1 <<Wuma wu vaɗilima̱ a̱tsuma̱ o uvaɗi u nda

tsa tsugbashi tsa a ɗa,

rana wuma le ta̱

tsa̱ nden mu za zamalinga.

2 Tsa aagbashi a na a zama

ululu wivuwan,

ko tsa za zamalinga na

a pura iliyinkapa ya̱ yi.

3 Ne ɗa woto a cina woto

n ri o ulinga we pere,

ayin suru a̱tsuma̱la̱ngu a ɗa

u tsu ta̱wa̱a̱ mu.

4 A mantsa ma na n voyin

adama n lantsa,

reve n damma,

<Mantsa ma̱ ne ma ɗa ma juwan?>

A̱vu a'yi'in a̱a̱ da̱shi jima,

reve n da̱na̱ pe nven

e igandalu hali usana u tawa.

5 Azun a̱ ɓa̱ru ta̱ lipu va̱,

oboto a̱ ɓa̱ru ta̱ lipu va̱ suru,

ukwan u lipu u va̱ u monzo ta̱,

reve u ka̱ra̱ o moco ma̱ mini.>>

6 <<Rana va̱ ka̱ra̱ ta̱

babu uzuwu wo okolo,

a̱ ka̱ra̱ ta̱ babu usa̱n

tsa̱ a̱ a̱punda̱ o uɗava

o ukere wu guri.

7 A̱sula̱, vu cuwan a na

wuma u va̱ tsu upepu ɗa goon,

esu a̱ va̱ a̱a̱ da̱shi ene isa'ani shi.

8 A̱vu za na eneshe mu,

va̱a̱ da̱shi ene mu shi,

a mantsa ma na esu a̱ wu

a̱ ri e izami i va̱,

e ene mu shi.

9 Tsa̱ eleshe a na a̱ tsu

bete'we reve u puwa̱a̱n,

ne ɗa za na zura̱i suru a̱ tyo

uba̱ta̱ wu nden ma̱ a̱kwa̱kwa̱

wa̱a̱ da̱shi ka̱mba̱ shi.

10 Agba wa̱a̱ da̱shi ka̱mba̱

o u'wa wa̱ yi shi,

waru uba̱ta̱ u na u yuwain wuma wa̱ yi

a̱ ta̱ e icina na̱ yi.

11 <<O'o a̱mu ma̱ rungwa̱ kpen shi,

n ta yuwan adanshi

a̱tsuma̱ a̱tsumola̱ngu a̱ va̱,

ko shi a 'yuwan a ciga

n yuwan adanshi.

12 <<A̱sula̱, nye i zuwai

vu zuwaa numu esu,

vu ta majiyan ma na

a̱mu oododo a̱ mini a ɗa?

13 N von ta̱ a̱ n'vewete n va̱

tsura̱ mi ivuwan,

e izami yi ikambishi

adama a̱tsuma̱lima̱ a na mo sowuso.

14 Vu dada'waton mu ta̱ na alavu,

a̱vu vu ca mu wovon na alavu alavu,

15 hali u shi ta a la'a

a damma o kpoko mu,

u shi ta a la'aa mu n kuwa̱

na̱ wuma wa̱ a̱tsuma̱lima̱ a nda.

16 Mu uta̱a̱ ta̱ okolo,

n kuna̱ ta̱ na̱ wuma.

Vu kasa na̱ mu,

wuma u va̱ u buwa nu urana shi.

17 <<A̱sula̱, nye ɗa

vaɗilima̱ ri e ekere a̱ wu

hali na vu ka̱mbuwa̱i ugbozu

wa̱ wu ya̱'a̱ yi tsunda?

18 Vu tsu ka̱lyuwusa̱i ta̱ usana suru,

waru vu tsu lyungwa̱i ta̱ mantsa suru.

19 Vaa tawa esu a̱ wu

diga ya̱'a̱ va̱ a mantsa wa'a,

adama a na ma̱ tsura̱

n lapa upepu shi?

20 Ko na̱ n yuwan unusu,

ete ɗa i mini ya̱ wu,

a̱vu na va zuwusa esu

e ekere a vaɗilima̱?

Nye i zuwai vu ka̱mbuwa̱

numu ili i maza ya̱ wu?

Ko a̱mu itana i ro

yu ume i ɗa e ekere a̱ wu?

21 Vaa gura yuwaan mu

gafura vu nusu va̱ shi?

Vaa tawa urewesu

e ekere e iwuya i na n yuwain shi?

Babu ujimu n ta̱ kuwa̱

n ka̱mba̱ ma̱buta̱,

mantsa ma na vu zami numu

va̱a̱ tsura̱ mu shi.>>