1 Reve Elifa vuma va Teman usu u damma,

2 <<Ayuba, vu ta yuwan upan

nna̱ n yuwan adanshi ɗa?

Maa gura yuwan ankuri

n rungwa̱ kpen shi.

3 A̱yi ɗa nda ɗe nu ufaru

vu rito ta̱ ama na̱ a̱bunda̱,

waru vu ca ta̱ aza a na a̱ ri

nu ucira shi adanshi.

4 Adanshi a̱ wu a kamba ta̱

aza a na a̱ shi a̱ riya̱i,

waru vu ca ta̱ aza a na

obolu e le a̱ shi a̱ kuwa̱i ucira.

5 To, agba a̱yi ɗa nda mantsa

ma̱ a̱tsuma̱lima̱ ma̱ a̱ wu ma̱ ta̱wa̱i,

a̱vu vu kuɗa̱ a kaɓa asuvu,

na̱ a̱tsuma̱lima̱ a na a cina nuwu,

reve vu dada'wan shi.

6 Ashe wovon wa̱ A̱sula̱ a na vu ri na̱ yi

a̱yi ɗa ucira wa̱ wu shi?

Waru wuma u babu unusu wa̱ wu

a̱yi ɗa ucawu wo okolo a̱ wu shi?

7 <<Gogo she vu yuwan majiyan.

Vuma va̱ a̱ɓula̱ o ro a̱ tu lo na o kototoi?

Ko uba̱ta̱ u ro u tu lo na

o kototoi za va amayun okolo?

8 A̱ wenu u va̱, aza a na

a lumai uɗuma̱,

reve a̱ cu'wa̱n iwuya,

na amayun, ele ɗa a gasa iwuya.

9 A̱sula̱ o tsu kototo le ta̱

na̱ wivuwun wa̱ yi,

nna̱ u yuwan upan

u tsu kototo le ta̱ suru suru.

10 A̱za̱ e iwuya a̱ tsu

gugwa̱ ta̱ tsi ikamu,

amma A̱sula̱ a tsu zuwa le ta̱ o voton,

reve wu kuɗa anga le.

11 Tsi ikamu i na i ri ni ili

i na o una a tama shi,

ne ɗa maa zuwa le a̱ kuwa̱,

reve muwun nle m bete'we suru.

12 <<Urana u ro,

adanshi a̱a̱ ta̱wa̱ mu ta̱ usokowu,

agba nu usa̱n u ɗa

n gura uwwa niyi.

13 U ta̱ tsa alavu o wovon a na

a putsaa numu a uwwa

uyo'o wu nlavu n va̱.

14 Reve wovon u reme mu

na̱ meje'en ma̱ lipu,

hali u zuwa etele a̱ lipu va̱

a̱ ka̱ra̱ e meje'en.

15 Upepu u ro u ka̱ra̱la̱i ta̱

o urewesu u va̱,

a̱vu eleme a̱ lipu a̱ va̱

a̱ za̱ka̱ruwa̱.

16 Me ene ta̱ ili i ro ndeɗe mishin,

reve n vara esu a̱ va̱,

agba n gura reve ko nye ɗa shi,

a̱mu pe a̱tsuma̱ a majiyan ma nda,

reve mu uwwa uɗyo a dansa,

17 <Vaɗilima̱ ta gura da̱na̱

na̱ a̱ɓula̱ a̱ ma̱ka̱ka̱n ma̱ A̱sula̱?

Waru za ro ta̱ lo na ri na akiza

a̱ ma̱ka̱ka̱n ma za na yuwan niyi?>

18 A̱sula̱ o tsu soɗuwoo agbashi

a zuva a̱ yi ma̱tsa̱n shi,

waru u tsu tsura̱ ta̱

nlingata ma̱ yi nu unusu.

19 Cine tsa ɗa waa yuwan u soɗuwoo

aza a na a yuwain na̱ ma̱buta̱ ma̱tsa̱n?

ili i na i ri ma̱buta̱,

na aa gura minjira tsa aran.

20 U ta gura o'wo vuma

da̱na̱ wuma nu usana

amma babu urevu

reve u kuwa̱ acina ulivu.

21 Ili i na u ri na̱ yi suru

a tara le ta̱

na̱ ne suru u kuwa̱ ta̱

a̱tsuma̱ o ulambu wu ugbozu. >>