1 ଇସ୍ୱରନ୍‌ ଗାମ୍‌ତେ, ଏ ସନାୟ୍‌ସାୟ୍‌ ଡେସାନ୍‌ ଅଡ଼୍‌କୋନ୍‌ ଆମନ୍‌ରାଜି ରିଙ୍‌ଲନ୍‌ ଡକୋନାବା ଆରି ବର୍ନେଞେନ୍‌ ଅମ୍‌ଡଙ୍‌ବା, ମନ୍‌ରାଞ୍ଜି ରଙ୍‌ ବୋର୍ସାନ୍‌ ଞାଙେତଜି; ଆନିଞ୍ଜି ଆମ୍ମୁଙ୍‌ ଆମ୍ମୁଙ୍‌ଲନ୍‌ ଆୟ୍‌ବର୍ନେତଜି । ଜିରାୟ୍‌ବା, ପନ୍‌ସୁଆତିଲୋଙନ୍‌ ଇନ୍‌ଲେଞ୍ଜି ଆବୟନ୍‌ ଏ ଏମ୍ମେନେବା ।

2 ଡରୁଙ୍‌ୟୋଙ୍‌ଗଡ୍‌ ସିଲଡ୍‌ ଅବୟ୍‌ ଜନିନୟ୍‌ମରନ୍‌ଆଡଙ୍‌ ଆନା ଓଡ୍ଡେଲେ ଓରୋଙ୍‌ଲାୟ୍‌, ଆନିନ୍‌ ଆସିଲୋଙନ୍‌ ରାଜାଞ୍ଜି ଡ ଜାତିମରଞ୍ଜିଆଡଙ୍‌ ସୋରୋପ୍ପାୟ୍‌ତଜି; ଆରି ଆକଡ଼ିବନ୍‌ ବାତ୍ତେ ଆନିଞ୍ଜିଆଡଙ୍‌ ଆଉମ୍ରିଲନ୍‌ଲୋଙନ୍‌ ଅଃମ୍ମାୟ୍‌ନେତେଜି କି ଅଆମନ୍‌ ପାଙ୍‌ରିଙ୍‌ଲେ ଆନିଞ୍ଜିଆଡଙ୍‌ ଇୟ୍‌ତେ ଗତରେଜି । 3 ଆନିନ୍‌ ଏରାମ୍ମୁୟ୍‌ ଡକୋଡାଲନ୍‌ ଆନିନ୍‌ ଆନିଞ୍ଜିଆଡଙ୍‌ ଗଙ୍‌ଜଙ୍‌ତଜି, ଡିୟ୍‌ତେ ଆଡଡଡ୍‌ ଆନିନ୍‌ ଗଙ୍‌ଜଙ୍‌ତଜି ଡ ଆତାଲ୍‌ଜଙନ୍‌ ଲବନ୍‌ ଅଜ୍ଜାବେ । 4 ଆନା ପୁର୍ବାନ୍‌ମା ସିଲଡ୍‌ ଜୋଜୋଲେଞ୍ଜି ଆଜୋଜୋ ଜାୟ୍‌ ଅନୋଡ୍ଡେନ୍‌ ଡେଏନ୍‌ ଆରି ଅଡ଼୍‌କୋନ୍‌ ଆକାବ୍ବାଡ଼ା ଲୁମେନ୍‌ ଆରି ଗବ୍‌ଡେଲେନ୍‌ ? ଞେନ୍‌, ଇସ୍ୱର ଇତିଆସନ୍‌ ଆପୁର୍ବା ଡକୋଲିଁୟ୍‌, ଆରି ଆତନିକ୍କି ନିୟ୍‌ ଡକୋଲନାୟ୍‌ । 5 ମଡ୍ଡି ସମେଁୟ୍‌ଣ୍ଡ୍ରାନ୍‌ ଆଡେପା ଗିୟ୍‌ଲେ ବତଙେଞ୍ଜି; ଆନିଞ୍ଜି ବତଙେଞ୍ଜି ଆରି ବନ୍ତଙନ୍‌ ବାତ୍ତେ ତକରେଞ୍ଜି । ତିଆସନ୍‌ ଆନିଞ୍ଜି ଆବରୁକ୍କୁନ୍‌ ଜିର୍ରାଜି । 6 ଆନିଞ୍ଜି ଅଡ଼୍‌କୋ ଆ ତୟ୍‌ଲିସିଙ୍‌ ମରଞ୍ଜିଆଡଙ୍‌ ଅଲ୍‌ସାୟ୍‌ସିଏଞ୍ଜି ଆରି ଅଃବୋର୍ସାନାବା ଗାମ୍‌ଲେ ଅଡ଼୍‌କୋ ଆ ବୋଞାଙଞ୍ଜିଆଡଙ୍‌ ବରେଞ୍ଜି ।

