1 <<Okolo a̱ va̱ a kuɗa ta̱,

rana va̱ to mo mokotoo,

aason a ɗa goon a buwa numu.

2 Na amayun a̱za̱ o ulamu

a̱ ka̱nda̱ruwa̱ mu ta̱,

wuma u le ili yu upan u ɗa e esu a̱ va̱.

3 A̱sula̱, vu reve,

vu te e isawaan mu.

Na̱ babu a̱ vu, zane ɗa ri lo

na e isawaan mu?

4 Ana wo o'woi a̱vu ɗa vu sokoyi

urevu diga a majiyan me le,

vaa lyawa le a̱ tsura̱

ulyuwu wa aci shi.

5 Ununa udammu u ri,

<Za na suru paalai n'utsa̱

ma̱ yi adama e ikebe,

muwun ma̱ yi n ta̱ sowo

a̱tsuma̱lima̱ na ambulu.>

6 <<A̱sula̱ a̱vu ɗa vu ka̱mba̱to numu

ili yi iroci e ekere a ama,

moo o o'wo ta̱ ili i na ama

a̱a̱ tsuwusa̱a̱n ma̱tsa̱n o urewesu.

7 Adama o usa̱n wa̱ a̱tsumola̱ngu,

esu a̱ va̱ a̱ rumba̱na̱ ta̱,

n ramba ta̱,

reve mo o'wo tsa agita.

8 Ozo o okolo a amayun

a lamba ta̱ ili i na a damma,

za na ri nu unusu shi u ta̱ a̱tsuma̱la̱ngu

e ekere aza a na e revei

wovon wa̱ A̱sula̱ shi.

9 Na̱ ne suru, za va̱ a̱ɓula̱

guza̱ ta̱ ure wa̱ yi,

aza a na waru a̱ ri cece,

ekere e le a̱ ta̱ da̱shishi ucira.

10 <<Amma gogo suru nɗu ta̱wa̱i,

i da̱shi rito ye ene!

Ko na wo o'woi ko vuma ta̱ ma̱a̱ tsura̱

za vu ugbozu a̱tsuma̱ a̱ ɗu shi.

11 Rana va̱ koto ta̱,

ifoɓi i va̱ i kacara ta̱,

hali fo ni ifoɓi yo okolo a̱ va̱.

12 N'utsa̱ n va̱ n damma ta̱

ayin a ɗa urana,

reve waru a damma,

<Ekan a yuwan ta̱ zuzu,>

amma a̱mu irumbu i ɗa me e inda.

13 M buwa nu uzuwu wo okolo shi,

u'wa u va̱ uba̱ta̱ wa̱ a̱kwa̱kwa̱ u ɗa,

uba̱ta̱ u na moo von

n da̱na̱ a nlavu a̱tsuma̱ e irumbu.

14 Uba̱ta̱ u na maa damma aason,

<A̱vu ɗa dada va̱,>

azun waru, <A̱vu ɗa mma va̱,>

ko <Za va̱ vu ka.>

15 To, a̱ te ɗa gba ili i na

n zuwayi okolo a̱ va̱?

Zane ɗa ee ene mu uba̱ta̱ u ro

u na maa zuwa okolo a̱ va̱?

16 Uzuwu wo okolo a̱ va̱ a̱ ta̱ zura̱

oɓolo na̱ a̱mu a̱ tyo a aason,

oɓolo a ɗa tse e ivuwan

a̱tsuma̱ a̱ ma̱buta̱ me iɗa!>>