1 <<Adama a̱ nye Mogono me Ili Suru

ma zuwai urana wu uge'etosu shi?

Adama a̱ nye aza a na e reve niyi

koto e revei urana u nda shi ko ke'en?

2 A̱za̱ e iwuya a tsu tawa ta̱ urotsu wu utyo wi iɗa,

reve e iva̱ oɓolo e iliyamunga

o oɓolo na̱ a̱za̱ e le.

3 A̱ tsi iva̱ ta̱ makpa'an mololi,

a̱vu a usa ma̱runa̱ nan

adama a na o tonoi utan.

4 A tsu putsaa ta̱ a alambi ni iliyinkapa i le,

reve a zuwa a̱za̱ o ulambu

ko a 'yuwan a ciga a pa'an.

5 Cine nloli mu una n tsu da̱na̱,

a zama ilyalya a agalaci,

ne ɗa a̱za̱ o ulambu a̱ ri,

a̱ ri nu uba̱ta̱ u na aa gura

zamiya muwun nle ilyalya shi.

6 A tsu gasa ta̱ uɗuma̱ u na u ri za le shi,

a̱vu a yuwan u'yanlu

a̱ɗuma̱ ina̱bi vu za vi iwuya.

7 O tsu von ta̱ ataɓu na ayin babu ili i wupalu,

a̱ ri ni ili i na yaa putsaa le

a uwwa uta̱nu shi.

8 A̱ tsu re'we ta̱ na̱ mini mee iro'i

ne e yeneshe diga a nsasan,

reve a raɓato a̱ nge'en ma atali

a zama uba̱ta̱ u na a pa'an.

9 A tsu usa ta̱ mereɓu

ma na ma̱ ri apusa maani,

mereɓu ma na dada va̱ yi kuwa̱i,

o una̱ wu utan u na o tono.

10 A̱za̱ o ulambu a tsu wala ta̱ ataɓu

o ulambu wi itana.

A tsu tanusaa ta̱ ama akatalu,

na̱ ne suru a̱vu gba a̱ da̱na̱ na ambulu.

11 A̱ tsu kpoko ta̱ mani'in ma̱ zetun

diga uba̱ta̱ u mokpoko,

reve o kpoko masayan ma̱ inabi

diga o umatsun u inabi,

na̱ ne suru a̱ tsu da̱na̱ ta̱ na akuli.

12 A̱ a̱tsuma̱ a̱ lyuci'i a ta uwwusa

ma̱nga̱ icu'un icu'un

ya aza a na a cigai ma̱kuwa̱a̱,

a ta a uwwusa mesun mee e izami yi ikambishi

ya aza a na amatoyin,

amma na̱ ne suru

A̱sula̱ o poloo mesun me le atsuvu shi.>>

13 <<Ozo o ro a̱ tu lo na a 'yuwain ekan,

a gura revei shi,

reve a 'yuwan a̱a̱ kuru ure wa̱ yi.

14 Za mona tsu 'yon ta̱ na̱ wasasa

adama wu una za vu ulambu

na̱ za na cigai ikambishi,

na ayin waru a̱vu u yuwan wivu.

15 Za tsipere tsi piri ta̱ irumbu,

a̱vu u soko urewesu wa̱ yi a majiyan,

<Ko za e revei shi.>

16 A̱tsuma̱ a ayin a tsu uwusa ta̱ a̱tsuma̱ a 'wa,

amma nu urana a tsu pa'an ta̱,

adama a sumaa ekan.

17 Adama a na e ekere e le irumbu pici usana u ɗa,

a ta yuwusan tsu'utsa̱ na̱ yi.>>

18 <<Na̱ ne suru, a̱ tsu puwa̱n ta̱ tsa̱ a̱puci'ya̱ zuva mini.

A yuwaan ta̱ akunda e iɗa ya̱ yi una̱,

ko vuma tsu kuru o uɗuma̱ u ina̱bi wa̱ yi shi.

19 Cine usuɗuwu nu ulambu u mini,

u tsu zuwa atayan e jeruwe,

ne ɗa ason a yuwan na aza a na a yuwain unusu.

20 Mma na matsan nle te e icina ne ele,

azun a ta uwwa uyo'o wu utamu u lipu le,

babu za na a̱a̱ da̱shi cuwan ne ele,

ne ɗa a kuɗa a̱za̱ e iwuya tsu uɗanga.

21 Zavi iwuya tsu tara idari ili i ro i ɗa shi,

waru u tsu roco ma̱runa̱ isa'ani shi.

22 Amma A̱sula̱ nu ucira wa̱ yi,

u tsu kototo ta̱ a̱za̱ e iwuya,

ko na wo o'woi a̱ tu nu ucira,

aa gura damma a̱ ta̱ da̱na̱ wuma shi.

23 A̱sula̱ a tsu lyawa le ta̱

a yuwan nden n lafiya

hali a kambusa le,

waru esu a̱ yi a̱ ta̱ a̱ka̱nla̱

o ure u wuma u le.

24 A̱za̱ e iwuya a tsu lyuwa ta̱ aci a mantsa wa'a,

aa jima shi reve a̱ puwa̱a̱n.

O tsu 'yon ta̱ tsa̱ ototopi,

o tsu koɗo le ta̱ tsa̱ a̱ga̱za̱ e ishina.

25 <<To, nna̱ ne ɗa shi,

zane ɗa a damma epen ɗa maa yuwusan?

Ko za ro ta̱ lo na damma

adanshi e pere a ɗa maa yuwusan?>>