1 Reve Ayuba usu u damma,

2 <<A̱vu ɗa za na tsu kambusa

aza a na ri nu ucira shi!

A̱vu ɗa za na tsu wawa

aza a na a̱ ri nu ukadu shi!

3 Ka̱lyuwa̱, cine vu cayi

za vu ulambu wu ugbozu a̱sa̱la̱!

Vu roco ta̱ alanga eteshe

na vu ri nu urevu!

4 Ni ikambi ya zane ɗa

vu dammai idanshi i nda?

Na̱ cu'un ruhu ne ɗa

vu yuwain adanshi a nda?

5 A̱kwa̱kwa̱ a̱ ta̱ pe a̱tsuma̱lima̱ lon,

oɓolo na aza a na a̱ ri za̱la̱ mini,

na aza a na a̱ ri na̱ nde pe.

6 Uba̱ta̱ wu nden ma̱ a̱kwa̱kwa̱

hawun ɗa u ri a̱ ma̱ka̱ka̱n ma̱ A̱sula̱,

ne ɗa fo uba̱ta̱ wu ukototosu u ri

a̱ ma̱ka̱ka̱n ma̱ yi.

7 A̱sula̱ a ɗa a̱ ba̱ruwa̱i

agalaci o upasu wu ugana

ko ili i ri uguzu na̱ a̱ yi shi,

reve u sa̱ga̱do uvaɗi

uba̱ta̱ u na ili i ri uguzu na̱ a̱ yi shi.

8 A̱yi ɗa u shitoyin

eleshe a̱ lima̱ da̱a̱n na̱ mini,

agba ume u mini'i u ɓoso eleshe'e shi.

9 Wu pala ta̱ o ootogu

a tsugbain tsa̱ yi ne eleshe

reve wu ba̱ruwa̱ a̱ yi

uba̱ta̱ wu nden ma̱ yi.

10 U ka̱ra̱ ta̱ utyo wu ukosu u mini

oɓolo nu utyo wu ukosu

we ekan ni irumbu.

11 Atsura a zuva a̱ jinga̱ɗa̱ ta̱,

reve a uwwa wovon

a na a uwwai tsuɓari tsa̱ yi.

12 Nu ucira wa̱ yi u ɗa

mala mo voyin kpen,

waru nu uguru wa̱ yi u ɗa

u lapai oododo a̱ mini Rahapu.

13 Na̱ wivuwun wa̱ yi u ɗa

u zuwai agalaci a zuva o lobonoi,

nu ukere wa̱ yi u ɗa

u sapai Rahapu yo vi ilaɗi i ndolo.

14 Amma a̱yi nda ke'en ɗa

diga a̱tsuma̱ a linga va̱ yi.

Wa'a ɗa tsu uwwai adama aɗa a̱ yi!

Agba zane ɗa aa gura reve

ucira u tsata tsa̱ yi?>>