1 <<Amma gogo aza a na n la'ai umatsun

a ta yuwusaan mu ulamu,

aza a na nan dada e le a la'a musa̱n

nna ri aguɓa o oɓolo e ikyon i va̱ shi.

2 Uda̱shiyi u ne ɗa ma̱ tsura̱

diga o ucira we ekere e le,

ele na ucira u le u kotoi ɗe?

3 Adama o ulambu na ambulu,

a ta agara na̱ a̱ 'ya̱wi na̱ a̱ ka̱mbi na ayin

e izami yi ilyalya,

a̱tsuma̱ e iɗa yu u'yewu na̱ a̱tsumona.

4 A tsu taɓa ta̱ a̱vu'un okono o olopu a tama,

reve a tama a̱la̱ka̱ɗi o olopu.

5 A̱ gba̱ra̱ le ta̱ a̱tsuma̱ a ama,

a̱vu o toni le ni yisali she damma evu.

6 A̱ ta̱ nden a̱tsuma̱ a̱ a̱rumbu o u'yewu,

na̱ a̱tsuma̱ a̱ a̱nci e iɗa

na̱ a̱tsuma̱ a angu a atali.

7 A̱ ta̱ mesun a̱tsuma̱ o olopu

a̱vu o ɓoloto za̱la̱ vu ɗanga va awanda.

8 Ele olo a ɗa a na a̱ ri na aala shi,

ɗaɗa a̱ gba̱ra̱ nle o uta̱ e iɗa'a.>>

9 <<Gogo mo o'wo ta̱ ili yi iroci e ekere e le,

ni ili yu ulamu e ekere e le.

10 E te e inda mu idaba

a̱vu a takatsuwa mu,

diga ne ene mu

reve a̱ tsuwa̱n mu ma̱tsa̱n.

11 Gogo na wo o'woi A̱sula̱

a kuɗai ucira u va̱,

reve u ca mu a̱tsuma̱lima̱,

adama o ndolo a kasa mu ta̱

na̱ limatan va̱.

12 O ukere usa'ani u va̱

a̱za̱ o u'ya̱susa̱n wu ugbozu

a̱ 'yon ta̱ nla̱ngi na̱ a̱mu,

A katala mu ta̱,

reve e keɓe mu o ure u le wu kototosu.

13 A̱ lungusa̱ ta̱ ure u va̱,

reve o ronoo mu addama,

agba ko vuma geshe le shi.

14 A̱ riya̱a̱ mu ta̱ she damma

cine mini ma tsu kara agula,

nu uba̱ta̱ u na u karai ɗa

a̱ ka̱ra̱i a̱cipa̱ a aci a̱ va̱.

15 Wovon u ka̱nda̱ruwa̱ mu ta̱

a̱ gba̱ra̱ ta̱ tsugbain tsa̱ va̱

she damma upepu u ɗa,

waru utsuru u va̱ u puwa̱a̱n ta̱,

she damma eleshe.>>

16 <<Gogo tsunda,

a tawa ta̱ wuma u va̱ a̱tsuma̱ a̱ va̱,

rana va̱ a̱tsuma̱lima̱ cina mu ta̱.

17 Etele a̱ va̱ a̱ kutsulu ta̱ na ayin,

n ta̱ sowuso a̱tsuma̱lima̱ babu wivuwun.

18 A̱tsuma̱ a̱ tsugbain tsu ucira wa̱ yi

A̱sula̱ o o'wo ta̱ tsu utugu a̱ lipu va̱

u reme mu ta̱ tsa̱ yinlu yu utugu u va̱.

19 U vari mu ta̱ a̱tsuma̱ o yilyo'o,

reve mo o'wo tsa̱ ma̱buta̱ no okomo.

20 N showen wu ta̱ A̱sula̱,

agba vu usu mu shi.

N 'yon ta̱ mishin

agba vu ka̱lyuwa̱ mu shi.

21 Vu vadala ta̱ reve vo o'wo

za na tse ene iliyali shi uba̱ta̱ u va̱,

nu ucira wu ukere wa̱ wu u ɗa

vu riya̱a̱ numu.

22 Vu 'ya̱sa̱n mu ta̱ zuva

reve vu zuwa mu a̱tsuma̱ o upepu,

a̱vu vu reme a̱ vuta̱la̱sa̱ mu

a̱tsuma̱ a̱ wunla̱.

23 N reve ta̱ vu ta̱ cipa̱to mu

a̱ tyo uba̱ta̱ o ukwa̱,

u'wa u na a zuwayi za wuma suru.>>

24 <<Ashe, za na ri zuzu na wa̱a̱ riya̱

waa canana ukere wa̱ yi shi?

Za na ri pe a̱tsuma̱ addama,

a yuwan mesun me izami yi ikambishi shi?

25 Ashe, a̱mu n shon

adama aza a na a̱ ri

a̱tsuma̱ a addama shi?

Ashe, n yuwan a̱tsumola̱ngu

adama aza a na a̱ ri

e izami yi ikambishi shi?

26 Amma a mantsa ma na

n zuwai okolo e ili i sa'ani,

reve iwuya i ta̱wa̱.

Mantsa ma na n ri e ipiri ye ekan,

reve irumbu i ta̱wa̱.

27 Okolo a̱ va̱ a̱ ta̱ ma̱puna̱,

waru u von shi,

rana va̱ a̱tsuma̱lima̱ ta̱wa̱ mu ta̱.

28 Ukwan u lipu u va̱ u lima̱na̱ ta̱,

agba adama o usuɗuwu wu urana u ɗa shi,

mi isawan ta̱ a̱ ma̱ka̱nka̱

me e iɓolo ya ama

e mesun me izami yi ikambishi.

29 Mo o'wo ta̱ mawun ma̱ a̱na̱wu

na̱ musa̱n mo una

ni i'utsa̱ yi vori.

30 Ukwan u lipu va̱ u lima̱na̱ ta̱,

a̱ ɓa̱tsa̱sa̱ diga a̱ lipu va̱,

etele a̱ va̱ a̱ kula̱ ta̱

adama o usuɗuwu.

31 Kumburu va̱ ka̱mba̱ ta̱

mesun ma̱ a̱tsumola̱ngu,

reve gbala va̱ o o'wo

uɗyo wa̱ a̱za̱ e mesun.>>