7 କୁଣ୍ଡାୟ୍‌ ତନ୍‌ଡ୍ରୁବ୍‌ମରନ୍‌* ସୁନ୍ନାରିନ୍‌ଆଡଙ୍‌ ବୋର୍ସାନ୍‌ ତିୟ୍‌ଲେ ବରେନ୍‌, ଆତୁଡ଼ିନ୍‌ ବାତ୍ତେ ଅଃମ୍ମାୟ୍‌ନେଆ ଆମନରା "ଆଜରୁଡ଼େଏନ୍‌ କାବ୍ବାଡ଼ାନ୍‌ ମନଙ୍‌ ଲୁମେନ୍‌" ଗାମ୍‌ଲେ ବର୍ରେନ୍‌, ଆମନ୍‌ରାଞ୍ଜିଆଡଙ୍‌ ଆନିନ୍‌ ଅବ୍‌ନୁୟୁବେନ୍‌ । କୋଙ୍‌ଣ୍ତାଜନ୍‌ ଏଙ୍ଗାଲ୍‌କି ଅଃୟୁନେ ତିଆସନ ମେକନ୍‌ ବାତ୍ତେ ତାଙ୍‌ଲେ ରଡୋଏଞ୍ଜି ।

8 ବନ୍‌ଡ ଏ କମ୍ବାରିମର୍‌ଞେନ୍‌ ଇସ୍ରାଏଲ, ଏ ଗଡ଼ିଞେନ୍‌, ଞେନ୍‌ ଅବ୍ରାଆମନ୍‌ ଆସାଙ୍ଗ ଆକେଜ୍ଜମର୍‌ଜି ଞେନ୍‌ ଆମ୍ବେଞ୍ଜିଆଡଙ୍‌ ସେଡାଲବେନ୍‌ ।

9 ପୁର୍ତିନ୍‌ ଆତନୁଙିୟ୍‌ଲୋଙ୍‌ ସିଲଡ୍‌ ଞେନ୍‌ ଆମ୍ବେଞ୍ଜିଆଡଙ୍‌ ଇୟ୍‌ଲାୟ୍‌ ଓରୋଙ୍‌ବେନ୍‌; ସଙାୟ୍‌ରା ଆଡ୍ରକୋନେଲୋଙ୍‌ ସିଲଡ୍‌ ଓଡ୍ଡେଲେ ଓରୋଙ୍‌ଲବେନ୍‌ ଆରି ଆମ୍ବେନ୍‌ଆଡଙ୍‌ ବର୍ରବେନ୍‌, "ଆମ୍ବେନ୍‌ କମ୍ବାରିମର୍‌ଞେନ୍‌ । ଞେନ୍‌ ଆମ୍ବେଞ୍ଜିଆଡଙ୍ ସେଡାଲବେନ୍‌, ଆରି ଞେନ୍‌ ଅଃନମ୍‌ରେଙ୍‌ବେନ୍‌ ।"

