1 Reve Elifa vuma va̱ Teman usu u damma,

2 <<Ayuba wuntsaa za vu ugbozu usu

na adanshi a vanvama shi,

ko u da̱na̱ za ve epen shi.

3 Ko u yuwan adanshi e pere,

ko idanshi i na i ri babu ulobonu shi.

4 Amma a̱vu ɗa a nda

vu ri o wovon wa̱ A̱sula̱ shi,

waru vu ta putsusaa

a yuwan avasa a̱ tyo uba̱ta̱ wa̱ yi.

5 Adama a na unusu wa̱ wu u ɗa

wo rocosu una̱ wa̱ wu adanshi,

agba a̱yi ɗa nda vu ɗangulai

adanshi a̱ a̱za̱ o ugbozu.

6 Una̱ wa̱ wu u ɗa u polo nuwu,

a̱mu ɗa shi,

elentsu a̱ wu a ɗa

a yuwusan adanshi a aci a̱ wu.

7 <<A̱vu ɗa vuma vu ufaru na a matsain?

Ko a matsan wu ta̱ kafu a yuwan agaɗi?

8 Vu uwwa ta̱ ɗe aɗa

e ifoɓi i na A̱sula̱ a yuwain?

Ko vu te e inda ngashi

a̱vu ɗa za vu ugbozu goon?

9 Nye ɗa vu revei za na a̱tsu tsu revei shi?

Nye vu revei a na u ri upa̱lu'u ya̱'a̱ tsu shi?

10 Tsu ta̱ na aza a na aaci e le a yuwain

ɗe yono oɓolo na̱ a̱tsu,

na̱ mbara nna n la'ai

abara a̱ wu ukutsu.

11 Ucasu wa adanshi a̱ A̱sula̱

a̱ ka̱la̱ma̱ wu ta̱?

Ko adanshi a̱yi a na a

dammai ben u ka̱la̱ma̱ wu ta̱?

12 Nye i zuwai vu lyawai okolo a̱ wu,

a la'ai ucira u majiyan ma̱ wu?

Nye i zuwai vu lukuta̱i

urewesu wa̱ wu tsunda?

13 A̱yi ɗa i zuwai ruhu va̱ wu

'ya̱sa̱yin a̱ A̱sula̱ a aci,

hali vu lyawa cu'un va adanshi o ndolo

a̱ ka̱ra̱ o utusa̱ o una̱ wa̱ wu!

14 Vaɗilima̱ ne ɗa a̱ tsura̱

hali u da̱na̱ babu unusu?

Ko za na ka matsain

na̱ a̱ da̱na̱ za va̱ a̱ɓula̱?

15 Nye i zuwai A̱sula̱ a yuwain

atsupu a aci a nlingata ma̱ yi

ni ili i ro shi,

ko zuva va zuva fo,

a̱ ri cece o urewesu wa̱ yi shi.

16 Hali nye ɗa vaɗilima̱,

ili i na i ri ili yi idaba na la̱nga̱i,

za na o soɗusu iwuya cine vu revei mini!>>

17 <<Ayuba, vu polo atsuvu,

apa ili i na n revei.

18 Ili i na a̱za̱ o ugbozu a dammai,

ili i na o ritoyi diga uba̱ta̱ wu nkaya nle,

waru o soko mu ili shi.

19 Ele ɗa goon a ca yi iɗa'a,

babu mocin na gandaru nle.

20 <<Za vi iwuya tsu sowo ta̱ a̱tsuma̱lima̱

a rana wuma va̱ yi suru,

a'wan a na a zuwayi za na

tse ene iliyali shi suru,

a̱tsuma̱lima̱ a ɗa.

21 Mesun ma̱ ɗyo vi ili i wovon

i shiton ta̱ atsuvu a̱yi,

wovon wu za vu ukototosu ta̱ riya̱ yi nu uta̱

a̱tsuma̱ a rana vu nden ma alafiya a̱yi.

22 U ri nu ucawu wo okolo a na

wa la'a diga e irumbu shi,

waru a̱ ta̱ o una yi na̱ matsun me pe'eni.

23 U tsu da̱na̱ ta̱ e igaru

wo o'wo tsi ilyaya ya asala

waru u reve ta̱ a na urana

wa̱ a̱tsumola̱ngu u ta̱ zuzu na̱ yi.

24 A̱tsuma̱lima̱ na atakaci

o shiton yi ta̱ na̱ wovon,

a lyuwa ta̱ aci a̱yi,

tso mogono ma na ma̱ ri ufoɓu

e ekere aza a na a cigai na̱ riya̱yi nu uvon,

25 adama a na u sapiya ta̱ A̱sula̱ aakatsu

a yuwusan tsurala na̱ yi,

a yuwusan uvaɗu a̱yi u yuwaan ta̱

Mogono me Ili Suru ulamu.

26 Vuma ndolo za va aciyogbamu ɗa,

za vu u 'ya̱susa̱n wa aci.

27 U tara ta̱ itana yu uvon ya̱ yi

tsa za vu uvon u zarana,

adama u yuwan uvon na̱ A̱sula̱.

28 U ta̱ da̱nu e ilyuci i gbain i na yo o'woi okongo,

a̱tsuma̱ a 'wa na za ri pe na̱ nden shi,

'wa na ri a zama oco.

29 Wa̱a̱ da̱na̱ nu utsuru shi,

agba utsuru wa̱ yi wa jima shi,

waru ili yu ukere wa̱ yi

wa̱a̱ tsura̱ ulyuwu we elime

a̱tsuma̱ o uvaɗi shi.

30 Waa la'a diga e irumbu shi,

u ta̱ da̱na̱ tsa ɗanga na akina

a̱ kula̱toi eten a̱ yi,

waru wivuwun wa̱ A̱sula̱

o to kototo yi.

31 She u luluma̱ aciya̱yi wan,

na wa zuwa ucira adama e ili ya̱ pere,

adama a na icigi yi ili ya̱ pere

i ɗa yaa lyuwa yi.

32 U ta̱ 'yewe kafu mantsa ma̱ yi,

tsa̱ eten a na koto ritoyi

u topo a̱vu'un shi.

33 U to o'wo tsa ataci a̱ ina̱bi

na za̱ka̱tsa̱i muwun nna

koto n rawai uta'an shi,

tsa̱ yipa̱lu yu uɗanga

u zetun u na o ocoi.

34 Iɓolo ya aza a na a̱ ri a

uwwusa wovon wa̱ A̱sula̱ shi

o to o'wo idari.

Akina a̱ ta̱ kula̱to 'wa va aza a na

a cigai utowusu wu una̱.

35 A̱ ta̱ utanuwu na̱ a̱tsuma̱lima̱,

a matsan iwuya,

mantsa suru a̱a̱tsuma̱ e le

a ta matsusan e epen.>>