1 A̱vu Elihu lyuwa elime na adanshi, u damma,

2 <<Yuwan ankuri na̱ a̱mu ke'en,

n ta gba o roco wu,

na hali n gogo m buwa ta̱

ni ili i na maa damma

o una̱ wa̱ A̱sula̱.

3 N tsura̱ ta̱ urevu u va̱ diga a alanga,

na moo roco Za na Yuwan numu ta̱ na̱ a̱ɓula̱.

4 Amayun epen a ɗa maa yuwusan shi,

za na ri nu urevu lon ta̱ oɓolo na̱ a̱vu.>>

5 <<A̱sula̱ Mogono me Ili Suru,

u tsu goro vuma shi,

za vu ucira ɗa,

tapu nu urevu.

6 U tsu lyawa za vi iwuya wuma shi,

amma u tsu ca ta̱ aza a na oo ɓongishi

ili i na i ri za le.

7 U tsu tawa a̱za̱ a̱ a̱ɓula̱ esu shi,

amma u tsu zuwa le ta̱ ootogu o tsugono

reve u ca le tsugbain babu ukotu.

8 Amma nna̱ a̱ nla̱ le na akani,

reve e reme le na amunga e iɓongi,

9 u tsu damma le ta̱ ili i na a yuwain

nu unusu u gayin le,

aza a na a yuwain

a̱tsuma̱ a aciyogbamu.

10 U tsu zuwa le ta̱

o polo atsuvu a tsuɓari,

u tsu ca le ta̱ udammu u na

avadala diga a mayan me iwuya.

11 Nna̱ o polo atsuvu

a̱vu a yuwaan yi a̱ga̱nda̱,

wuma u le u ta̱ da̱na̱ na aba'un,

a'wan e le waru a̱tsuma̱

a mawwa mo uyo'o.

12 Amma no polo atsuvu shi,

o to kototo le na̱ matsun me pe'eni,

a̱vu a̱ kuwa̱ adama o tsulo tsa̱ le.

13 <<Aza a na a̱ ri na̱ wovon

wa̱ A̱sula̱ o okolo shi,

a̱ tsu da̱na̱ ta̱ o upan,

a tsu zami ikambishi

mantsa ma na u ca n le oforo shi.

14 A̱ tsu kuwa̱ ta̱ a̱tsuma̱

o tsulolobo tsa̱ le,

o tsu koto ta̱ wuma u le

a̱tsuma̱ o wono.

15 U ta wawa aza a na oo ɓongishi

a̱tsuma̱ e iɓongishi i na o sowuso,

u tsu kpa̱tu'wa̱ ta̱ esu e le

o ure wa̱ a̱tsuma̱lima̱ a na o sowuso.

16 Ayuba, A̱sula̱ a papa wu ta̱

diga a̱tsuma̱ a̱ a̱tsuma̱lima̱

u ta̱wa̱to wu uba̱ta̱ usa'ani

u na u ri ugbagbalu shi,

Ilyalya i na a zuwaa numu a apada

ilyalya i na i la'ai uyo'o u ɗa.>>

17 <<Amma gogo u ɓa̱la̱ wu ta̱ lon,

tsura̱ vee ene e ge'eto ta̱ a̱za̱ e iwuya,

amma uge'etosu wa amayun

no oforo e reme wu ta̱.

18 Vu ka̱mbuwa̱ ugbozu

ta̱wa̱ vu lyawa utsuru wa̱ wu

u zuwa wu vu goro A̱sula̱ wan,

ta̱wa̱ vu lyawa a̱tsuma̱lima̱ a na

voo sowuso kakasa wu

na̱ za vi iwawi ya̱ wu wan.

19 Utsuru wa̱ wu wa gura kasa wu na̱ a̱tsuma̱lima̱ shi,

ucira wa̱ wu suru wa gura kamba wu shi.

20 She vu da̱na̱ a maluwa ayin a yuwan wan,

adama a na a mantsa ma ɗaɗa

o tsu kototo wa ama.*

21 Vu ka̱mbuwa̱ ugbozu,

she vu zuwa aciya̱wu

a mayan me iwuya wan,

adama a na vu ɗangula ta̱ mayan me iwiya

ula'awu na̱ a̱tsuma̱lima̱.

22 Tsugbain tsa̱ a̱ A̱sula̱

tsa̱ ka̱ra̱ ta̱ ucira u mereve!

Zane ɗa a gura o'wo manlu tsa̱ a̱ yi?

23 Babu za na a gura foɓoo

A̱sula̱ ili i na wa yuwan,

zane ɗa rawai na waa damma yi,

<Vu yuwan ta̱ unusu?>

24 <<Vu cuwan vu ca ulinga wa̱ yi tsugbain,

za na ama a cuwusa ni ishipa.

25 Vaɗilima̱ suru e ene ta̱ linga va̱ yi,

a cinkaya le ta̱ diga alanga.

26 A̱sula̱ Zagbain ɗa!

Tsaa gura reve ukosu

u tsugbain tsa̱ yi shi,

waru a̱bunda̱ a a'wan a̱ yi

a̱ ri n damma shi.

27 Adama a na u tsu rono ta̱ yidaɓi i mini diga e iɗa,

reve u ka̱mbuwa̱ le o o'wo iro'i.

28 Eleshe o tso oco ta̱ mini e iɗa,

reve o ocoo wo vaɗilima̱ lon.

29 Zane ɗa aa gura reve

cine A̱sula̱ a̱ ba̱ruwa̱i eleshe,

na̱ cine u tsu lapa tsata

diga uba̱ta̱ wu nden ma̱ yi?

30 U bete'we ta̱ imaɗatsu

uka̱nda̱ruwu na̱ yi,

imaɗatsu i tsi ikana ta̱

hali a rawa e ikyun i mala.

31 Ne ɗa u tsu ge'eto nɗa,

a̱vu u ca ilyalya ya̱ a̱bunda̱.

32 U tsu shiton ta̱ ukere wa̱ yi ni imaɗatsu

reve u zuwa yi u riya̱ e ili i na u kirayi.

33 A̱giri'a̱ o tsu roco ta̱ na

mini ma̱ a̱bunda̱ nu upepu u ri lo a̱ ta̱wa̱,

ko inan i tsu reve ta̱

a na wunla̱ u 'yoyin.>>