10 ବତଙ୍‌ଡଙ୍‌ବେନ୍‌ ଞେନ୍‌ ଆମ୍ବେଞ୍ଜି ସରିନ୍‌ ଡକୋ, ଞେନ୍‌ ଇସ୍ୱରବେନ୍‌ ଇନ୍ନିଙ୍‌ ମୁସୁକ୍କ ଡେଡଙ୍‌ବେନ୍‌ ତଡ୍‌ କି ବତଙ୍‌ଡଙ୍‌ବେନ୍‌, ଞେନ୍‌ ଆମ୍ବେନ୍‌ଆଡଙ୍‌ ଅର୍ଜଡ଼ୋମ୍‌ସିଗଡ୍‌ ଅବ୍ବୋର୍ସାତବେନ୍‌ ଆରି ସାୟ୍‌ସିତବେନ୍‌; ଞେନ୍‌ ଆମ୍ବେନ୍‌ଆଡଙ୍‌ ଡଙ୍‌ଡଙ୍‌ତବେନ୍‌ ଆରି ଡୋବ୍‌ତବେନ୍‌ ।

11 ଆନାଜି ଆମ୍ବେନ୍‌ଆଡଙ୍‌ ବାବ୍‌ରାବ୍‌ତବେଞ୍ଜି

ଆନିଞ୍ଜି ଆରେତଜି ଆରି ବରୟ୍‌ତଜି ।

ଆନାଜି ବିରୁଦଲୋଙ୍‌ବେନ୍‌ ଅଲ୍‌ଜୁଜ୍ଜେତଜି ଆନିଞ୍ଜି ରିକାଡାଲେ ଗୁରୁଡେତଜି । ରବୁତଜି ।

12 ଅଙ୍ଗା ମନ୍‌ରାଜି ବିରୁଦଲୋଙ୍‌ବେନ୍‌ ଜିର୍ରତଜି, ଆନିଞ୍ଜି ଏସାୟ୍‌ତଜି,ବନ୍‌ଡ ଆନିଞ୍ଜିଆଡଙ୍‌ ଏଃର୍ରବାଞେଜି । ଆନାଜି ଆମ୍ବେନ୍‌ ସରିନ୍‌ ଅଲ୍‌ଜୁଜ୍ଜେତଞ୍ଜି ଆବର୍ନେଞ୍ଜି ଆନ୍ନିଙ୍‌ ଅଃମାନେଏଜି ।

13 ଇନିଆସନ୍‌ଗାମେଣ୍ଡେନ୍‌ ଞେନ୍‌ ପ୍ରବୁ ଇସ୍ୱରବେନ୍‌; ଞେନ୍‌ ଅର୍‌ଜଡ଼ୋମ୍‌ସିବେନ୍‌ ଞମ୍‌ଲେ ବର୍ତନାୟ୍‌, "ବତଙ୍‌ଡଙ୍‌ବେନ୍‌ତଡ୍‌; ଞେନ୍‌ ଆମ୍ବେଜିଆଡଙ୍‌ ସାୟ୍‌ସିତବେନ୍‌ ।"

14 ଇସ୍ୱରନ୍‌ ଗାମ୍‌ତେ, ଏ ଇସ୍ରାଏଲ୍‌, ଆମନ୍‌ ସନ୍ନା ଆରି ବୋର୍ସାତଡ୍‌, ବନ୍‌ଡ ବତଙ୍‌ଡଙମ୍‌; ଞେନ୍‌ ଆମନ୍‌ଆଡଙ୍‌ ସାୟ୍‌ସିତମ୍‌ । ଞେନ୍‌, ଇସ୍ରାଏଲଞ୍ଜି ମଡ଼ିର୍‌ ଆ ଇସ୍ୱର, ଞେନ୍‌ ତୁମ୍‌ ଡନୋବ୍‌ମର୍‌ବେନ୍‌ ।

