1 Reve Ayuba usu u damma,

2 <<Mawasan mo ro mo lo shi,

a̱ɗu ɗa ama'a!

Nni i kuwa̱,

ugbozu u kuwa̱ ta̱ oɓolo na̱ ɗu!

3 Amma a̱mu fo n ta̱ nu urevu,

a̱ɗu ɗa goon shi,

me ene cine i la'a numu shi.

Za ne ɗa kuɗa̱i e reve

ili i na i dammai?

4 Mo o'wo ta̱ ili yi izo'oshi

e ekere a̱ n'utsa̱ n va̱.

A̱mu na n tsu yuwan avasa uba̱ta̱ wa̱ A̱sula̱,

reve u usu mu,

a̱mu na n ri vuma va̱ a̱ɓula̱,

za babu unusu,

a̱mu ɗa mo o'woi ili yi izo'oshi.

5 Aza a na a uwwusa uyo'o a tsu

yuwan ta̱ izo'oshi yu ulamu,

e ekere aza a na a̱ ri a̱tsuma̱lima̱,

ne e ekere aza a na a̱ ri zuzu na̱ ma̱ riya̱a̱.

6 Evu a̱ ta̱ a̱ nden ma alafiya,

uba̱ta̱ wu upa'atan u le,

aza a na a zuwusa A̱sula̱ upan

a̱ ta̱ a̱ nden ma alafiya,

ko na wo o'woi ma̱sula̱ ma̱ le

a̱yi ɗa ucira u le.

7 <<Amma ve ece inama yu una,

o to rito wu,

nnunu ma zuva fo o to rito wu.

8 Ko vu yuwan adanshi nu uvaɗi,

u ta̱ rito wu,

mugula m mala fo n ta cuɗuwa wu.

9 A̱tsuma̱ e ili ya nda suru,

zane ɗa kuɗa̱i e reve,

a na ukere wa̱ A̱sulazuva

a ɗa a yuwan nle shi?

10 Wuma wi ili suru u ta̱ o ukere wa̱ yi,

o ukere wa̱ yi u ɗa wivuwun

wu vaɗilima̱ suru u ri.

11 Ununa elentsu a̱ tsu peɗe ilyalya,

ne ɗa fo utsuvu u tsu petelyuwe

adanshi a na wa uwwusa.

12 Uba̱ta̱ wu mbara u ɗa

a̱ tsu tsura̱ ugbozu shi?

A rana wuma wa̱ a̱bunda̱ a ɗa

a̱ tsura̱ urevu shi?

13 <<Uba̱ta̱ wa̱ A̱sula̱ a ɗa

ugbozu nu ucira u ri,

uba̱ta̱ wa̱ yi u ɗa

a̱sa̱la̱ nu urevu u ri.

14 Agba a̱yi ɗa nda ili i na wu ɓosoi biti,

babu za na a gura suwisai,

agba nu u katsu vuma

babu za na a gura katsu'wai.

15 Agba a̱yi ɗa nda nu u 'yuwan o ro'o,

uba̱ta̱ u tsu u'yewu ta̱,

nu u ka̱mbuwa̱ mini ma̱ a̱bunda̱,

mini'i u tsu lungusa̱ ta̱ uba̱ta̱.

16 Uba̱ta̱ wa̱ yi u ɗa goon

ugbozu nu ulyuwu wa aci u ri,

na̱ a̱za̱ a̱ wulumu na aza a na a̱ luluma̱i,

suru nle a̱ ta̱ za̱la̱ va̱ yi.

17 U tsu lyungusa̱ ta̱ majiyan

mo ozo o ucasu wa̱ a̱sa̱la̱,

reve u ka̱mba̱to

a̱za̱ o uge'etosu o o'wo olo.

18 U tsu foɗo ta̱ ngono

a̱tugu a tsugbain,

reve wu nla̱a̱ le akashi amuna.

19 U tsu ka̱ɗa̱to ta̱ nan ganu,

oɓolo na aza a tsugbain.

20 U tsu ɓa̱ru ta̱ na̱ va aza a na

a gurai ucasu wa adanshi,

waru u tsu tawa ta̱ urevu wu mbara.

21 U tsu ca ta̱ aza a tsugbain wono,

reve u putsaa a̱za̱ o tsugono nu ucira.

22 U tsu pa̱lu'wa̱ ta̱

ili i na irumbu i soko yi,

waru u ta̱wa̱a̱ ni irumbu i pici

ya̱ a̱ru'un uba̱ta̱ e ekan.

23 U tsu 'ya̱sa̱n ta̱ nɗa a yuwan ucira,

reve waru u kototo le,

u tsu zuwa ta̱ nɗa m bala lon,

reve waru u bete'we le.

24 U tsu lungusa̱ ta̱ majiyan

ma azagbain o uvaɗi,

reve u zuwa le

igaru iwau a̱tsumona

uba̱ta̱ u na babu ure.

25 A̱ da̱na̱ e ipapuru a̱tsuma̱ e irumbu

uba̱ta̱ u na babu ekan,

reve u zuwa le a̱ da̱na̱ o utakalyuwusa

va damma aza a na a̱ ri usowu.>>