1 Reve Ayuba usu u damma,

2 <<Na̱ a̱ shi a damma,

a̱ ta̱ kunzu a̱tsuma̱lima̱ a̱ va̱,

waru a damma a̱ ta̱ kunzu

a̱tsuma̱la̱ngu a̱ va̱ a makundatsu!

3 A ta gura reve a na u la'ai

wuyun wu uɗolu ume,

a̱ yi ɗa i zuwai

n yuwain adanshi go'o.

4 A̱sulazuva Mogono me Ili Suru

a tawan mu ta̱

ni iliya i tsukono,

okolo a̱ va̱ o sowo ta̱

tsukono tsi iliya'a,

A̱sula̱ a̱ ka̱nda̱ruwa̱ mu ta̱

ni ili i wovon.

5 Mololi mo una ma̱ tsu shon ta̱

mantsa ma na u ri na anlya o una̱ wa̱ yi?

Ko nan tsu shon ta̱ mantsa ma na

u ri o utamu wa anlya?

6 A ta lyuwa ilyalya

i babu uyo'o babu akpaɗi?

Ko mini ma̱ uri mo ookowo

ma̱ tsu da̱na̱ ta̱ uyo'o?

7 Mu uwwa maluwa ma na

ma̱a̱ ju'wa̱n cu'un vi ilyalya'a shi,

a̱ ta̱ tsi ilyalya i na

ya zuwa mu tsushamu.>>

8 <<Na̱ shi a̱ usu ipati i va̱,

waru A̱sula̱ a ca mu ili i na n cigai,

9 na̱ shi A̱sula̱ a̱ usu u kototo mu,

ko shi wu ba̱ruwa̱ ukere wa̱ yi

reve wu una mu,

10 n shi ta̱ a̱ tsura̱ ucasu wa adanshi,

n yuwan ma̱za̱nga̱

nu usuɗuwu u na n ri pe suru,

adama a na n reve ta̱

n wasan adanshi a Za va Akiza shi.

11 Ucira u ne ɗa n ri na̱ yi,

hali na mo puro?

Iliyinkapa i ne ɗa ma̱a̱ tsura̱,

hali a na maa yuwan ankuri?

12 Ucira u va̱, ucira wa aatali ɗa?

Ko a yuwan ta̱ lipu va̱ na̱ rumushili?

13 Amayun, m buwa ni

ikambishi i ro shi,

a tawa ta̱ ucira u va̱ suru.

14 <<Vuma na ri a̱ a̱tsuma̱lima̱,

ulobono ta̱ n'utsa̱ ma̱ yi

n yuwaan yi isa'ani.

Ko na̱ shi u buwa a uwwusa wovon

u Mogono me Ili Suru shi.

15 Amma a̱ ɗu n'utsa̱ n va̱

aza a yipalishi a ɗa

tsu uɗolu u na u tsu ta̱wa̱

na̱ mini na̱ lyushi,

tsa mala ma na ma tsu shiwan tapu na̱ mini

reve wu kwan ni irana.

16 I ta̱ tsu uɗolu u na

atayan a̱bunda̱ a̱ kpoto yi,

tsu uɗolu u na u tsu ta̱wa̱ lon

adama a wujerushe wa atayan'a.

17 Amma ni irana, reve e 'yewe

nu usuɗuwu u yuwan

reve a̱ puwa̱a̱n suru.

18 Aza a mmalu a arakumi ugeru

a̱ tsu puwa̱a̱n ta̱ o ure

adama e izami i mini,

a̱ da̱na̱ a mmalu a̱tsumona

hali a̱ kuwa̱.

19 Aza a mmalu ma arakumi

diga a Tema a zami ta̱ mini,

reve aza a mmalu diga a Sheba

a zuwa okolo a na a̱ tsura̱ mini.

20 Wono u reme le ta̱

adama a na a zuwa ta̱

okolo a na a̱ tsura̱ mini,

amma a na a rawai o uɗolu'u,

reve uzuwu wo okolo e le a kuɗa.

21 Gogo a̱ɗu yo o'wo ta̱

tsu ɗolu nda e ekere a̱ va̱,

ana ye enei a̱tsuma̱lima̱ a na acina numu,

reve i puwa̱a̱n adama o wovon.

22 A̱mu m pati ɗu ta̱,

<I ca mu une'e ɗa?>

Ko, n damma ɗu ta̱ i ca

utowusu wu una̱ adama a̱ va̱?

23 Ko n damma ɗu ta̱ i wawa mu

diga e ekere a n'yuwatan n va̱?

Ko n damma ɗu ta̱ i papa mu

diga e ekere aza a na

a̱ tse ene iliyali shi?

24 <<To, gogo she i rito mu,

a̱mu n rungwa̱ kpen.

I zuwa mu n reve

cu'un vu unusu u na n yuwain.

25 U ta gura o'wo

adanshi a amayun a̱ ɗu

o rono mu zuzu,

amma tsuɓari tsa̱ ɗu,

ulapulu u ne ɗa wa yuwan?

26 I ciga ta̱ i lapula adanshi

a na n dammai?

Nye i zuwai i tarai adanshi

a za na o uta̱yi

okolo tsu upepu?

27 A̱ɗu i ta gura

mazuwa ma agita

a aci a mkpa'an,

waru i ta gura wina n'utsa̱ nɗu.

28 <<Amma gogo,

ka̱lyuwa̱i urewesu u va̱ ulobonu,

ma yuwan epen elime a̱ ɗu shi.

29 Isawain ne'e!

She i ge'eto mu a̱tsuma̱

o ure wu ulambu wa̱ a̱ɓula̱ wan,

Ee, isawain ne'e!

Ka̱lyuwa̱i, mi isawaan ta̱ amayun a̱ va̱!

30 Ulambu wa amayun

u ta̱ pe o una̱ u va̱?

Maa gura kakasa amayun

ne epen shi ɗa?>>