1 A̱vu Ayuba lyuwa elime na adanshi, u damma,

2 <<Cine n ri ne ɗa n ri

diga a mantsa ma na ma̱ ka̱ra̱i ɗe,

a mantsa ma na A̱sula̱ a̱a̱ ka̱lyuwusa̱ numu,

3 A̱sula̱ a̱ da̱na̱ ta̱ oɓolo na̱ a̱mu ɗe nu ufaru

waru ne ekan a̱ yi ɗa

n yuwain mmalu a̱tsuma̱ e irumbu!

4 Tsa mantsa ma na n da̱na̱i o ulobo,

mantsa ma na aba'un A̱sula̱

a̱ da̱na̱i o u'wa u va̱.

5 Mantsa ma na Mogono me Ili Suru ma̱ shi oɓolo na̱ a̱mu,

na̱ muwun n va̱ waru uka̱nda̱ruwu na̱ a̱mu.

6 A mantsa ma na iliyamunga i va̱

i ca numu maani ma̱ a̱bunda̱,

atali waru oo ocusho mu mani'i ma zetun.

7 A mantsa ma na n tsu 'ya̱wa̱ o una̱ntsu u lyuci,

n da̱nu a̱ nda̱na̱ta̱ n va̱

uba̱ta̱ u na lyuci tsu ɓolotosu,

8 olobo a̱ tsu ee ene mu ta̱

a̱vu a̱ ka̱mba̱ a̱ nge'en,

reve mbara n 'yon mishin.

9 Azagbain a̱ tsa̱ rungwa̱ ta̱ kpen

reve a̱ guza̱ na̱ le ne ekere e le.

10 Azagbain a̱ tsa̱ rungwa̱ ta̱ kpen,

reve elentsu e le a sura a̱ na̱ le.

11 Aza a na a uwwai adama a ɗa a̱ va̱ suru,

a tsu yuwan ta̱ adanshi asa'ani adama a̱ va̱,

aza a na waru e ene numu

okolo o tsu von le ta̱.

12 Adama a na n wawa ta̱ za vu ulambu

na zamiyi ikambishi,

na̱ makpa'an ma na ma̱ ri

na̱ za na aa kamba yi shi.

13 Vuma na shi o una̱ u ma̱kuwa̱a̱

u zuwaa mu ta̱ aba'un,

n zuwa ta̱ okolo a̱ ma̱runa̱

a cana ishipa i ma̱za̱nga̱.

14 N ka̱mba̱to ta̱ mayan ma̱ a̱ɓula̱

tsa̱ a̱tugu a̱ va̱,

amayun a ɗa utugu u va̱

no okokolo a̱ va̱.

15 Mo o'wo ta̱ esu a̱ nrumba̱,

na ana e ekere a̱ a̱kutsuma̱.

16 Mo o'wo ta̱ dada e ekere a̱ a̱za̱ o ulambu,

n tsi isawaan ta̱ omocin uba̱ta̱ o uge'etosu.

17 N tsu kuɗa ta̱ a anga

aza na a̱ ri na̱ a̱ɓula̱ shi,

reve n zuwa yi

u lyawa ili i na u remei.

18 A mantsa'a, n shi ta̱ n yuwan majiyan n damma,

<N ta̱ da̱nu o u'wa u va̱

hali acina mantsa ma na ma̱a̱ kuwa̱,

waru rana va̱ da̱shi a̱bunda̱ tsa̱ wuyun,

19 mo o'wo ta̱ tsu uɗanga u na aralu a̱ yi

a̱ ba̱ruwa̱i hali a̱ tyo mini,

za na a'iza a̱ tsu cipa̱ e eten yi ayin suru.

20 Tsugbain tsa̱ va̱ tsa̱ ta̱ da̱na̱

usa'avu uba̱ta̱ u va̱,

waru ekere a̱ va̱ a̱ tu nu ucira

u na o rono utan.> >>

21 <<Ama a̱ tsu polo ta̱ atsuvu o puro,

a̱ rungwa̱ kpen,

a mantsa ma na maa casu a̱sa̱la̱.

22 Mantsa ma na n kotoi adanshi,

a tsu damma ili i ro shi

na wo o'woi idanshi i va̱

i tsu uwa ta̱ atsuvu e le.

23 A̱ tsu da̱na̱ ta̱ e ipiri i va̱ she damma

cine a̱ tsu da̱na̱ e ipiri yi iro'i,

a̱ tsu da̱na̱ ta̱ e ipiri i va̱ she damma,

cine a̱ tsu da̱na̱ e ipiri yi iro'i yu ufaru i lyushi.

24 N tsu zo'osoo le ta̱ a mantsa ma na

a̱ ri nu uzuwu wo okolo shi,

waru ucasu we esu u va̱

u tsu zuwa le ta̱ ma̱za̱nga̱.

25 N tsu ɗangulaa le ta̱

ure u na o toni,

n tsu da̱nu ta̱ tso mogono

a̱tsuma̱ o oɓolo a̱ a̱soja e le,

tsa za na a casu adanshi

e ekere a̱za̱ a̱ wiruta̱.>>