1 A̱vu A̱sulazuva a lyuwa elime na adanshi na̱ Ayuba u damma,

2 <<Za na aa zama u suraa Mogono me ili suru unusu

u ta gura yuwan mo rono na̱ a̱yi?

Lyawa za na a yuwusan

mawasan na̱ A̱sula̱ suru, u usu!>>

3 Reve Ayuba usu A̱sulazuva u damma,

4 <<A̱yi ɗa nda, a̱mu ili i ro i ɗa shi,

nye ma̱a̱ usu wu?

M ɓa̱ru ta̱ una̱ u va̱ nu ukere u va̱.

5 N yuwan ta̱ ɗe adanshi a̱bunda̱,

waru m buwa a̱a̱ da̱shi

damma adama shi.>>

6 A̱vu A̱sulazuva a yuwan adanshi na̱ Ayuba a̱tsuma̱ a̱ wunla̱ u damma,

7 <<Yuwan gbakala tsa vali,

n ta yuwan wu yeci,

a̱vu vu usu mu.

8 A̱vu, vu ta gura ca mu unusu ɗa?

Vu ta̱ ge'eto mu

adama a tara wu za babu unusu?

9 Vu ta̱ nu ucira tsa̱ A̱sula̱?

Uɗyo wa̱ wu u ta gura

giru'wa̱ tsa̱ yi?>>

10 <<Gogo vu kala aciya̱wu

nu ulobonu na̱ tsugbain,

vu pala aciya̱wu

na̱ tsugbain na̱ tsugono.

11 Vu roco upan wu usuɗuwu

wa̱ wu a alanga eteshe!

Vu ka̱lyuwa̱ aza a aciyogbamu suru,

reve vu ka̱ɗa̱to le.

12 Ka̱lyuwa̱ za na ri

na aciyogbamu suru

a̱vu vu ka̱ɗa̱to yi,

vu dasa a̱za̱ e iwuya

uba̱ta̱ u na a̱ ri.

13 Vu ciɗo le suru e iɗa,

vu ɓa̱ru urewesu u le

a̱ a̱tsuma̱ a aason.

14 Ɗaɗa a̱mu na aciya̱va̱ maa cuwa wu,

reve n usu ana ukere usa'ani wa̱ wu u ɗa

u ca nuwu ulyuwu wa aci.

15 <<Apa agiwa a̱ mini

a na a̱mu n yuwain,

ununa n yuwan nuwu,

a tamasa wunlya tsa nan.

16 A̱yi ɗa nda gba ucira wa̱ yi

u ta̱ e ikyun ya̱ yi,

waru ukadu wa̱ yi u ta

a aruva a̱ a̱tsuma̱ a̱ yi!

17 Wizan wa̱ yi u tu ugbamu,

tsu uɗanga u sida.

A aruva a agutsu a̱ yi

a̱ tu uɓoluloi.

18 Etele a̱ yi a̱ ta̱ tsi irumushili,

a̱ a̱la̱ta̱ a̱ yi a̱ ta̱ tsi irumu.

19 <<A̱yi ɗa ufaru a̱tsuma̱ a linga va̱ A̱sula̱,

za na yuwan niyi ɗa goon

tsu kawan rawa yi na̱ matsun me pe'eni.

20 U tsu tsura̱ ta̱ ilyalya a nsasan,

uba̱ta̱ u na inama yu una suru

i tsu da̱na̱ o uro.

21 U tsu von ta̱ o ululu

wu uɗanga wa awanda

u na u ri na̱ a̱vu'un kpa̱la̱m,

u tsi ivuwan ta̱

a̱tsuma̱ a apumpu a̱ a̱rumbu.

22 Ululu u na u ri na̱ a̱vu'un kpa̱la̱m a ɗa

a tsu yuwaan yi ululu,

ɗanga na ri a̱ nge'en

vu uɗolu ɗa ka̱nda̱ruwa̱ niyi.

23 Ko na̱ shi mala ma shiwan,

u tsu da'wan shi.

Ko na̱ shi Uɗolu wa̱ Urudu u shiwan

hali she o una̱ okolo a̱ yi nven a ɗa u ri.

24 Vuma ro tu lo na waa gura reme yi na̱ gon,

ko u ba̱ma̱ vunu va̱ yi na̱ rumu?>>