ማዝሙርያ 96

ጾሳይ ኡባፐ ቦላ ካትያ

1 መና ጎዳዉ ኦራ የ የጽተ፤

ሳኣን ደእያ አሳይ፥ ኡባይ መና ጎዳዉ የጽተ።

2 መና ጎዳዉ የጽተ፤ አ ሱን ሳቢተ፤

እ አሽያ ምሽራቹዋ ጋላሳን ጋላሳን ኦድተ።

3 ካዉተ ግዶን አ ቦንቹዋ፥

አሳ ኡባ ግዶን አ ማላልስያ ኦሱዋባ አዋይተ።

4 አያዉ ጎፐ፥ መና ጎዳይ ዎልቃማ፤

ግታ ጋላታይ አዉ በሴ።

ጾሳቱዋ ኡባፐ አደ እ ያየታናዉ በሴ።

5 ሀራ አሳ ጾሳቱ ኡባይ ኤቃቱዋ፤

ሽን መና ጎዳይ ሳሎቱዋ መዳ ጾሳ።

6 ቦንቹነ አንጋይ አ ዩሹዋን ደኤ፤

ምኖተይነ ፑላይ አ ጌሻ ጎልያን ደኤ።

7 ህንተኖ፥ አሳ ዛረቶ ኡባቶ፥

መና ጎዳባ ኦድተ፤✝96:7-9 ማዝ. 29:1-2

"ቦንቹነ ዎልቃይ መና ጎዳሳ" ጊደ ኦድተ።

8 "ቦንቹ አ ሱንሳ"

ጊደ መና ጎዳባ ኦድተ።

ያርሹዋ አኪደ፥ አ ዳባባ ገልተ።

9 አ ጌሻተ ፑላን መና ጎዳዉ ጎይንተ፤

ቢታን ደእያ አሳ ኡባዉ፥ አ ስንን ኮኮርተ።