1 አቤት መና ጎዳዉ፥ ታ ጽሎ ኦችያዋ ስሳ፤

ታ ዋሱዋ ሀይዛ።

ታን ጭመና እንጻርሳፐ ዎስያ ዎሳኮ፥

ነ ሀይ ዛራ።

2 ታ ሻትንይ ነ ስንፐ ዮ፤

ነ አይፊ ልከ ግድያዋ ጼሎ።

3 ኔን ቃማን ታና ጾሞሳዳ፤

ታ ዎዛና ፓጫዳ።

ሽን ታ ቦላፐ አይነካ ደማካ።

ታ እንጻርሳይካ ባለትቤና።

4 ታን ሀራ አሳቱዋዳን ኢታ ቃላ ሃሳይከ፤

ታን ነ አዛዙዋ ናግያ ድራዉ፥ ገነ ኦግያ ካላበይከ።

5 ታ ገዲ በተና ማላ፥

ታ ታንጉ ነ ኦግያፐ ጋጻ ከስቤና።

6 አቤት ጾሳዉ፥ ኔን ስስያ ድራዉ፥

ታን ኔና ዎሳይ።

ነ ሀይ ታኮ ዛራደ፥

ታን ነዉ ኦድያዋ ሀይዛ።

7 ባረንቱ ሞርከቱዋፐ ባቃትያዋንታ

ነ ኡሸቻ ኩሽያን ቆሳደ አሽያዎ፥

ነ ሎኦተ ማላልስያ ኦግያን በሳ።

8 ነ አይፍያ ጭሩዋዳን ታና ናጋ፤

ነ ቀፍያ ግዶን ታና ቆሳ።

9 ታና ኡንእ ዎዳ ኢታቱዋፐነ

ዶድ ዎዳ ጻላ ሞርከቱዋ ኩሽያፐ

ታና ቆሳ።

10 ኡንቱንቶ ቃረት ባዋ፤

ኦቶሩዋን ሃሳዪኖ።

11 ታን ብያሳኣ ኡባን ኡንቱንቱ ታና ዶዲኖ።

ታና ቢታን አ የጋናዉ ጼሊኖ።

12 ኡንቱንቱ ባረንቶ ምያዋ ኮይያ ጋሞቱዋ ማላ፤

ጌማን ዙግ ናግያ ዎዳላ ጋሞቱዋ ማላ።

13 አቤት መና ጎዳዉ፥ ደንዳ።

ታ ሞርከቱዋና ኤቀታደ ጾና፤

ነ ማሻን ኢታቱዋፐ ታና አሻ አካ።

14 አቤት መና ጎዳዉ፥ ሀዋ ማላ አሳፐ፥

ኡንቱንቱ ካጫይ ሀ ሳኣ ደኡዋ ጻላላ ግድያ አሳፐ

ነ ኩሽያን ታና አሻ።

ኔን ኡንቱንቶ ምንጄዳ ቦሻን ኡንቱንታ ሙራ፤

ሄ ቦሻይነ ኡንቱንቱ ናናቶ ግዲደ፥

ኡንቱንቱ ናናቱዋ ናናቶካ ፓላሆ።

15 ሽን ታን ጽሎተን ነ ሶምእያ በአና።

ታን ደንድያ ዎደ፥ ነ ማላ በኣደ ናሸታና።