1 Reve Bilida vuma va Shuhu usu u damma,

2 <<Hali mantsa ma̱ ne ɗa

vaa yuwan cu'un va adanshi a nda?

Adanshi a̱ wu a̱ ri nu urana shi!

3 A̱sula̱ a tsu vadala ta̱

ili i na i ri mejege?

Ko Mogono me Ili suru

ma tsu vadala ta̱ ili i na i ri amayun?

4 Na amayun muwun n ɗu

n yuwaan yi ta̱ unusu,

ɗaɗa i zuwai u ge'eto nle

o una̱ wu unusu u gayin u na a yuwain.

5 Amma nna̱ va zami

A̱sula̱ naa amayun,

vu zami isa'ani uba̱ta̱

Mogono me ili Suru,

6 nna̱ vu ri no okolo a asa'ani

no okolo a amayun,

na amayun, A̱sula̱ a̱ ta̱ 'yon

adama u kamba wu,

reve u ka̱mbuwa̱a̱ wu na̱ nden n lafiya

a̱tsuma̱ o u'wa wa̱ wu.

7 Ko na̱ shi vee ene ufaru

u wuma wa̱ wu gashi ili i ro i ɗa shi,

ukosu u wuma wa̱ wu u ta̱ da̱na̱

nu utsuru wa̱a̱ a̱bunda̱ lon.

8 <<A̱vu de vee ece

alabari a mantsa mo ufaru

a̱vu vi idana ili i na

nkaya n tsu n ritoyi.

9 Adama a na a̱ tsu

muwun mo yon n ɗa,

tsu reve ili shi,

rana wuma u tsu

a̱tsuma̱ o uvaɗi u nda

a̱ ta̱ ma̱ka̱ra̱ tsu ululu.

10 Amayun, nkaya n to rito wu,

o to rito wu diga e idanshi yu urevu u le.

11 <<U ta yuwan ashinshini kungwa

uba̱ta̱ u na u ri a̱a̱rumbu shi?

Ko a ta gura tsura̱ ashinshini

uba̱ta̱ u na u ri na̱ mini shi?

12 A̱tsuma̱ a wunlya suru,

na̱ mini ma kwan,

ashinshini a ɗa

za na tsu fara 'yewe,

babu na u kotoi akungu.

13 Ne ɗa aza a na a uwwusa

wovon wa̱ A̱sula̱ shi a̱ ri,

nna̱ hali a kasa na̱ A̱sula̱,

uzuwu wo okolo e le a̱ ri nu urana shi.

14 Amayun ele aa ta taɓa tsa̱ a̱punda̱,

ili i na a zuwayi ucira

u ta̱ tsu uɗava u manata.

15 Nna̱ za ro raɓato o uɗava u manata,

u ta gura guza̱ yi?

Nna̱ za ro reme uɗava u manata,

u ta gura kamba yi adama a na we ee isawan?

16 A̱za̱ e iwuya a̱ tsu uta̱ ta̱ tsa anlya

a na a̱ tsura̱i usuɗuwu wu urana,

tsa anlya a na a̱ tsu ɓa̱ru uɗuma̱ suru.

17 Aralu e le a tsu katala ta̱ atali,

a tsu ɓana ta̱ aatali suru nu ucira.

18 Amma nna̱ a̱ mula̱ le,

babu za na a gura da̱shi damma

pa n da ɗa uba̱ta̱ u na a̱ da̱na̱i.

19 Na amayun, a̱ yi nda ɗa ukosu u ma̱za̱nga̱

ma na a̱za̱ e iwuya a̱ ri na̱ yi,

agba gogo ozo o ro a ɗa

a̱ ta̱wa̱ a tara agadu o uba̱ta̱ u le.

20 <<Amma A̱sula̱ aa 'yuwan a̱za̱ a̱ a̱ɓula̱ shi,

agba ko ke'en wo rito kamba

za na a yuwusan iwuya shi.

21 U ta̱ da̱shi zuwa wu vu zo'oso,

waru una̱ wa̱ wu u yuwan yisali i ma̱za̱nga̱.

22 Amma aza a na a 'yuwan nuwu,

wono u ta̱ kpa̱to le,

waru o to kototo 'wa va̱ a̱za̱ e iwuya.>>