Salmos 63

ጾሳ ኮዩሳ

ይሁዳ ባዙዋን ደእያ ዎደ ዳዊታ ማዛሙርያ

1 አቤት ጾሳዉ፥ ኔን ታ ጾሳ፤

ታ ዎዛናይ ኔና ላሞቴ፤

ታ አሹካ ኔና አሞቴ።

መል ዛኤዳ፥ ሃ ባይና ቢታዳን

ታ ኩመን አሳተይ ኔና ሳመቴ።

2 ታን ኔና ጌሻ ሳኣን በኣድ፤

ነ ዎልቃካ ነ ቦንቹዋካ ታን በኣድ።

3 አገና ነ ሲቁ ደኡዋፐ ሎእያ ድራዉ፥

ታ እንጻርሳይ ኔና ቦንቻና።

4 ታ ደኡዋ ላይን ታን ኔና ጋላታና፤

ነ ሱንን ታ ኩሽያ ፑደ ምጫና።

5 አሳይ ሎኦ ቁማ ካልያዋዳን፥

ታ ሸምፓታ ኔናን ካላና።

ታን ታ እንጻርሳን ናሸቻ የን ኔና ጋላታና።

6 ታን ታ ግሱዋን ኔና ሀሳያይ፤

ቃማ ኡባን ነባ ቆፓይ፤

7 አያዉ ጎፐ፥ ኔን ታና ማዴዳዋ።

ታን ነ ቀፍያ ኩዋን ኡታደ፥ ናሸቻዉ የጻይ።

8 ታን ነ ማታ ሺቃ ኡታይ፤

ነ ኡሸቻ ኩሺ ታና ኦይቂደ ናጌ።

9 ሽን ታና ዎና ኮይያዋንቱ፥

ቢታ ጋርሳ ጪሞ ሳኣን ሞገታና።

10 ኡንቱንቱ ማሻዉ አደ እመታና፤

ኡንቱንቱ ባባርቂያ ካተ ግዳና።

11 ሽን ካቲ ጾሳን ናሸታና።

ጾሳ ሱንን ጫቂያ ኡባይ አ ጋላታና፤

ሽን ዎርዱዋ ሃሳይያዋንቱ ዶናይ ጎርደታና።