1 <<Vaɗilima̱ limatan vu ka,

rana va̱ yi wa'a ɗa,

waru tapu na̱ a̱tsuma̱lima̱.

2 U tsu uta̱ ta̱ tsa̱ yipa̱lu

reve u kpanla,

u tsu ka̱ra̱ ta̱ tsu ululu

waru u tsu jima shi.

3 A̱ cu'un vi ili ya ndolo a ɗa

va aa zuwusa esu a̱ wu?

Vuma tsa̱ a̱ va̱ tsa a ɗa

vo rono a̱ ta̱wa̱ uba̱ta̱ wu uge'etosu?

4 Zane ɗa a gura o uta̱a̱ ili i na iri cece

diga a̱tsuma̱ e ili i na i ri cece shi?

Babu za!

5 A zuwaa ta̱ vuma rana va̱ yi,

waru vu reve ta̱ a̱bunda̱ o woto va̱ yi,

hali vu zuwaa yi utyo u na wa pasa shi,

6 to, vu tawa esu a̱ wu diga ya̱'a̱ a̱ yi,

vu kasa na̱ a̱yi,

adama wu uwwa uyo'o

vu rana vu linga va̱ yi

tsu za vu ulinga wu za zamalinga.

7 <<A̱ tsu tsura̱ ta̱ uzuwu wo okolo

uba̱ta̱ wu uɗanga u na o koɗoi,

nna̱ o koɗo yi, u ta̱ topiso,

u da̱shi topiso eten asa'avu.

8 Ko na wo o'woi aralu a̱ yi

a kutsa ta̱ e iɗa,

waru ikyun ya̱ yi i kuwa̱,

9 nna̱ a̱ tsuwa̱yin mini u ta̱ o topiso,

reve u topiso tsu uɗanga usa'avu.

10 Amma na̱ vuma kuwa̱

ukosu wa̱ yi u ɗa ne.

Vaɗilima̱ tsu rono ta̱ wivuwun wu ukosu,

waru a̱ yi ɗa ne.

11 Cine mini ma mala ma tsu ukwan,

waru uɗolu wu ukwan hali u 'yewe,

12 ne ɗa vaɗilima̱ tsu kuwa̱,

agba wa̱a̱ da̱shi 'yon shi.

Vaɗilima̱ a̱ da̱shi juwan shi,

ko a̱ 'yon diga a nlavu n le shi ko ke'en,

hali uvaɗi u koto.

13 <<A̱sula̱, u shi ta̱ a la'a vu soko mu

uba̱ta̱ wu nden wa̱ a̱kwa̱kwa̱,

vu shi ta̱ soko mu hali upan wa̱ wu u ka̱ra̱,

reve vu zuwa urana u na va cuwan na̱ mu!

14 Na̱ shi a damma vaɗilima̱ tsu kuwa̱ ta̱,

waru u yuwisan wuma,

n shi ta a kaɓa asuvu a rana va̱ a̱tsuma̱lima̱ a̱ va̱,

hali acina mantsa ma na

za na a̱a̱ ushi mu ta̱wa̱.

15 Ɗaɗa we ɗe mu,

reve n usu yi,

u ta uwwa maluwa ma̱ va̱

a̱mu ulinga we e ekere yi.

16 Ɗaɗa ve e idana suru re wuma u va̱,

waru vaa zuwa esu uba̱ta̱ o unusu u va̱ shi.

17 Unusu wu ucigu wo okolo a̱ va̱

o to soko le a̱ tsa̱n,

vu ta pala unusu u va̱ u na n yuwain ɗe suru.

18 <<Amma o una̱ u ndolo,

cine masasan ma̱ tsu riya̱ reve wu ɓoso,

waru cine a tsu tawa atali diga uba̱ta̱ u na a̱ ri,

19 cine mini ma tsu lyuwa atali,

na̱ cine iro'i i tsu pura̱ ma̱bula̱,

ne ɗa vu tsu kototo

uzuwu wo okolo a vaɗilima̱.

20 Vu tsu da̱na̱ ta̱ a jibusa

ucira wu vaɗilima̱,

hali u kuwa̱.

Vu tsu zuwa ta̱ urewesu wa̱ a̱ yi

u vadala mantsa ma na u kuwa̱i.

21 Olobo a̱yi a̱ ta̱ tsa̱ra̱ tsugbain,

agba we reve shi,

ko na̱ shi a̱ ka̱ɗa̱to le,

we reve shi.

22 Ili i na i ɓa̱li niyi,

a̱ yi ɗa mɓa̱la̱ n lipu va̱ yi goon,

oɓolo na̱ a̱tsuma̱lima̱ a na a cina niyi.>>