1 A̱vu Elihu usu u damma,

2 <<Ayuba, a majiyan ma̱ wu,

ulobono ta̱ vu damma,

<Na a̱vu vuma va̱ a̱ɓula̱ ɗa

a̱ ma̱ka̱ka̱n ma̱ A̱sula̱?>

3 Hali na vaa yuwan yeci vu damma,

<Urana u ne ɗa n ri na̱ a̱ yi?

Uda̱shiwu u ne n tsura̱i o ure

wu ulambu u mayan mo unusu?>

4 N ta̱ usu wu

oɓolo na̱ n'utsa̱ ma̱ wu.>>

5 Ka̱lyuwa̱ zuva vee ene,

vu ka̱lyuwa̱ eleshe a zuva

a na a̱ ri a alanga na̱ a̱vu.

6 A majiyan ma̱ wu na̱ vu yuwan unusu

vu paala ta̱ A̱sula̱ ɗa?

Nna̱ nusu va̱ wu yuwan a̱bunda̱,

u roco ta̱ na vu yuwain ili i ro i ɗa?

7 Na̱ vu ri na̱ a̱ɓula̱, nye vu ca niyi?

Ko gba nye u ushiyi e ekere a̱ wu?

8 Iwuya ya̱ wu i tsu ju'wa̱n ta̱

ozo o ro tsa̱ a̱ wu,

ne ɗa fo a̱ a̱ɓula̱ a̱ wu a̱ ri nu urana

e ekere a vaɗilima̱ goon.

9 <<A̱bunda̱ o ule'e a tsu zuwa ta̱

a ama a saala,

a tsu zami ta̱ ikambishi

adama e iɓongishi ya̱ a̱za̱ o ucira.

10 Amma ko za tsu damma,

<Te ɗa A̱sula̱ za na yuwan numu,

za na tsu ca ishipa na ayin shi.

11 Za na ca ntsu urevu ula'awu

ni inama yu una yu uvaɗi

waru u ca ntsu ugbozu ula'awu

na̱ nnunu n tsu'yan.>

12 Reve a yuwan mesun

me e izami yi ikambishi

agba u usu shi,

adama aciyogbamu a̱ a̱za̱ e iwuya.

13 Amayun, A̱sula̱ a tsu uwwa

mesun me pere shi,

Mogono me Ili Suru mo tsu poloo le atsuvu shi.

14 <<Ayuba, a̱vu zane ɗa a na

vu dammai vee ene yi shi?

Hali na vaa dansa adanshi a̱ wu

a̱ ta̱ a̱ ma̱ka̱ka̱n ma̱ yi,

waru vu ta pura yi?

15 Na̱ ne suru vu damma ta̱,

A̱sula̱ a tsu yuwan uge'etosu

a̱tsuma̱ o upan wa̱ yi shi,

waru A̱sula̱ a tsu dama nu unusu shi.

16 Ayuba adanshi a̱ wu a̱ ri na aci shi,

vu yuwusan ta̱ adanshi babu urevu.>>