, a̱tsuma̱lima̱ a̱ tsu uta̱ ta̱

diga uba̱ta̱ wu vaɗilima̱,

ununa elentsu a akina

a̱ tsu 'yon zuva.

8 <<Amma na̱ shi adamma

a̱mu ɗa a̱vu Ayuba,

n shi ta a vadala uba̱ta̱ wa̱ A̱sula̱.

Reve n 'ya̱wa̱ na̱ mesun ma̱ va̱

uba̱ta̱ wa̱ yi.

9 Tsaa gura reve a̱ba̱jini a̱ba̱jini

e ili i na waa yuwusan shi,

waru linga vaa asalama a̱ yi,

a̱ ri n kece shi.

10 U tsu lyungu ta̱ ni iro'i diga zuva,

reve u ta̱na̱to a̱ɗuma̱.

11 A̱sulazuva a ɗa a̱ tsu 'ya̱sa̱n

aza a na a̱ ka̱ɗa̱toi aciyele,

waru u tsu ca ta̱ aza a na

a̱ ri na̱ a̱tsumola̱ngu ulyuwu wa aci.

12 U tsu ja̱mba̱ra̱ ta̱

ifoɓi ya̱ a̱za̱ o ugbozu,

hali na ekere e le a̱ kuɗa̱

a̱ tsura̱ ulyuwu wa aci.

13 U tsu reme ta̱ a̱za̱ o ugbozu

a̱tsuma̱ o ugbozu u le,

waru u tsu zuwa ta̱

ifoɓi i le i kuɗa̱ toni una̱.

14 A tsu ga'an ta̱

ni irumbu nu urana,

nu urana aci a̱ tsu da̱na̱ ta̱

e ipapuru she damma ayin a ɗa.

15 Amma A̱sula̱ a tsu wawa ta̱

a̱za̱ o ulambu diga o ukwisa̱,

waru u tsu wawa le ta̱

e ekere a̱za̱ o ucira.

16 Adama a̱za̱ o ulambu a̱ da̱na̱

nu uzuwu wo okolo,

waru a̱za̱ o ulambu wa amayun

a̱ ɓa̱ru na̱ le.

17 <<Za va aba'un ɗa

za na A̱sula̱ a ɓarai,

adama o ndolo she vu 'yuwan tsuɓari

tso Mogono me Ili Suru wan.

18 Adama a na u tsa amaton ta̱ vuma,

reve waru u co'wo yi,

u tsu ta̱wa̱a̱ ta̱ na̱ wuntsu,

waru ekere a̱ yi a ɗa a̱ tsu inato wuntsu'u.

19 U ta wawa wu toto uta̱li

diga a̱tsuma̱lima̱,

u ta putsaa iwuya i ju'wa̱n wu,

hali toto ucindere.

20 A mantsa ma ambulu

u ta wawa wu diga o ukwa̱,

waru u ta wawa wu uba̱ta̱ o uvon

diga o una̱ u matsun me pe'eni.

21 A̱sula̱ a ta wawa wu diga

e ekere a̱za̱ epen,

agba va uwwa wovon

wu ukototosu u na u ri lo a̱ ta̱wa̱ shi.

22 Vu to zo'oso ambulu nu ukototosu,

waru va uwwa wovon

wi inama yu una ivama shi.

23 Atali atsusa aa putsaa wu

a yuwan iluma shi,

waru inama yu una ivama

ya̱a̱ riya̱a̱ wu babu ufaru shi.

24 Vu ta̱ da̱nu gbaga

a̱tsuma̱ oogodo a̱ wu,

mantsa ma na vu kecei

iliyamunga ya̱ wu,

ko za ta̱ a̱a̱ puwa̱a̱n shi.

25 Vu ta̱ reve a na limatan va̱ wu

yuwain a̱bunda̱ lon,

muwun n tsukaya ma̱ wu

n ta yuwan a̱bunda̱

tsa anlya o urewesu wu uvaɗi.

26 Vu ta̱ kuwa̱ a mantsa

ma na vu kutsai lon

a̱ tyowetyo wu aason,

cine a̱ tsu nla̱ akatalu e ishina

a mantsa mo ugasa.

27 Tsu petelyuwe ta̱ ili i nda,

waru amayun a ɗa.

She vu uwwa adanshi a̱ va̱

vu yuwan ulinga na̱ a̱ yi.>>