1 Urana u ro nlingata ma̱ A̱sula̱ n ta̱wisa̱ ta̱ adama o roco aciyele uba̱ta̱ wa̱ A̱sulazuva, reve Mekerenkesu fo ma̱ ta̱wa̱ oɓolo ne le. 2 Reve A̱sulazuva e ece yi, <<A̱ te gba vu uta̱i?>>

Reve u usu yi, <<N te e igaru, na̱ n 'ya̱wi na̱ n ka̱mbi, e igaru a̱tsuma̱ o uvaɗi tsura̱ mee ene ili i na yaa farasa.>>

3 Reve A̱sulazuva e ece yi, <<Ko vu gura ta̱ idana na aagbashi a̱ va̱ Ayuba? Vuma va̱ a̱ɓula̱ lo, no o soɗuwoo ma̱tsa̱n tsa̱ yi a̱tsuma̱ o uvaɗi shi. U ta yuwusaan mu a̱ga̱nda̱, waru u tu nu uvotowun wo okolo, agba u 'yuwan ta̱ cu'un vi iwuya biti. A̱vu ɗa vu zuwa numu n ca wu una̱ u na va̱a̱ riya̱a̱ yi babu ufaru. Amma na̱ ne suru, Ayuba da'wan shi, u ta̱ pe a̱tsuma̱ amayun a̱ yi cine u ri.>>

4 A̱vu Mekerenkesu ma̱ usu u damma, <<Vuma ta gura ca ili i na u ri na̱ a̱yi suru adama u wawa wuma wa̱ yi. 5 Gogo na̱ vu shi ta̱ a̱ ju'wa̱n gbaga lipu va̱ yi, u shi ta̱ o uta̱ alanga eteshe wi isula wu!>>

6 Reve A̱sulazuva a damma yi, <<U yuwan ta̱, u ta̱ ekere a̱ wu, amma vu lyawai wuma.>>

7 Ɗaɗa Mekerenkesu ma lyawai uba̱ta̱ wa̱ A̱sulazuva, a̱vu u ka̱ra̱ u faba Ayuba na amicin diga a aaci a̱ tyo a ana a̱ yi. 8 A̱vu Ayuba uta̱ u da̱nu o okomo, reve u tara aakatayimba, a̱vu u ka̱ra̱ a kavurusa lipu va̱ yi.

9 Ɗaɗa ka va̱ yi tsu damma yi, <<Hali n gogo vu buwa ta̱ pe a̱tsuma̱ a̱ɓula̱ a̱ wu'u? Nye i zuwai vaa yuwaan A̱sula̱ unusu tsa̱ra̱ vu kuwa̱ shi?>>

10 Reve Ayuba usu yi u damma, <<Vu ta adanshi ana ulo wu ka, cine tsa ɗa tsa̱ ushi isa'ani diga o ukere wa̱ A̱sula̱, reve tsu kuɗa̱ na tsa̱ ushi addama diga e ekere a̱ yi?>> A̱tsuma̱ e ili ya̱ o ndolo suru, Ayuba yuwan unusu a̱tsuma̱ adanshi a̱ yi shi.

11 A mantsa ma na n'utsa̱ n ta'atsu a̱tsuma̱ a̱ n'utsa̱ ma Ayuba, Elifa diga lyuci gbain va Teman na̱ Bilida diga e iɗa ya Shuwa, na̱ Zofa diga e iɗa ya Na'ama, a uwwai alabari a̱ cu'un va̱ a̱tsuma̱lima̱ a na a cinai Ayuba, reve e reme ure adama a̱ 'ya̱wa̱ ene yi, waru a ca yi adanshi. 12 Ana a cinkaya niyi a gura reve yi shi, ana a̱ ta̱wa̱ e revei a na a̱ yi ɗa na̱ a̱ca̱pa̱, reve e reme mesun nu uɗyo wu ucira. Reve a kakara a̱tugu le adama o a̱tsumola̱ngu, a̱vu e kene ma̱buta̱ a̱ tsun aaci e le. 13 Reve a̱ da̱nu e iɗa oɓolo na̱ yi hali rana cindere na ayin e cindere. Agba ko za gura yuwan adanshi na̱ yi shi, adama a na ene ta̱ cu'un va̱ a̱tsuma̱lima̱ o usa̱n u na wo sowuso.