15 ଞେନ୍‌ ଆମ୍ବେଞ୍ଜିଆଡଙ୍‌ ଅବୟ୍‌ ଅସୁବ୍‌ ରଙ୍‌ ଅରବ୍‌ଞାନ୍‌ ଜନ୍ତ୍ରରନ୍‌ ଅନ୍ତମ୍‌ ଏମ୍ମେତାୟ୍‌,

ଆମ୍ବେନ୍‌ ବରୁଞ୍ଜି ଅବ୍‌ଞାଡାଲେ ଏଲବ୍‌ଗର୍‌ତେ; ତଡ଼କୁବଞ୍ଜି ଆପୋନ୍‌ଲାସରନ୍‌ ଗତେଡୁଙନ୍ ଅନ୍ତମ୍‌ ଆନ୍ନା ଏମ୍ମେତେ ।

16 ଆମ୍ବେନ୍‌ ଆନିଞ୍ଜିଆଡଙ୍‌ ଅଃୟେର୍‌ଲୋଙନ୍‌ ଏଓଡାୟେଞ୍ଜିଡେନ୍‌;

ରିଙ୍ଗେନ୍‌ ଆନିଞ୍ଜିଆଡଙ୍‌ ପାଙ୍‌ରିଙ୍‌ଲେ ପାଙ୍‌ତେ,

ଆରି ଗାବ୍‌ୟାର୍‌ରିଙନ୍‌ ପିରିଙ୍‌ପାଡାନ୍‌ ଏମ୍ମେତେ ।

ତିଆଡିନ୍ନା ଞେନ୍‌ ଇସ୍ୱରେବେନ୍‌ ଆମଙ୍‌ ଆରି ଇସ୍ରାଏଲନ୍‌ ଆ ମଡ଼ିର୍‌ ଇସ୍ୱର ଗାମ୍‌ଲେ ଆମ୍ବେନ୍‌ ଜନାତବେନ୍‌ ଆରି ସର୍ଡାତବେନ୍‌ ଆରି ଞେନ୍ଆଡଙ୍‌ ଏସେଙ୍କେତିଁୟ୍‌ ।

17 "ଡୋଲେୟ୍‌ ମରଞ୍ଜି ଡ ଲଗଡ୍‌ ବୁଡ୍ଡିମରଞ୍ଜି ଡାଆନ୍‌ ସାୟ୍‌ତଜି, ଆନିଞ୍ଜି ଡାଆନ୍‌ ଏର୍‌ଞନାଙ୍‌ ଅସର୍‌ଲାଙ୍‌ତଜି, ଞେନ୍‌ ପ୍ରବୁ, ଇସ୍ରାଏଲନ୍‌ ଆ ଇସ୍ୱର; ଆବନେଡ଼ା ଆପର୍ତନାଞ୍ଜି ଅମ୍‌ଡଙ୍‌ଲେ ଅଃନମ୍‌ରେଙେଜି ।

18 ଆପାତାବୁର୍‌ଲୋଙନ୍‌ ଞେନ୍‌ ଅଲଡାନ୍‌ ଡାଆନ୍‌ ବରୁନ୍‌ ଆଗର୍ଡରେଙ୍‌ ଡାଆନ୍‌ ଅମ୍‌ଡୁଙ୍‌ତାୟ୍‌ । ଆରିଙ୍‌ରିଙ୍‌ଲଅରେଙନ୍‌ ଡାଆନ୍‌ ଅବ୍‌ଗିଙ୍‌ଗିଙ୍‌ତାୟ୍‌ ଆରି ଡୁଙ୍‌ଡମ୍‌ନେଡାନ୍‌ ଅମ୍‌ଡୁଙ୍‌ତାୟ୍‌ ।

