1 Vu ta gura reme a̱a̱dodo Leviyatan✝

na̱ gon na a̱ tsu reme magula?

Ko vu ta gura nla̱ elentsu a̱ yi na amunga?

2 Vu ta gura zuwa amunga a̱ vunu va̱ yi?

Ko vu ba̱ma̱ yagu ya̱ yi na̱ gon?

3 U ta̱ da̱na̱ a patishi wu

adama vee ene iliyali ya̱ yi?

U ta yuwaan wu una̱ wu uyo'o?

4 U ta yuwan akucunu na̱ a̱vu,

ana wo o'wo aagbashi a̱ wu hali hali?

5 Vu ta gura yuwan uro na̱ a̱yi

cine a tsu yuwan na̱ manunu?

Ko vu ta̱ nla̱ yi wo o'wo

ili yu uro ya agbashi esheli a̱ wu?

6 Aza a atsulu na awina

a ta yuwan uciniki wa̱ yi?

Ko a̱ ta̱ ne'eshen yi uba̱ta̱

wa aza atsulu na awina?

7 Vu ta gura buba̱ma̱ ukwan wa̱ yi

ni ibata i mereme ma magula?

Ko vu ba̱ma̱ aaci a̱ yi ni ibata?

8 Na̱ vu reme yi nu ukere,

u ta suɗuwa wu,

agba va̱a̱ da̱shi shi!

9 A̱yi ɗa nda mpolo

adama e reme yi ulinga we pere u ɗa,

yeni ya̱ yi fo ili i wovon i ɗa.

10 Babu vuma na ri no okolo

a na a gura zami yi nla̱ngi.

Waru zane ɗa rawai

na waa yuwan nronuloi na̱ yi?

11 Zane ɗa o tono mu utan

hali na wo o'woi

ko n 'yuwan n ciga n tsupa yi?

Ili i na i ri o uvaɗi suru za va̱ ɗa.

12 <<Ma̱a̱ bula̱ adanshi a pasu lipu va̱ yi shi,

ko ucira wa̱ yi

ko uruma u sa'ani u lipu va̱ yi shi.

13 Zane ɗa aa gura foɗo yi

utugu u gbain wa̱ yi?

Zane ɗa aa gura sapa a̱ka̱ɓa̱

a na e geshei lipu va̱ yi?

14 Zane ri nu ucira u na

waa gura kpa̱tu'wa̱ una̱ wa̱ yi?

Adama a na anga a̱ yi

ili i wovon i ɗa.

15 A̱ka̱ɓa̱ o ucina̱ a̱ yi

a̱ tu ugeru tsa̱ a̱ra̱ga̱,

ukaɓulai u ɗa a̱ ri

she damma a sura le ta̱.

16 A̱ ta̱ zuzu zuzu lon,

hali na upepu u tsu gura uwulai

e memere me le shi.

17 A̱ tu ukaɓulai,

a gura kakasa le shi.

18 Yidisha ya̱ yi i tsu uta̱a̱ ta̱ akina,

esu a̱ yi a̱ ta̱ e ikanasa

she damma matawaa mo usana.

19 Akina a̱ ta̱ o utusa̱ o una̱ wa̱ yi,

waru yitaɗi ya akina

i ta a taɗuwusa o utusa̱.

20 Mikyon n to o utusa̱

diga a̱ vunu va̱ yi,

she damma upondo a̱ ma̱puna̱

zuva va akina.

21 Wivuwun wa̱ yi u tsu dalato ta̱ akinkina,

waru elentsu a akina

a̱ ta̱ o utusa̱ o una̱ wa̱ yi.

22 A̱ yinlu i ɗa ucira wa̱ yi u ri,

za na ene niyi suru

u ta da'wan na̱ meje'en ma̱ lipu.

23 Inama i lipu ya̱ yi uɓoluloi u ɗa a̱ ri,

ukaɓulai waru babu ilama.

24 Ma̱ka̱ka̱n ma̱ yi ma̱ tu ugbamu tsa a aatali,

ugbamu wa̱ yi u tu tsu utali u yira.

25 Mantsa ma na u 'yoyin mishin,

a̱za̱ o ucira a tsu uwwa ta̱ wovon,

a̱ da̱na̱ a ngamulai va̱ni le.

26 Ko na̱ shi a gasa yi na̱ matsun me pe'eni,

ko shi a sapa yi ni ibata,

ko ni ili i matawan,

ko shi na̱ liya,

a yuwaan yi ili shi.

27 U tsu ka̱mbuwa̱ ta̱

rumu vaa damma a̱'yuwa̱,

rumushili tsa ashami o uɗanga.

28 Liya tsu zuwa yi u suma shi,

waru atali a̱ a̱bitsutsu

a̱ ta̱ tso owopo e ekere yi.

29 A̱a̱kpa̱mkpa̱la̱ e ekere a̱ yi

tsa̱ tsu'yuwa̱ tsa ɗa,

u tsu zo'oso ta̱

na̱ wu uwwa ilama yi ibata.

30 A̱ka̱ɓa̱ a̱a̱tsuma̱ a̱ yi a̱ ta̱ wali

she damma aakatayimba.

Mantsa ma na u sheɓeruyi a̱a̱tsuma̱,

u tsu ka̱vura̱ ta̱ iɗa

she damma cimba ɗa a yuwain.

31 U tsu zuwa ta̱ mini ma̱ a̱ru'un

ma̱ puna̱ tsu upondo,

u tsu zuwa ta̱ mala ma̱ puna̱

tsa mani'in o upondo.

32 Nu u ka̱ra̱ reve u lyawa ure u mini

a̱ca̱pa̱ a̱ yi e ikanasa,

u tsu zuwa ta̱ mini ma̱ a̱ru'un

ma̱ ura̱na̱ na̱ a̱puci'ya̱.

33 Ili yi lo tsa̱ yi o uvaɗi shi,

ili i ɗa i na a yuwain babu wovon.

34 Ko cine ili i ri na̱ tsugbain

u tsu tara yi ili ya̱ a̱ɓula̱ shi,

a̱yi mogono ma ɗa e ekere e ili

i na i ri nu uvaɗu biti.>>