1 जेस बखते यिर्मयाह मईलो रे पईरेदारा रे आँगणो दे कैद था, तेस बखते यहोवे रा वचन दूजी बार तेसगे पऊँचेया, 2 यहोवा जो तरतिया खे बनाणे वाल़ा ए, जो तेतेखे स्थिर करोआ, तेसरा नाओं यहोवा ए, से तुसा खे ईंयाँ बोलोआ, 3 "मांते प्रार्थना कर ओर मां तेरी सुणी की ताखे बड़िया-बड़िया ओर कठण गल्ला बताणिया जिना खे तूँ यबुओ तक नि समजी रा। 4 कऊँकि इस्राएलो रा परमेशर यहोवा यरूशलेम शईरो रे कअर ओर यहूदा रे राजेया रे मईलो रे बारे दे ईंयाँ बोलोआ, जो इजी खे इजी री खातर टाल़ोए ताकि दुश्मण ओर तलवारी साथे सुलती रे लड़ी सको, ईंयाँ बोलोआ, 5 बेबीलोनिया साथे युद्ध करने खे सेयो लोक आओ तो आए, पर मां रोष ओर जल़नी रे आई की सेयो मरवाणे ओर तिना रिया लाशा तेते ई जगा दे परी देणियां, कऊँकि तिना री बुराईया रिया बजा ते मैं एस शईरो ते मूँ फेरी ला रा। 6 देख, मां यरूशलेम शईरो रा लाज करी की एथो रे रणे वाल़े ठीक करने ओर तिना खे पूरी शान्ति ओर सच्चाई प्रगट करनी। 7 मां यहूदा ओर इस्राएलो रे गुलाम लोक वापस ल्याऊणे ओर सेयो पईलके जेड़े बसाणे। 8 यहूदा ओर इस्राएल प्रदेशो रे लोके मेरिया तँईं बऊत पाप करी राखे थे; पर मां तिना रे पाप ओर कलंक तोई की पवित्र करी देणे। सेओ मेरे खलाफ लड़े, तेबे बी मां तिना सबी रे पाप माफ करी देणे। 9 कऊँकि यरूशलेमो रे लोका सेयो सारे पलाईया रे काम सुणने जो मां तिना रिया तँईं करने ओर सेयो सारे कल्याण ओर शान्तिया री चर्चा सुणी की जो मां तिना साथे करनी, डरने ओर कांबणे; सेयो तरतिया री तिना जातिया री नजरा दे माखे खुशी ओर स्तुति ओर शोभा री बजा ऊई जाणे।"

10 यहोवा ईंयाँ बोलोआ कि ये जगा जेतेरे बारे दे तुसे लोक बोलोए कि ये तो ऊजड़ पड़ीगा दा, इदे ना तो माणूं रयी गे रे ओर ना डांगर, मतलब यहूदा प्रदेशो रे शईर ओर यरूशलेम शईरो रिया सड़का जो एड़िया सुनसाण पड़ी रिया कि तिना दे ना तो कोई माणूं रंदा ओर ना कोई डांगर। 11 इना देई खुशी ओर आसणे री आवाज, लाड़े-लाड़िया री आवाज ओर एसा गल्ला खे बोलणे वाल़े री आवाज फेर सुणनी, "सेना रे यहोवे रा तन्यवाद करो, कऊँकि यहोवा दया करने वाल़ा ए ओर तेसरी दया सदा बणी री रओई। यहोवे रे मन्दरो दे तन्यवाद बलि ल्याऊणे वाल़े री बी आवाज सुणनी, कऊँकि मां एस देशो री दशा पईलकी जेड़ी जिंयाँ की तिंयाँ करी देणी, यहोवे रा येई वचन ए।" 12 सेना रा यहोवा बोलोआ, "सबी गाँवो समेत ये जगा जो एड़ी ऊजड़ ए कि इदे ना तो कोई माणूं रयी गा रा ओर ना डांगर, इदे ई पेडा-बाकरिया खे बठयाल़ने वाल़े गाद्दी फेर बसणे। 13 पाह्ड़ी देशो दे ओर थालले देशो रे शईरो दे, दक्खण देशो रे शईरो दे, बिन्यामीन देशो रे ओर यरूशलेम शईरो रे नेड़े-तेड़े, मतलब यहूदा प्रदेशो रे सारे शईरा दे पेडा-बाकरिया फेर गिणी-गिणी की चराईया जाणिया, यहोवे री येई बाणी ए।"

