ዛማረቱዋ ካፖ ሱሱላቱዋን የጸቴዳ፥ ቆረ ናናቱ ጻፌዳ ማዝሙርያ

1 አቤት ኡባፐ ዎልቃማ መና ጎዳዉ፥

ኔን ደኢያሳይ አያ ሎኢ!

2 ታን መና ጎዳ ጌሻ ጎልያ ዳባባ ላሞታይ፤

ታ ኩመን አሳተይ ደኡዋ ጾሳዉ ናሸቻን የጼ።

3 አቤት ኡባፐ ዎልቃማ መና ጎዳዉ፥

ታ ካትያዉ፥ ታ ጾሳዉ፥

ነዉ ያርሽያ ሳኣ ማታን፥

ሱንያ ካፋታ ባረዉ ደኢያሳ ደማዱ።

ሀራጳታካ ባረዉ ቁቁልያ ጎልያ ያን ኬጻዱ።

4 ነ ጌሻ ጎልያን ደእያዋንቱነ

መናዉ ኔና ሳቢያዋንቱ አንጀቴዳዋንታ።

5 ዎልቃ ኔፐ ደምያዋንቱ፥

ባረንቱ ዎዛናን ጽዮነ አፍያ ኦግያ ባናዉ

አሞትያዋንቱ አንጀቴዳዋንታ።

6 ዬኩዋ ዛንጋራና ኡንቱንቱ አያ ዎደ፥

ሄ ሳአይ ፑልቱዋ ከሴ።

ባሳ እራይካ ቡኪደ፥

ያን ደልእያ ግስሴ።

7 ኡንቱንቱ ብያ ዎደ፥ ዎልቃ ጉጅ ጉጂደ ባና።

ኡንቱንቱ ጾሳ ስንን ጽዮነን ቤታና።

8 አቤት ኡባፐ ዎልቃማ መና ጎዳዉ ጾሳዉ፥

ታ ዎሳ ኔን ስሳ።

አቤት ያቆባ ጾሳዉ፥ ሀይዛ።

9 አቤት ጾሳዉ፥ ኑ ጎንዳልያ በአ፤

ኔን ዶሬዳ ካትያ ነ ኬካ አይፍያን ጼላ።

10 ታን ሀራ ሳኣን ሻኡ ጋላሳ ደአናፐ

ጾሳ ጎልያን እት ጋላሳ ደእያዌ ሎአ።

ኢታቱዋ ዱንካንያን ደአናዋፐ

ታ ጾሳ ጎልያ ፐንግያ ናግያዌ ታዉ ሎአ።

11 መና ጎዳይ ጾሳይ ኑዉ ጎንዳለነ ፖኡዋ፤

መና ጎዳይ ኑዉ ቦንቹዋነ ኬካተ እሜ።

ሱረተን ሀመትያዋንታ እ ሎኦባ ኡባ ድገና።

12 አቤት ኡባፐ ዎልቃማ መና ጎዳዉ፥

ኔናን አማነትያዋንቱ አንጀቴዳዋንታ።