1 Reve Zofa vuma va Na'ama usu u damma,

2 <<U ta yuwan a lyawa adanshi

a̱bunda̱ babu na a̱ usu nle?

Ko a̱bunda̱ a adanshi o tsu roco ta̱,

vuma ri nu unusu shi?

3 Ayuba, vu ta majiyan ma na

tsa gura ca wu usuwu shi?

Vu ta majiyan adama e idanshi

yu ulamu ya̱ wu,

tsu ta lamba ili i na tsa̱ usu wu ɗa?

4 Vu ta tarasa suru ili i

na va dansa amayun a ɗa,

waru vu ta tarasa aciya̱wu

a̱vu za va akiza ɗa

a̱ ma̱ka̱ka̱n ma̱ A̱sula̱.

5 U shi ta̱ a̱ da̱na̱ ulobonu

A̱sula̱ a̱ shi a̱ usu wu,

u yuwan adanshi a aci a̱ wu,

6 u shi ta a damma wu

ugbozu u ta̱ na̱ re a̱bunda̱.

Vu reve uge'etosu u na

A̱sula̱ a yuwaan nuwu,

u rawa a̱bunda̱ o unusu

u na vu yuwain shi.

7 <<Vu ta gura bunga̱ hali vu reve

ili yu usokowu wa̱ A̱sula̱?

Ko vu ta gura zami ukosu u

Mogono me Ili Suru hali vu tsura̱?

8 U la'a ta̱ zuva va zuva alanga

nye ɗa va yuwan,

u la'a ta̱ a̱ru'un o uba̱ta̱

wu nden ma̱ a̱kwa̱kwa̱,

nye ɗa va yuwan,

9 A̱sula̱ a la'a ta̱ uvaɗi washin,

waru washin wa̱ yi u la'a ta̱ mala.

10 Nna̱ A̱sula̱ a̱ ta̱wa̱ e reme vuma

reve u zuwa yi o u'wa wa ali,

ko u ɓoloto ama adama o uge'etosu,

zane ɗa aa putsayi?

11 Na amayun, A̱sula̱ e reve ta̱ ama e pere,

adama a na u te e inda

suru linga vi iwuya i le.

12 Vuma na tsu jiyan shi

wa̱a̱ tsura̱ urevu shi,

cine nloli mu una n ri

a gura matsan vaɗilima̱ shi ko ke'en.

13 <<A̱vu Ayuba, vu foɓo

okolo a̱ wu mejege,

vu canana ekere a̱ wu

a̱ tyo uba̱ta̱ wa̱ A̱sula̱,

adama e izami yi ikambishi.

14 Vu tawa iwuya nu unusu

a̱tsuma̱ o u'wa wa̱ wu.

15 Ne ɗa vo o'wo za babu unusu,

vu 'ya̱sa̱n urewesu wa̱ wu babu wono,

vi isawan nu ucira,

vu yuwan nden ma̱ wu babu wovon.

16 Vu te e icina na̱ a̱tsuma̱lima̱ a̱ wu,

u ta̱ ka̱ra̱ cine mini

mo uɗolu ma̱ tsu ka̱ra̱.

17 Wuma wa̱ wu u te e ikana,

u la'a uteshe wu urana a aci,

rana wuma wa̱ wu vi irumbu,

to o'wo tse ekan o usana.

18 Vu ta yuwan nden n lafiya,

nu uzuwu wo okolo tapu,

A̱sula̱ a ta yuwaan wu mapari,

reve u ca wu wivuwun.

19 Vu to von agba

babu za na a da'waton wu,

ama na̱ a̱bunda̱,

a ta zami ikambishi ya̱'a̱ wu.

20 Amma esu a̱za̱ e iwuya

ee ene amayun shi,

ee ene ure u na a la'a shi.

Uzuwu wo okolo e le a̱ yi ɗa

o rono wivuwun wu ukosu.>>