14 यहोवा ईंयाँ बी बोलोआ, "देख, एड़े दिन आऊणे वाल़े ए कि कल्याणो रा जो वचन मैं यहूदा ओर इस्राएलो रे लोका रे बारे दे बोली राखेया, से पूरा करना। 15 तिना दिना दे ओर तेस बखतो दे मां दाऊदो रे कराने दे एक तर्मी माणूं राजा बनाणा ओर तेस एस शईरो दे न्याय ओर तर्मो रे काम करने।* 16 तिना दिना दे यहूदा बचेया रा रणा, ओर यरूशलेम बिना डरे बसेया रा रणा ओर तेसरा नाओं ये राखेया जाणा, मतलब, यहोवा म्हारी तार्मिकता।"

17 यहोवा ईंयाँ बोलोआ, "दाऊदो रे कराने रे लोक इस्राएलो रे कराने री गद्दिया पाँदे बैठणे वाल़े सदा बणे दे रणे 18 ओर लेवी पुरोईता रे कुलो दे रोज माखे होमबलि चढ़ाणे वाल़े ओर नज्जो री बलि बाल़ने वाल़े ओर मेलबलि चढ़ाणे वाल़े सदा बणे दे रणे।" 19 तेबे यहोवे रा ये वचन यिर्मयाह गे फेर पऊँचेया, 20 "यहोवा ईंयाँ बोलोआ कि मैं रात ओर दिनो रे बारे दे जो वाचा बानी थी, जेबे तुसे तिजी खे एड़ा तोड़ी सको कि रात-दिन आपणे-आपणे बखतो दे नि ओ, 21 तेबेई जो वाचा मैं आपणे दास दाऊदो साथे बानी थी टूटी सकोई कि तेरे कुलो री गद्दिया पाँदे बैठणे वाल़े सदा बणे दे रणे ओर मेरी वाचा मेरी सेवा-टईल करने वाल़े लेवी पुरोईता साथे बणी री रणी। 22 जिंयाँ सर्गो रे तारेया री गिणती ओर समुद्रो दे बालूए री कणियां रा परमाण नि ऊई सकदा, तिंयाँ ई मां आपणे दास दाऊदो रा कुल ओर आपणे लेवी बढ़ाई की अणगिणत करी देणे।"

23 यहोवे रा ये वचन यिर्मयाह गे फेर पऊँचेया, 24 "यिर्मयाह, क्या तैं नि देखेया कि यो लोक क्या बोलोए, ‘जो दो कुल* यहोवे चूणी ले थे तिना दुँईं ते तिने एबे आथ चकी ता रा?’ ये बोली की यो मेरी प्रजा खे बेकार जाणोए ओर ये कि ये जाति तिना री नजरा रे गिरी गी री। 25 पर आऊँ यहोवा ईंयाँ बोलूँआ कि जे दिन ओर राती रे बारे दे मेरी वाचा अटल़ नि रओगी ओर जे सर्ग ओर तरतिया रे नियम मेरे ठराए दे नि रओगे, 26 तेबेई मां याकूबो रे कुलो ते आथ चकणा ओर अब्राहम, इसहाक ओर याकूबो रे कुलो पाँदे राज करने खे आपणे दास दाऊदो रे कुलो ते कोई बी फेर नि ठराणा। पर एते ते उल्टा मां तिना पाँदे दया करी की सेयो तिना रे देशो दे वापस ल्याऊणे।"