1 <<Adama o ndolo okolo a̱ va̱ a tsu lapa ta̱,

ngashi u taɓa diga uba̱ta̱ u na u ri.

2 Poloi atsuvu, yu uwwa

uɗyo u tsuɓari tsa̱ yi,

na̱ ma̱gugwa̱ ma na

moo o utusa̱ diga o una̱ wa̱ yi.

3 U tsu lyawa ta̱ imaɗatsu

za̱la̱ va zuva suru,

reve wi ikana pasu vu uvaɗi suru.

4 No o koto imaɗatsu'u

a tsu uwwa ta̱ uɗyo u ma̱gugwa̱ ma̱ yi,

u tsu yuwan ta̱ a̱giri'a̱

nu uɗyo u tsugbain tsa̱ a̱ yi,

ko na wo o'woi a uwwai uɗyo wa̱ yi

u lyawa a̱giri'a̱'a̱ shi.

5 Uɗyo wa̱ a̱giri'a̱ wa̱ A̱sula̱

ili ya asalama i ɗa,

u ta yuwusan a̱ba̱jini a̱ba̱jini e ili yu ucira

i na tsaa gura reve shi.

6 U tsu damma ta̱ atayan,

<Oco o uvaɗi,>

yiji'in waru, <Ocoi nu ucira.>

7 U tsi isawaton ta̱ ulinga u vuma biti,

adama ama suru e reve nu ulinga wa̱ yi.

8 Inama yu una i tsu uwa ta̱

ba̱ta̱ vu nven n le,

a̱ da̱nu pe ili i le.

9 Lipa̱ tsu uta̱ ta̱

uba̱ta̱ u na u ri,

uta̱nu waru diga a̱tsuma̱

o upepu u na waa lapusa.

10 Wivuwun wa̱ A̱sula̱

tsu ta̱wa̱a̱ ta̱ na atayan,

reve u zuwa a̱ba̱jini a̱ba̱jini

a̱ mini a̱ kutsa̱ nu uta̱.

11 U tsu shiton ta̱ eleshe a̱ da̱n na̱ mini,

eleshe a̱ tsu bete'we ta̱ imaɗatsu ya̱ yi.

12 A̱ tsu da̱na̱ ta̱ a̱ ka̱nda̱ruwusa̱

ununa u foɓoi,

adama o shiton

ili i na u zuwa nle a yuwan

o urewesu wu uvaɗi.

13 U tsu zuwa le ta̱ a̱ ta̱wa̱

ni iro'i a̱tsuma̱ o uvaɗi,

ko adama o uge'etosu,

ko adama iɗa ya̱ yi i lyuwa elime,

ko adama o roco icigi ya̱ yi i na i tsu vadala shi.

14 <<Uwwa nda Ayuba,

isawan vu yuwan majiyan

ma linga va asalama va̱ A̱sula̱!

15 Vu reve ta̱ cine A̱sula̱

a tsu yuwan u ca eleshe udammu,

u zuwa imaɗatsu ye eleshe a̱ yi e ikana?

16 Vu reve ta̱ cine eleshe a̱ ri usa̱ga̱da̱wu?

Linga va asalama va̱ A̱sula̱ ɗa,

na ri tapu nu urevu.

17 Vu reve ta̱ ili i na i tsu zuwa wu

vu uwwa usuɗuwu,

mantsa ma na upepu

wu uyagi wa lapusa?

18 Vu ta gura buba̱ruwa̱

agalaci a zuva

cine a̱yi u yuwain,

hali a yuwan ugbamu

cine vu revei ma̱suka̱ci

ma̱ rumushili na a̱ zuɗa̱i?

19 Roco tsu ili i na tsaa damma yi,

tsaa gura ta̱wa̱a̱ na adanshi a̱ tsu shi,

adama o ulambu wu urevu u tsu.

20 Zane ɗa damma niyi ɗe

na n cigai n yuwan adanshi?

Zane ɗa a ciga o kototo yi wuma?

21 <<Gogo ama aa gura

ka̱lyuwa̱ ekan o urana

mantsa ma na upepu

u tawai ululu we eleshe shi,

adama a̱bunda̱ ekan a na a̱ ri zuva.

22 Diga upasu wu ugana

ekan o ro o uta̱ ta̱

tsa zinariya na ri na asalama,

A̱sula̱ a̱ ta̱ wotowu

na̱ tsugbain tsa̱ wovon.

23 Mogono me ili Suru ma la'a ta̱

ucira u na tsaa gura reve yi,

u ta̱ na̱ tsugbain nu ucira na amayun,

ni isa'ani ya̱ a̱bunda̱

waru u tsu paala za shi.

24 Adama o ndolo a ɗa

ama a uwwusa wovon wa̱ yi,

u dama na aza a na a tarai aciyele

a̱za̱ o urevu a ɗa shi.>>