1 Reve Ayuba usu u damma,

2 <<Nye i zuwai yaa damatosun mu na adanshi?

3 Mantsa suru i tara mu ili i ro shi,

agba yaa uwwusa wono

u na yee e isulusa mu shi.

4 Ko na̱ shi a damma na amayun a ɗa

n yuwain unusu,

to, unusu'u u ta̱ da̱na̱ a aci a̱ va̱.

5 Nna amayun i tara ta̱ i la'a mu ta̱

reve i tara a̱tsuma̱lima̱ a na mo sowuso

adama o unusu u na n yuwain ɗa,

6 to, i reve a na A̱sula̱ a ɗa

a zuwa numu a̱tsuma̱ a̱tsuma̱lima̱ a nda

na waa azuwaa numu maza

adama u reme mu.

7 Ko na n shi n salai n dammai,

<A yuwaan mu ili i mejege shi!>

Za lo na polo numu atsuvu shi.

Ko na wo o'woi n zami ta̱ ikambishi

agba n tsura̱ shi.

8 A̱sula̱ e geshe ta̱ ure u va̱

agba n gura ka̱ra̱ shi,

reve u ɓa̱ru re va̱ ni irumbu.

9 U pura̱ ta̱ utsuru u va̱ suru,

reve u lungusa̱ a̱ mu ala.

10 Wu ga̱la̱ mu ta̱ uga̱lu,

a̱vu u tawa uzuwu wo okolo a̱ va̱,

u lyawa mu o upan

hali n kuwa̱.

11 A̱sula̱ a̱ tsuwa̱a̱n mu ta̱ upan wa̱ yi,

u ka̱mba̱to mu tsa za na yuwain iwuya

a̱tsuma̱ a n'yuwatan ma̱ yi.

12 U lyungu ta̱ no oɓolo a̱ a̱soja a̱ yi

ta̱wa̱ a̱ riya̱a̱ mu nu uvon,

reve a̱ ka̱pa̱ a̱ka̱ri

uka̱nda̱ruwu nu u'wa u va̱,

uba̱ta̱ u na a vawan mu.

13 <<U zuwa ta̱ a̱za̱ a̱ va̱ a 'yuwan mu.

Aza a na a̱ shi e reve numu

mo o'wo ta̱ mocin e ekere e le.

14 Mmaci n va̱ n suma mu ta̱,

n'utsa̱ n zuzu e icina ta̱ na̱ mu.

15 Aza a na a̱ shi a̱ tsu ta̱wa̱ o u'wa u va̱,

e icina ta̱ na̱ mu.

Agbashi e esheli o u'wa u va̱

a̱ ka̱mbuwa̱ mu ta̱

she damma a̱mu mocin ɗa diga e iɗa i ro.

16 Nna̱ n ɗe aagbashi a̱ va̱,

u tsu usu mu shi,

ko na̱ shi gba n kingyo

m pati yi u kamba mu.

17 Ka va̱ gura kaɓa asuvu

nu ushamu u wivuwusan u va̱ shi,

muwun ma̱ a̱na̱wun n va̱,

n suma mu ta̱.

18 Muwun n keke'en

n goro mu ta̱,

reve a̱ ka̱ra̱ e izo'oshi i va̱

mantsa ma na e ene mu.

19 N'utsa̱ n zuzu n va̱ suru,

a̱ ta̱ e nda mu idaba.

Aza a na n la'a cigai suru

a vadalaa mu ta̱ ucina̱.

20 Mo o'wo ta̱ etele va̱ni,

hali na a gura kece le,

ke'en ɗa n la'ai,

n shi ta̱ kuwa̱.

21 A̱ɗu n'utsa̱ n va̱,

enei iliyali i va̱!

Adama a na ukere wa̱ A̱sula̱

u ga̱la̱ mu ta̱.

22 Nye i zuwai yaa ca mu a̱tsuma̱lima̱

ununa a̱ A̱sula̱ a yuwain?

Atakaci a na a ca numu

u rawa ɗu shi?

23 <<A̱ shi a damma a ɗana ta̱

idanshi i na n dammai,

a̱ shi ta̱ a̱ da̱na̱ uɗanu

a̱tsuma̱ a aatagada!

24 A̱vu shi a ɗana le na̱

maɗanutsu ma̱ rumu,

a̱ da̱na̱ a aatali hali hali!

25 A̱mu n reve ta̱,

Za va Atsupu a̱ va̱ a̱ ta̱ wuma,

za na a̱ tyo o ukosu

u ta̱ ta̱wa̱ wi isawaan mu.

26 Ko na wo o'woi mɓa̱la̱

n tama ta̱ ɗe lipu va̱,

na̱ lipu nda ɗa mee ene a̱ A̱sula̱.

27 N ta̱ ene yi esu ne esu,

agba wo o'wo mocin

uba̱ta̱ u va̱ shi.

okolo a̱ va̱ a ta a maluwa

ma mantsa mo ndolo.

28 <<Nni i damma,

<Cine tsa a ɗa tsaa ca yi a̱tsuma̱lima̱?>

Ko i damma,

<Ufaru wa addama'a

uba̱ta̱ wa̱ yi u ɗa wu uta̱i,>

29 to, she yu uwwa wovon

u matsun me pe'eni,

adama a na upan u tsu ta̱wa̱a̱ ta̱

no oforo a matsun me pe'eni.

I reve uge'etosu u ta̱ lo!>>