1 Reve Elifa vuma va Teman usu u damma,

2 <<Vuma ta̱ lo,

ko za vu ugbozu,

na̱ a̱ da̱na̱ ili i ro e ekere a̱ A̱sula̱?

3 Mejege ma na vaa yuwusan

ili i ro i ɗa e ekere a̱ A̱sulazuva Mogono Me Ili Suru?

Uda̱shiyi u ne ɗa wa̱ tsura̱

a̱ nde ma̱ wu ma za babu unusu?

4 Adama a na a̱vu za wovon wa̱ A̱sula̱ ɗa

a̱yi ɗa i zuwai waa ɓarasa wu,

a̱vu wa tarasa wu a̱ tyo uba̱ta̱ wu uge'etosu?

5 O'o, ili i na i zuwai a̱ yi ɗa

iwuya ya̱ wu i yuwan ta̱ a̱bunda̱ lon,

waru unusu wa̱ wu a̱ ri nu utyo shi!

6 Babu ufaru vu ushi ta̱ okopu

diga e ekere a̱ a̱za̱ a̱ wu,

reve vu usa a̱tugu e le

a̱vu vu lyawa le ataɓu.

7 Vu putsaa ta̱ aza a na a uwwusa akuli

na̱ mini mo oso,

a̱vu vu putsaa aza a na

a uwwusa ambulu ni ilyalya.

8 Ko na wo oꞌwoi a̱vu za vu ucira ɗa,

na vu usai iɗa,

vuma na a casu tsugbain

na ri nden a̱tsuma̱ a̱ yi.

9 Vu gba̱ra̱ ta̱ nruna̱ ekere lya̱nga̱,

reve vu tsutsugba mkpa'an

hali u ka̱ra̱la̱i wira̱.

10 A̱yi ɗa i zuwai maza ma̱ ri

uka̱nda̱ruwu na̱ a̱vu uba̱ta̱ biti,

reve wovon u reme shi nuwu.

11 A̱ yi ɗa i zuwai irumbu i ri lo

hali na vaa gura ene shi,

a̱vu mini ma̱ a̱bunda̱ ma lyuwa wu.>>

12 <<Ashe, A̱sula̱ zuva ɗa u ri shi?

Ka̱lyuwa̱ cine italyo'o i ri alanga,

zane ɗa a gura kurato alanga e le?

13 Agba vu damma ta̱, <Nye A̱sula̱ e revei?>

Cine tsu ɗa waa gura yuwan uge'etosu

ana wo o'woi irumbu i ɗa i ɓa̱ru niyi?

14 Eleshe e irumbu i pici i pala yi ta̱,

hali na u tsu gura ene diga ɗe shi,

a mantsa ma na u ri a mmalu

e memere ma zuva nu uvaɗi.

15 Ko vu ta majiyan ma na vaa yuwan

wuma wa̱ wu tsa wuma wu ufaru

aza a na a̱za̱ e iwuya a̱ kuruyi?

16 A tawa le ta̱ kafu mantsa ma̱ le ma rawa,

mini ma gbain ma̱ pura̱ ta̱ wuma u le

cine mini ma̱ tsu pura̱ ikyun yu usaa.

17 A damma ta̱ A̱sula̱,

<Buwa tsu ure!

Nyen Mogono me Ili Suru maa yuwaan a̱ tsu?>

18 Amma A̱sula̱ a ɗa o shitoyin 'wa le nu utsuru,

cu'un majiyan ma̱ a̱za̱ e iwuya i ndolo

ili i bura mu ne le shi.>>

19 <<A̱za̱ a̱ a̱ɓula̱ a̱ ta̱ a̱ ma̱za̱nga̱

waru ozo o ulambu wu unusu e izo'oshi,

a mantsa ma na enei a casu

a̱za̱ e iwuya oforo,

20 adansa,<Ili i na za vi iwuya ɓolotoi biti

o kototo le ta̱,

waru akina a lyuwa ta̱

suru ili i na i buwai.>

21 <<Gogo Ayuba, she vu foɓo na̱ A̱sula̱,

adama vu tsura̱ asuvu nden,

ne ɗa isa'ani ya̱a̱ ta̱wa̱ wu.

22 Vu ushi uritosu diga o una̱ wa̱ yi,

a̱vu vu soko adanshi a̱ yi a̱tsuma̱ o okolo a̱ wu.

23 She vu ka̱mba̱ uba̱ta̱ Mogono me Ili Suru,

ili suru i ta ka̱mba̱ wu mejege.

Reve fo vu tawa suru

ulambu wa̱ a̱ɓula̱ diga o u'wa wa̱ wu.

24 She vo o'woto zinariya va̱ wu iliya pere

zinariya va̱ wu za vu ulobonu

vu ka̱mbuwa̱yi tsa atali a̱tsuma̱ o ɗolu.

25 Na̱ vu yuwan ne,

Ɗaɗa Mogono me Ili Suru o o'wo zinariya va̱ wu,

a̱yi ɗa waru wo o'wo azurufa va̱ wu na la'ai ulobonu.

26 Vu ta uwwa uyo'o u Mogono me Ili Suru,

vu ta gura 'ya̱sa̱n urewesu wa̱ wu

a̱ tyo uba̱ta̱ wa̱ A̱sula̱.

27 Mantsa ma na vu yuwain

avasa a̱ tyo ya̱'a̱ yi,

u ta uwwa wu,

reve a̱vu fo vu shiton

nzuwulai nna vu yuwain.

28 Vu ta̱ tsura̱ u lyuwu wa aci

e ekere e ili i na vaa yuwan biti,

waru ekan e te e ikana ure wa̱ wu.

29 A̱sula̱ a̱ tsu ka̱ɗa̱to ta̱

a̱za̱ o u'ya̱susa̱n wa avangaci,

reve u wawa aza na o goroi.

30 U ta wawa za na ri nu unusu,

nna̱ ili i na vaa yuwusan ri mejege. >>