1 Reve Ayuba usu u damma,

2 <<Mu uwwa ta̱ ɗe cu'un

vi ili i nda na̱ a̱bunda̱,

cu'un vu ucasu wa adanshi a̱ ɗu suru

a̱ a̱tsuma̱lima̱ a ɗa!

3 Idanshi i vanvama i ɗu

i ri n koto shi?

Nye i ɓa̱la̱ nuwu na vaa

yuwusan adanshi tsunda?

4 Na̱ shi a damma a̱ɗu a̱mu ɗa,

n shi ta̱ fo a yuwan adanshi tsa̱ ɗu,

n shi ta̱ a̱ da̱na̱ a yuwusan adanshi a aci a̱ ɗu,

hali gba n lumgbatsa ɗu aaci o ulamu.

5 Nu una̱ u ɗa goon n shi

a ca ɗu adanshi,

adanshi o una̱ u va̱

a ta tawa a̱tsumola̱ngu a̱ ɗu.

6 <<Ko na̱ shi n yuwan adanshi,

usa̱n u na maa uwwusa woo koto shi,

ko na̱ shi n rungwa̱ kpen

usa̱'a̱n u tsu jiba shi.

7 A̱sula̱, ka̱lyuwa̱ ununa

vu kuna̱to numu,

vu lungusa̱ mu ta̱

nu u'wa u va̱ suru.

8 Vu zuwa mu ta̱ n ramba,

ili ya nda yo o'wo mu ta̱

urotsu e ekere a̱ va̱,

waru a tara yi ta̱ wo o'wo iroci

yu unusu u na n yuwain.

9 A̱tsuma̱ o upan wa̱ yi wu kara mu ta̱,

reve u 'yuwan mu,

a̱vu u luma aakatsu a̱ yi adama a̱ va̱,

ma'yuwatan ma̱ va̱

ma varaa mu ta̱ esu a̱ tsushu'un.

10 Ama a̱ kpa̱tu'wa̱ ta̱ na̱ le

a yuwusaan mu avandaru nu ulamu,

a̱ ka̱nda̱ruwusa̱ mu a ɓasasa mu.

11 A̱sula̱ a zuwa mu ta̱ e ekere

aza a na e revei A̱sula̱ shi

reve u vari mu e ekere a̱za̱ e iwuya.

12 Ɗe nu ufaru n shi ta̱ na asuvu nden,

reve A̱sula̱ e reme mu yinlu,

a̱vu u ga̱la̱ mu e iɗa u kototo mu.

A̱sula̱ a̱ ka̱mba̱to mu ta̱

ili i na a cigai e tewin.

13 U zuwa ta̱ eten a tan na aya

a̱ ka̱nda̱ruwa̱ mu,

a̱vu aya e le a sapa mu babu ene iliyali,

hali u zuwa tsishi tsa̱ va̱ tso oco e iɗa.

14 Reve u lyuwa elime

na̱ wa amatosun u va̱ kuci,

a̱vu u riya̱a̱ mu cine vu

revei za na gurai uvon.

15 Utugu wa̱ a̱tsumola̱ngu

wo o'wo mu ta̱ ukwan u lipu,

waru mo oco ta̱ tsugbain

tsa̱ a̱ va̱ a̱ ma̱buta̱.

16 Esu a̱ va̱ a sulu'wan ta̱ san,

adama e mesun,

irumbu yu ukwa̱

i kpa̱to ta̱ urewesu u va̱.

17 Ko na wo o'woi n zuwa ekere a̱ va̱

a̱tsuma̱ o u'ya̱susa̱n wu ugbozu shi,

waru avasa a̱ va̱ fo a̱ ta̱ cece.

18 <<A̱vu uvaɗi, she vu pala unusu

u na a yuwaan numu wan!

She vu lyawa mesun ma̱ va̱

me e izami yu uge'etosu wa amayun,

a̱ kuɗa̱ tsura̱ usuwu wan!

19 Gogo tsunda za na aa yuwan

adanshi a aci a̱ va̱ a̱ ta̱ ɗe zuva,

za na ee isawaan mu u ta̱ ɗe zuva.

20 Aza a na a yuwusaan mu ulamu

e le ɗa n'utsa̱ n va̱,

a̱tsuma̱ a aɓara n ta pura

A̱sula̱ a uwwa mesun ma̱ va̱.

21 N ta zama za na a yuwan ipati

uba̱ta̱ wa̱ A̱sula̱ adama a̱ va̱,

cine vuma tsu yuwan

ipati adama e i'utsa̱ ya̱ yi.

22 Adama a na aa'wan a̱ va̱ a̱ ta̱ ma̱ka̱ra̱,

n ta̱ tono ure u na ma̱a̱ ka̱mba̱ shi.>>