1 Reve Elihu usu u damma,

2 <<A̱ɗu ama a na i ri nu ugbozu,

uwwai adanshi a̱ va̱,

i polo atsuvu e ili i na ma damma,

a̱ɗu a̱za̱ o urevu.

3 Utsuvu u tsu petelyuwe ta̱ idanshi

cine elentsu a̱ tsu peɗe ilyalya.

4 Lyawa tsu ɗangwayi

ili i na i ri mejege,

waru tsu uta̱yi ili i na i ri

ulobonu a̱tsuma̱ a̱ tsu.

5 Adama a na Ayuba damma ta̱,

<A̱mu n ri nu unusu shi,

waru A̱sula̱ a usa ta̱

ili i na n zamiyi na̱ melen ma̱ va̱.

6 Nu ukuɗu wu unusu u va̱ u nda suru,

a tara mu ta̱ za ve epen.

Ko na n ri nu unusu shi,

aya a̱ yi a amaton mu ta̱

na ma̱a̱ gura ka̱mba̱ gbaga shi.>

7 <<Cu'un vuma ne ɗa vu ri Ayuba,

na voo o sowuso ulamu

she damma cine vu tsu sowuso mini,

8 a̱vu na vu ri a mmalu

na aza a na aa yuwusan iwuya,

waru agara na ama a vama?

9 Adama a na vu damma ta̱,

<Vuma tsu tsura̱ uda̱shiwu u ro

a̱tsuma̱ o mpolo nna

woo yo'onoto A̱sula̱ okolo shi.> >>

10 <<Adama o ndolo poloo numu atsuvu,

a̱ɗu a̱za̱ o urevu,

ko ke'en A̱sula̱ a tsu yuwan iwuya shi,

waru Mogono me Ili Suru

ma tsu yuwan unusu shi!

11 Adama a na u tsu tsupa ta̱ vaɗilima̱

o una̱ wi ili i na u yuwain,

u tsu zuwa ta̱ ifoɓi i vuma

i ka̱mba̱ aciya̱yi.

12 Na amayun A̱sula̱ aa yuwan iwuya shi,

waru Mogono me Ili suru maa vadala amayun shi.

13 Zane ɗa ca niyi tsugbain tsi iɗa?

Waru zane ɗa ca niyi

tsugbain tsu uvaɗi suru?

14 Na damma u ta̱ ushi ruhu

na̱ wivuwun u na wivula̱yi vaɗilima̱,

15 ili i wuma suru i shi ta̱ kuwa̱

waru vuma suru ta̱ ka̱mba̱ a̱ ma̱buta̱.>>

16 <<Nna̱ vu ri nu urevu,

lyawa vu uwwa nda,

vu uwwa ili i na maa dansa.

17 U ta̱ n yuwan za na cigai

mejege shi yuwan tsugbain?

Vu ta gura ge'eto za va̱ a̱ɓula̱ za vu Ucira?

18 Za ne ɗa a gura damma mogono,

<A̱vu ili i vama i ɗa,>

Ko u damma azagbain,

<A̱ɗu a̱za̱ e iwuya a ɗa.>?

19 A̱sula̱ o tsu roco aɗangulu

e ekere azagbain shi,

ko u la'a idana za vu utsuru

ula'awu na̱ za vu ulambu shi,

adama a na suru nle

ulinga we ekere a̱ yi a ɗa.

20 A̱ tsu kuwa̱ ta̱ babu usa̱n,

ayin uɓatsu a̱ tsu kuwa̱ ta̱ nu uta̱,

a tsa una ta̱ a̱za̱ o ucira babu ukere u vuma.>>

21 <<Esu a̱ A̱sula̱ a̱ ta̱ ka̱lyuwusa̱ re vuma,

waru u te e inda linga le suru.

22 Babu irumbu ko irumbu i pici

i na a̱za̱ e iwuya aa pa'an.

23 A̱sula̱ a̱ ri na̱ mantsa

adama a vuma waru shi,

hali na wa̱a̱ ta̱wa̱

a̱ ma̱ka̱ka̱n ma̱ A̱sula̱ uge'etosu shi.

24 U tso oco ta̱ a̱za̱ o ucira babu yeci,

reve u zuwa ozo o ro uba̱ta̱ u le.

25 Adama a na u revei linga le,

u tsu foɗo le ta̱ na ayin,

reve u rukutsa̱ le.

26 U tsu ca le ta̱ oforo elime a ama

adama e iwuya i le.

27 Adama a na a vadalai

a lyawai i toni ya̱ yi,

waru a tara ko ure uta̱ wa̱ yi

ili ya̱ a̱ɓula̱ shi.

28 A tsu zuwa ta̱ mesun ma alambi

u rawa uba̱ta̱ wa̱ A̱sula̱,

waru u tsu uwwa ta̱ mesun

ma a za na a uwwusa atakaci.

29 Na damma A̱sula̱ a̱ ta̱ rungwa̱ kpen

zane ɗa she tawaa za nu unusu?

Nu u soko urewesu wa̱ yi,

zane ɗa aa gura ene yi

na̱ ne suru, a̱yi ɗa u ri nu ucira

e ekere a vuma ne e ekere e iɗa suru.

30 Wuntsaa za na ri na̱

wovon wa̱ A̱sula̱ shi

yuwan tsugbain shi,

adama she u keɓe a ama

a̱tsuma̱ a maza wan.>>

31 <<Za ta̱ lo na damma A̱sula̱,

<N sowo ta̱ a̱tsuma̱lima̱,

ma̱a̱ da̱shi nusan shi.

32 Vu roco mu ili i na n revei shi,

na̱ n yuwan ta̱ unusu,

ma̱a̱ da̱shi shi.>

33 Ayuba, na wo o'woi

vu usu ni ili i na A̱sula̱ a yuwain shi,

a̱ yene ya̱ wu,

wuntsaa A̱sula̱ a tsupaa vaɗilima̱ shi?

Ee, aɗangulu a̱ wu a ɗa

agba za va̱ ɗa shi,

she de vu damma ili i na vu revei.

34 Aza a na a̱ ri nu urevu

a ta damma mu,

na amayun, za vu ugbozu na uwwa numu

u ta damma mu,

35 <Ayuba ta yuwusan adanshi

a̱tsuma̱ o ulambu wu urevu,

adanshi a̱ yi a̱ ri na aci shi.>

36 U shi ta̱ lobono a̱ lyungwa̱ Ayuba

hali a̱ tyo o ukosu,

adama a na ususu u na waa casu

tsa̱ a̱za̱ e iwuya a ɗa.

37 Adama a na u da̱shi ta̱

u'ya̱susa̱n wa a aci o unusu wa̱ yi,

elime a̱ tsu u yuwaan ta̱ A̱sula̱ ulamu,

u ta̱ da̱shishi idanshi ya̱ yi

a̱ nla̱ngi na̱ A̱sula̱.>>