1 <<N kuna̱ ta̱ na̱ wuma u va̱,

n ta̱ o uta̱a̱ mesun ma̱ va̱ a alanga eteshe,

a̱vu n yuwan adanshi

na̱ a̱tsuma̱la̱ngu.

2 N ta damma A̱sula̱,

she vu tara a̱mu

za vu unusu ɗa wan,

amma vu damma mu

unusu u na vu tsura̱a̱ numu,

ni ili i na i zuwai vu ri

o nronuloi na̱ a̱mu.

3 Cu'un va atsupu a̱ ne a ɗa va̱a̱ tsura̱

a na vaa tsutsugbusa

ili i na ekere a̱ wu a yuwain,

vu to o ucina̱ wa aza a na

aa yuwusan iwuya ɗa?

4 Cine vaɗilima̱ tsi idana ili,

ne ɗa a̱vu fo vu tsi idana?

5 A̱vu fo rana va̱ wu a̱ tu

uka̱la̱mu tsa vaɗilima̱?

Ko a'wan a̱ wu a̱ ta̱

tsa a'wan a vuma?

6 Hali na va̱a̱ pa̱luwusa̱

unusu u va̱ alanga eteshe

na va zamishi vu reve unusu u va̱?

7 Vu reve ta̱ n ri nu unusu shi,

waru vu reve ta̱ babu za na

a wawa mu e ekere a̱ wu.

8 <<Ekere a̱ wu a ɗa a ma'an numu

a̱vu waru a yuwan mu.

Agba gogo nu ucira wa̱ wu

u nda ɗa voo kototo mu.

9 Cuwan, a na vu ma'an numu no olo'o,

agba gogo vu ta̱

ka̱mba̱to mu ma̱buta̱?

10 A̱vu ɗa vu ca yi dada va̱

ucira u na u matsan numu,

a̱vu ɗa vu zuwai n kungwai

pe a̱tsuma̱ a mma va̱.

11 A̱vu ɗa vu yuwain lipu va̱,

ne etele na aruva,

a̱vu vu pupala etele'e ni inama,

reve waru vu pupala inama'a nu ukwan.

12 A̱vu ɗa vu ca numu wuma

a̱vu vu roco mu

icigi i na i tsu vadala shi,

waru adama a wi idanasa

wa̱ wu u ɗa n ri wuma.

13 Amma gogo n gura ta̱ reve,

mantsa ma nda suru

vu da̱na̱ ta̱ ni ili i ro usokowu

o okolo adama a̱ va̱.

14 Vu te e piri vee ene

ko n ta yuwan unusu,

adama vu kuɗa̱

a yuwaan mu gafura.

15 Na̱ shi a damma n yuwan ta̱ unusu,

n shi ta̱ a uwa o uta'atsu e ekere a̱ wu.

Amma a mantsa ma na n yuwain

ili isa'ani n tsu tsura̱ ica shi.

N ta̱ a̱tsuma̱la̱ngu lon,

waru wono u ɓa̱ru mu ta̱.

16 Na̱ n 'ya̱sa̱n aciya̱va̱ zuva,

vu ta bunga̱ mu tsa kamu,

waru vu ta̱ da̱shi yuwan ulinga wa asalama

a̱ tsushu'un na̱ a̱mu.

17 Vu tsu da̱shi ta̱ ama a aci a̱ va̱,

waru upan wa̱ wu a aci a̱ va̱

elime elime a ɗa wa̱a̱ 'ya̱wusa̱,

vu tsu ta̱wa̱a̱ ta̱ no oɓolo a̱soja

a̱ tsushu'un na̱ mu kuci.

18 <<Nye i zuwai vu lyawai

a matsan numu?

U shi ta la'aa mu n kuwa̱

babu na nanza ene numu!

19 Na̱ shi a damma diga

a̱ a̱a̱tsuma̱ a mma va̱

a tara mu ta̱ a̱ tyo aason,

u shi ta a la'aa mu

na̱ wuma u na n ri nda.

20 Rana va̱ ke'en ɗa a buwai shi?

Vu lyawa mu,

adama mu uwwa uyo'o

u mantsa ma na ma buwa numu.

21 Nda na̱ mantsa ke'en n ta̱ ka̱ra̱,

agba m buwa ka̱mba̱ shi,

n ta̱ ka̱ra̱ a̱ tyo e iɗa yi irumbu i pici,

uba̱ta̱ u na babu ɗe ekan,

22 iɗa i na i ri ni irumbu lon,

iɗa i na i ri nu ululu nu utogbolyuwu,

uba̱ta̱ u na ekan fo aciya̱yi irumbu i ɗa.>>