1 Reve Ayuba usu A̱sulazuva u damma,

2 <<N reve ta̱ vu ta gura yuwan ili biti,

ili i na vu yuwain majiyan ma na va yuwan,

aa gura putsaa wu shi.

3 A̱vu ɗa vee ece numu vu dammai,

<Zane ɗa a̱a̱ ja̱mba̱ra̱sa̱ a̱sa̱la̱

a̱tsuma̱ o ure wa adanshi a babu urevu?>

A̱mu gba, na amayun n yuwan ta̱ adanshi

e ili i na n revei shi.

Ili i na i ri ya asalama

ili i na n revei shi.

4 A̱vu ɗa vu damma numu,

<Polo atsuvu gogo,

n ta yuwan adanshi,

n ta yuwan wu yeci,

a̱vu vu usu mu.>

5 Shi ta̱ ɗe mu uwwa alabari a̱ wu,

amma gogo esu a̱ va̱ ene wu ta̱.

6 Adama o ndolo n ta a uwwusa wono

wi ili i na n dammai ɗe suru,

n vadala ta̱ oɓolo nu utsusun

u ma̱buta̱ no okomo aaci a̱ va̱.>>

7 Ana A̱sulazuva o kotoi a dansaa Ayuba adanshi a nda, a̱vu u damma Elifa vuma va Teman, <<N to o upan na̱ a̱vu, na̱ n'utsa̱ n re ma̱ wu, adama a na i yuwan adanshi e mejege a aci a̱ va̱, cine aagbashi a̱ va̱ Ayuba yuwain shi. 8 Gogo, tarai ogono e inan e cindere na̱ a̱giri'i e cindere, a̱vu i 'ya̱wa̱a̱ aagbashi a̱ va̱ Ayuba, i ca kucci vu ukula̱tosu adama a aciya̱ɗu. Ayuba ta yuwan avasa adama a̱ ɗu, a̱vu a̱mu n usu avasa a̱ yi, adama she n ge'eto ɗu o una̱ u tsulo tsa̱ ɗu wan. Adama a na i yuwan adanshi e mejege a aci a̱ va̱ cine aagbashi a̱ va̱ Ayuba yuwain shi.>> 9 A̱vu Elifa vuma va Teman na̱ Bilida vuma va Shuhu na̱ Zofa vuma va Na'ama a̱ ka̱ra̱ a yuwan ili i na A̱sulazuva a damma nle, reve A̱sulazuva a̱ usu avasa a Ayuba.

10 Ana Ayuba yuwayin n'utsa̱ ma̱ yi avasa, a̱vu A̱sulazuva a̱ ka̱mbuwa̱a̱ Ayuba nu utsuru wa̱ yi. Reve u ca yi ili i na u shi na̱ a̱yi toto ure. 11 Reve muwun ma̱ a̱na̱wu ma̱ yi ma̱ esheli no olobo suru na aza a na a̱ shi e reve niyi ɗe nu ufaru suru a̱ ta̱wa̱ a lyuwa ilyalya oɓolo na̱ a̱yi o u'wa wa̱ yi. Reve e tete yi ni ili i na i shi i farai na̱ yi, reve fo a ca yi adanshi, adama a̱ a̱tsuma̱lima̱ a na A̱sulazuva a̱ ta̱wa̱a̱ niyi. Reve za suru ca Ayuba ikebe na̱ makawani ma zinariya.

12 Ne ɗa A̱sulazuva a zuwaa yi ukosu wa Ayuba aba'un hali u la'a za vu ufaru. U tsura̱ ta̱ ikyon ukpakukupa nu ukpakukupa una̱shi (14,000) na arakumi ukpakukupa uta̱li (6,000) ni inan yi iluma ukpakukupa ure (2,000) na̱ a̱na̱wun o nloli ukpakukupa (1,000). 13 Reve waru u matsan olobo e cindere ne esheli a ta'atsu. 14 A̱vu u ca usheli wu ufaru wa̱ yi aala Jemima, wa̱ ire Keziya, wa ta'atsu Keren Hafu. 15 A̱tsuma̱ e iɗa'a suru a̱ tsura̱ a̱ma̱ci a sa'ani a na a rawai esheli a Ayuba ulobonu shi. Reve dada le ca le agadu oɓolo na̱ muwun ma̱ a̱na̱wu mo olobo n le.

16 Ayuba yuwisan ta̱ a'wan ukpaku na amunga (140), cina ili ya nda i koto, we ene ta̱ olobo a̱ yi na̱ muwun n tsukaya ma̱ yi hali a̱ tyo mantsa ma̱ na̱shi. 17 Reve Ayuba kuwa̱ cina u kutsa lon.