1 Ama a ta'atsu a nda a lyawa ta̱ a̱ ususu Ayuba, adama a na u te inda aciya̱yi za va̱ a̱ɓula̱. 2 Reve Elihu ulobo wa Barake vuma va Buz, za vu ugundo wa Ram, yuwan upan na̱ Ayuba lon adama a na u tarai aciya̱yi na̱ a̱ɓula̱ ula'awu na̱ A̱sula̱. 3 Waru u yuwan ta̱ upan na̱ n'utsa̱ n ta'atsu ma Ayuba, adama a na a lamba ta̱ usuwu u na a ca Ayuba, ko na wo o'woi a damma ta̱ Ayuba ɗa ri nu unusu. 4 Elihu shi ta̱ puro u yuwan adanshi na̱ Ayuba, ko na wo o'woi a̱ yi ɗa mawun a̱tsuma̱ e le. 5 Amma a mantsa ma na Elihu e enei ama a ta'atsu a nda a̱ ri nu usuwu u ro u na a ca Ayuba shi, reve u yuwan upan lon.

6 A̱vu Elihu ulobo wa Barake vuma va Buz usu u damma,

<<O umatsun a̱mu mawun ma ɗa,

a̱ɗu gba mbara n ɗa,

adama o ndolo a̱yi ɗa i zuwai

mu uwwai ume na̱ wovon

u na maa damma ɗu ili i na i ri okolo a̱ va̱.

7 N yuwan ta̱ majiyan n damma,

<Lyawa aza a na a yuwain

rana re a yuwan adanshi,

waru a̱bunda̱ a'wan oo roco ugbozu.>

8 Amma ruhu va̱ A̱sula̱ Mogono me Ili Suru ɗa ri

a̱tsuma̱ a vaɗilima̱,

waru u tsu ca ta̱ vaɗilima̱ urevu.

9 Mbara n ɗa goon n ri nu ugbozu shi,

waru a̱bunda̱ a a'wan a ɗa goon

a tsu zuwa reve ili i na i ri mejege shi.

10 Adama o ndolo n ta dansa,

<Poloo numu atsuvu,

lyawa a̱mu fo n damma

ili i na n revei.> >>

11 Uwwai nda, m puro ta̱

mu uwwa adanshi a̱ ɗu,

m polo ta̱ atsuvu

adama mu uwwa adanshi o ugbozu u ɗu,

mantsa ma na i ri a majiyan

me ili i na yaa damma.

12 M poloo ɗu ta̱ atsuvu ulobonu,

amma a̱yi ɗa nda ko vuma ta̱ ɗu

gura roco Ayuba unusa wa̱ yi shi,

waru ko vuma ta̱ a̱tsuma̱ a̱ ɗu

gura usu yeci ya̱ yi shi.

13 I yuwan ugbozu!

She i damma, <<Tsu ta̱ nu ugbozu wan,

A̱sula̱ a̱ ɗa goon aa lyuwa

aci e ekere a̱ yi,

amma ba vuma shi.>>

14 Na̱ a̱mu ɗa Ayuba ri aa yuwusan adanshi shi,

adama o ndolo ma̱a̱ usu yi

na̱ cu'un vu usuwu u ɗu shi.

15 A lamba ta̱ ili i na a̱a̱ usu,

a̱ da̱shi a damma ili i ro shi,

a buwa ni ili i na aa damma shi.

16 Ana wo o'woi ele a yuwan adanshi shi,

reve a̱mu n da̱na̱ e ipiri i le?

Ko na wo o'woi ele e isawain kpen,

reve a̱mu mi isawan kpen,

a na a̱ ri ni ili i na a damma shi?

17 O'o, a̱mu fo n ta̱ usu,

reve fo n damma ili i na n revei.

18 Tapu ɗa n ri ni idanshi,

waru ruhu na ri pe a̱tsuma̱ a̱ va̱

u jinga̱ɗa̱ mu ta̱.

19 Okolo a̱ va̱ a̱ ta̱ tsa masayan

ma na ma̱ ri ukpa̱towu

na koto a̱ kpa̱tu'wa̱i shi,

tsa tsa̱n vu kwan masayan

ma na ma cigai moɓosoo.

20 Ko shi n 'yuwan n ciga

n yuwan adanshi adama okolo o von mu,

na̱ n 'yuwan n ciga

m kpa̱tu'wa̱ una̱ u va̱ n usu.

21 Maa yuwan aɗangulu shi,

ko n yuwaan za ro una̱ wu uyo'o shi.

22 N reve cine maa yuwaan za ro

una̱ wu uyo'o shi,

na̱ shi una̱ wu uyo'o u ɗa maa yuwusan,

aa jima shi Za na Yuwan numu to una mu.