1 Reve Bilida vuma va̱ Shuha usu u damma,

2 <<Ayuba, hali mantsa ma̱ ne

vaa lyawa mayan ma a adanshi?

Na̱ shi a damma vu to poloo tsu atsuvu,

tsu shi ta̱ a yuwan adanshi na̱ a̱vu.

3 Adama a̱ nye vaa tarasa tsu tsi iliyamunga?

Vu ta majiyan a̱tsu olo a ɗa?

4 A̱vu ɗa vaa amatoyin aciya̱wu

a̱tsuma̱ o upan wa̱ wu,

waru uvaɗi u to koto adama a̱ wu?

Ko a ta tawa atali adama a̱ wu?

5 <<A̱ ta̱ kimusa̱

ekan a za vi iwuya,

elentsu a akina a̱ yi

a̱ da̱shi ikana shi.

6 Ekan o u'wa wa̱ yi

u to o'wo irumbu.

Fitila na ri lo

uba̱ta̱'a̱ u ta̱ kima̱.

7 A jiba ta̱ ucira

wu mmalu wu za vi iwuya,

a̱sa̱la̱ a̱ yi o una yi ta̱.

8 Ana a za vi iwuya a tsu tarai ta̱

a̱ tyo a̱tsuma̱ e igolo,

za vi iwuya tsu riya̱ ta̱

a̱tsuma̱ a̱ a̱ka̱ri a na azuyi.

9 Igolo i tsu reme ta̱ ana a̱yi,

maza ma̱ tsu reme ta̱ ana a̱yi kpakpa.

10 A̱ ciɗo wa̱ yi ta̱ yakuru e iɗa,

azuwaa yi ta̱ maza o ure.

11 Ili i wovon i ta̱ uka̱nda̱ruwu na̱ yi,

uba̱ta̱ u na u saɓai biti o to tono yi.

12 Ambulu o koto ta̱ ucira wa̱ yi,

addama a ta pura yi u ta̱ɗa̱tsa̱ u riya̱.

13 Ubanakun u na u ka̱ra̱la̱i wira̱

u tama ta̱ ukwan u lipu va̱ yi,

a zuwusa pasu lipu va̱ yi shama.

14 Na u da̱na̱i a̱ nden ma alafiya a̱ yi,

reve addama a̱ kpa̱to yi,

hali a tara yi a̱ tyo

uba̱ta̱ u mogono mo ukwa̱.

15 Babu za na a gura da̱nu

o u'wa wa̱ yi,

adama a na a baza ta̱

akina a̱ farinwuta,

uba̱ta̱ wu nden ma̱ yi.

16 Aralu a̱ yi a̱ kuwa̱ ta̱,

reve eten a̱ yi a kpanla.

17 Ucuwusan na̱ a̱yi a̱tsuma̱

o uvaɗi u koto ta̱,

e icina ta̱ na ala a̱ yi

a̱tsuma̱ o uvaɗi.

18 A̱ gba̱ra̱ yi ta̱ diga ekan

a̱ tyo e irumbu,

reve o lo yi a̱tsuma̱

o uvaɗi wa aza a wuma.

19 U ri na̱ muwun ko limatan

a̱tsuma̱ a ama a̱ yi shi,

ko za la'a diga uba̱ta̱ u na

u shi na̱ nden shi.

20 Adama o ununa ukosu wa̱ yi wo o'woi,

a ama diga a̱livu a lamba ta̱

ili i na a damma,

waru a ama a asana

wovon u reme le ta̱.

21 Amayun ne ɗa ukosu wu

za vu ulambu u wovon wa̱ A̱sula̱ a̱ ri,

oɓolo na̱ nda̱na̱ta̱ ma za na revei A̱sula̱ shi.>>