1 Ana rana cindere'e ka̱ra̱i, reve Ayuba kpa̱tu'wa̱ una̱ wa̱ yi u yuwaan urana u na a matsan niyi una̱.✝

2 A̱vu Ayuba damma,

3 <<A̱sula̱, lyawa vu yuwaan

urana u na a matsan numu una̱,

vu yuwaan ayin a na a tarai

a̱a̱tsuma̱ a̱ va̱ una̱.

4 A̱sula̱, lyawa vu ka̱mbuwa̱

urana u ndolo wo o'wo irumbu,

she a̱ da̱shi cuwan

nu urana'a wan,

she ekan

i da̱shi e ikana yi wan.

5 Vu zuwai wo o'wo

urana wi irumbu i pici.

Vu pala yi ne eleshe

she ekan o urana

i da̱shi e ikana yi wan.

6 Vu kimusa̱ ayin o ndolo

a̱tsuma̱ aa'wan,

waru she a̱ da̱shi kece yi

a̱tsuma̱ a rana woto wan.

7 Vu zuwa ayin o ndolo

a̱ da̱na̱ nu urana wan,

amma ayin a̱tsumola̱ngu.

8 Vu zuwa aza a na a yuwusan yindi

a yuwaan urana u ndolo una̱,

Ele na a tsu ca

oododo Leviyatan udammu.

9 Vu putsaa italyo'o

yu usana'a na wa ca ekan,

she vu lyawa ayin o ndolo

a zuwa okolo a na wee ene

usana u ro wan.

10 Vu yuwaan ayin o ndolo

a na a matsan numu una̱,

na zuwa numu a̱tsumola̱ngu

oɓolo na̱ a̱tsuma̱lima̱.

11 <<U shi ta la'a mu

na̱ shi a damma n kuwa̱ ta̱

a̱mu a̱a̱tsuma̱ a mma va̱,

ko gba shi,

na a matsan numu,

shi n kuwushi.

12 Nye i zuwai mma va̱

ɓana numu ekere a̱ yi,

hali u ca numu

maani ma̱ yi ma apai?

13 Amayun, na̱ shi a damma

n kuwa̱ ta̱ a mantsa'a,

n shi ta̱ a̱ da̱na̱

ɗe e ivuwusan.

14 N shi ta̱ a̱ da̱na̱ a nlavu n va̱

oɓolo na̱ ngono na aza a tsugbain,

aza a na saa gbagbain le

o o'woi okongo!

15 N shi ta̱ a̱ da̱na̱ a̱ ma̱ru'wa̱

ma nlavu n va̱ tsa azagbain,

a na o shitoyin 'wa le

na̱ zinariya na̱ azurufa.

16 Nye i zuwai a̱ ciɗo numu tsa̱ mereɓu

ma na a matsain ukwa̱ shi,

ko tsa̱ ba̱ba̱ na koto enei ekan o urana shi!

17 Ason a ɗa ukosu wa̱ a̱za̱ e iwuya,

waru ɗe ɗa aza a na a̱ kuna̱i e ivuwan.

18 Ɗe ɗa ozo o u'wa wa ali o o'wo fa̱a̱n,

a̱ te e ivuwan na̱ tsuɓari,

nu ucasu wu ulinga wu usa̱n.

19 Za suru tu lo uba̱ta̱'a̱

zagbain na̱ za ke'en

suru ili i ta̱ i ɗa,

hali na agbashi fo

o to o'wo fa̱a̱n.>>

20 <<Nye i zuwai a lyawusa ama

a̱ da̱nu a̱tsuma̱ o udamu?

Nye i zuwai a casu uzuwu wo okolo

e ekere aza a na a̱ ri a̱tsuma̱ a̱tsuma̱lima̱?

21 A ta maluwa mo ukwisa̱,

agba u ta̱wa̱ shi,

a la'a ta̱ ciga ason ula'awu

na̱ cu'un vu utsuru biti.

22 A̱ ri na̱ ma̱za̱nga̱ shi,

she na̱ a̱ kuwa̱

a̱ ciɗo le ne'en.

23 A̱sula̱ o sokowo le ta̱ urevu

wi ili i na ya̱ ta̱wa̱ elime,

u ka̱nda̱ruwa̱ le ta̱

mɓa̱nga̱ suru.

24 O una̱ u na ma lyuwa ilyalya

a̱tsumola̱ngu a ɗa ma yuwusan,

agba n bula̱ ma̱nga̱ shi.

25 Ili i na ma uwwusa wovon

ko a da'watonsu mu

i cina mu ta̱.

26 N ri na asuvu nden shi

n ri na̱ wivuwun shi,

waru a̱tsuma̱lima̱ o koto shi.>>