1 Ɗaɗa Ayuba usuyi u dammai,

2 <<Ee, n reve ta̱ ɗe ni ili ya nda suru,

amma cine tsu ɗa vuma a̱a̱ da̱na̱

na̱ a̱ɓula̱ a̱ ma̱ka̱ka̱n ma̱ A̱sula̱?

3 Na̱ vuma 'ya̱wa̱ na̱ A̱sula̱

o ukobu wu uge'etosu,

u ta gura o o'wo A̱sula̱ a yuwan yi

yeci ukpaku kupa (1,000),

aza a na vuma'a waa gura

usu ko za ta̱ shi.

4 A̱sula̱ za vu ugbozu ɗa,

waru u ta̱ nu ucira lon.

Zane ɗa a gura yuwan

mawasan na̱ a̱yi,

a̱vu u tsura̱ ulyuwu wa aci?

5 U tsu tawa ta̱ nsasan m gbagbain

babu e le urevu,

a̱vu u kototo le a̱tsuma̱ o upan wa̱ yi.

6 A̱sula̱ a̱ tsu jinga̱ɗa̱ ta̱ uvaɗi

diga uba̱ta̱ wu nden ma̱ yi,

hali atsura a̱ yi e je'en!

7 A̱yi ɗa goon wa gura putsaa

urana a̱ ɓa̱tsa̱,

waru u putsaa italyo'o a ca ekan na ayin.

8 Babu za na kambai A̱sula̱

a na wa̱ ba̱ruwa̱ zuva va zuva,

za na waru tsu dadasa

ikeɗu i mala u voton le.

9 A̱yi ɗa u yuwain oɓolo

italyo'o ya zuva,

aza a na a̱ ri na ala,

meten na̱ musa̱n na̱ mozomu

na̱ moton na̱ muwun ma̱ yi,

no oɓolo i italyo'o yu uyagi.

10 U ri n yuwan tsu reve a̱ba̱jini a̱ba̱jini

e ili i na waa yuwusan shi.

Linga va asalama a̱ yi

a̱ ri nu ukosu shi.

11 <<Agba a̱ yi ɗa nda A̱sula̱ a̱ ka̱ra̱

numu zuzu agba me enei shi,

waru u lyuwa ta̱ elime na̱ mmalu

suru na̱ ne n gura enei shi.

12 Nna̱ u tara ili i na u cigai nu ucira,

zane ɗa ri lo na a putsa yi?

Za lo na ece yi u damma,

<Nye ɗa va yuwusan?>

13 <<A̱sula̱ aa vadaluwa

diga o upan wa̱ yi shi,

u rukutsa̱ n'yuwatan ma̱ yi,

aza a na a kambusa

oododo a̱ mini a na a̱ tsu ɗe Rahapu,

za na 'ya̱sa̱a̱n niyi aci.

14 To, gogo cine ma yuwan

n tsura̱ idanshi i na

ma̱a̱ usu wa̱ A̱sula̱?

15 Ko na wo o'woi n ri nu unusu shi,

na̱ ne suru ma gura usu yi shi.

A̱mu n ta yuwan ipati yi isa'ani

diga uba̱ta̱ wu za vu uge'etosu u va̱.

16 Ko na̱ shi n ɗeyi u ta̱wa̱

o ukobu wu uge'etosu,

ko na̱ shi gba u ta̱wa̱,

n cuwa a na wa uwwa

adanshi a̱ va̱ shi.

17 Adama a na u ga̱la̱ mu ta̱

nu upepu wu ucira,

babu unusu reve

u da̱shi uwato mu usa̱n.

18 Ko ke'en u da̱shi lyawa mu

n lapa upepu shi,

na̱ ne suru u da̱shi mu ta̱ atakaci.

19 Nna adama a ɗa o ucira u ɗa,

zane ɗa a kurato ucira na̱ A̱sula̱!

Nna adama a ɗa adanshi a ɗa,

zane ɗa a gura zuwai u ta̱wa̱

o ukobu wu uge'etosu?

20 Ko na wo o'woi n ri nu unusu shi,

adanshi o una̱ u va̱

a ta kapaa mu a addama.

Ko na wo o'woi n ri nu unusu shi,

a̱yi ɗa wa gura zuwa mu n yuwan unusu.

21 A̱mu za vu unusu ɗa shi,

agba n ri udamu

ni ili i na yaa cina mu shi,

n kuna̱ ta̱ na̱ wuma u nda'a.

22 Ili i damaton mu shi!

A̱yi ɗa i zuwai n dammai,

<Na̱ za vu unusu

na̱ za vi iwuya suru nle,

u tsu kototo le ta̱.>

23 Mantsa ma na vuma babu

unusu kuwa̱i nu uta̱,

A̱sula̱ a̱ tsu zo'oso ta̱.

24 A̱sula̱ a ca ta̱ uvaɗi

e ekere aza awuya,

reve u ɓa̱ru esu

a̱za̱ o uge'etosu suru.

Na̱ shi A̱sula̱ a ɗa a yuwain ne shi,

to, zane ɗa yuwain ne?

25 <<Rana va̱ ta̱ ma̱ka̱ra̱ ni ilaɗi,

ula'awu na̱ vuma na tsu suma,

ilaɗi ɗa a yuwusan,

isa'ani i ro yi pe a̱tsuma̱ e le shi.

26 Wuma u va̱ u ta̱ ka̱ra̱sa̱

cine vu revei wantsun u na u la'ai ilaɗi,

u jika̱ ta̱ lon, she damma cine

a̱a̱kuru a̱ tsu zura̱ u reme ili.

27 Nna̱ n damma,

<N te e icina na̱ mesun ma̱ va̱,

reve n tawa urewesu wa̱ a̱tsumola̱ngu u va̱,

a̱vu n zo'oso,>

28 hali na ana'an a̱tsuma̱lima̱ a̱ va̱

a ta casu mu wovon,

adama a na n reve ta̱

va tara mu za babu unusu shi.

29 Gogo a na wo o'woi ɗe A̱sula̱

a tara numu za vu unusu,

to, majiyan me pere

ma̱ ne ma̱a̱ 'ya̱wa̱ mayan waru?

30 Babu a̱zuma̱'a̱ a na a gura

tawato nusu va̱.

31 A̱sula̱ a vari mu ta̱ edemu,

hali a̱tugu a̱ va̱ fo

e inda mu idaba.

32 A̱ shi a damma A̱sula̱ vuma ɗa,

n shi ta̱ ka̱mbuwa̱ yi na adanshi,

she shi tsu 'ya̱wa̱ o ukobu wu uge'etosu

a yuwaan tsu uge'etosu.

33 Amma gogo a̱ yi ɗa nda babu

za na a uwa e memmere ma̱ tsu,

u yuwaan tsu uge'etosu a̱tsu ra.

34 A̱sula̱, vu lyawa a casu mu a̱tsuma̱lima̱!

Vu lyawa a casu mu wovon.

35 N shi ta yuwan adanshi

babu uwwa wovon wa̱ yi.

Amma a̱tsuma̱ a na

n ri gogo maa gura shi.>>