19 ଆରିଙ୍‌ରିଙ୍‌ଲୋଙନ୍‌ ଏରସ, ସିଟିମ୍‌, ମଞ୍ଜାତିନ୍‌ ଡ ଜିତନୁବନ୍‌ ଗୁତାୟ୍‌, ଞେନ୍‌ ଆରିଙ୍‌ରିଙ୍‌ଲଅରେଙନ୍‌ ଦେବଦାରୁନ୍‌, ତିଦରନ୍‌ ଡ ତାସୁରନୁବନ୍‌ ମିଞଲ୍‌ନୁବନ୍‌ ରୁକ୍କୁଲେ ଗୁତାୟ୍‌ ।

20 ତିଲୋଙନ୍‌ ଇସ୍ୱରନ୍‌ ଆସିଲୋଙ୍‌ କେନ୍‌ ଆକାବାଡ଼ା ଲୁମେନ୍‌, ଇସ୍ରାଏଲନ୍‌ କେନ୍‌ ଅଡ଼୍‌କୋନ୍‌ ଗିୟ୍‌ଲେ ଜନାତଜି ଡ ଞେନ୍‌ ପ୍ରବୁ ଇସ୍ରାଏଲନ୍‌ ଆ ମଡ଼ିର୍‌ ଇସ୍ୱରନ୍‌ କେନ୍‌ ଆକାବ୍ବାଡ଼ା ଲୁମେନ୍‌ ।"

21 ଇସ୍ରାଏଲନ୍‌ ଆରାଜା, ପ୍ରବୁନ୍‌, କେନ୍‌ ଆବର୍ନେ ବର୍ରନେ,

"ଏ ଜାତିଞ୍ଜି ଆ ଇସ୍ୱର ବନାଡ ବର୍‌ବେଞ୍ଜି ବର୍ନାବା ।"

ଜାକୁବନ୍‌ ଆଜା ବର୍ତନ୍‌, "ଆମ୍ୱେଞ୍ଜି ରଡୋ ସାକିମର୍‌ବେଞ୍ଜି ଓରୋଙାୟ୍‌ବାଜି ।"

22 ତେନ୍ନେ ଜିର୍ରେ ଇନିଜି ତନଙଡଞ୍ଜି ପୁର୍ବାଃତେ ଜିର୍ତାୟ୍‌ ଇନ୍‌ଲେଞ୍ଜିଆଡଙ୍‌ ଅବ୍‌ଜନାଲେନ୍‌, ତି ଅଡ଼୍‌କୋନ୍‌ ତନଙଡନ୍‌ ଜିର୍ରାୟ୍‌ ଡେନ୍‌ ଆମ୍ବେନ୍‌ ଏବର୍ରନ୍‌ ଅନ୍ତମ୍‌ ତିଆତେ ତନଙଡନ୍‌ ଜିର୍ରାୟ୍‌ ଗାମ୍‌ଲେ ଞେନ୍‌ ଏଙ୍ଗାଲେ ଜନାଲେ ଏରପ୍ତିତାୟ୍‌ । ଆମ୍ମୁଙ୍‌ ଇନିଜି ଅଡ଼୍‌କୋନ୍‌ ତନଙଡଞ୍ଜି ଡେଏନ୍‌ କୋର୍ଟଲୋଙନ୍‌ ଆବର୍ନେଜି ଅଡ଼୍‌କୋନ୍‌ ଞେନ୍‌ଆଡଙ୍‌ ବରାୟ୍‌ଲେନ୍‌ ।

23 ପୁର୍ବାଃତେ ଇନ୍‌ଲେଞ୍ଜି ଆସନ୍‌ ଇନିଜି ଗନ୍‌ଟେନ୍‌ ଡକୋ ଅବ୍‌ଜାନାଲେନ୍‌ । ଏତ୍ତେଲ୍‌ଡେନ୍‌ ଆମନ୍‌ ଆଜାଡ଼ି ଇସ୍ୱର ଗାମ୍‌ଲେ ଞେନ୍‌ ଏଜନାତାୟ୍‌, ଇଜ୍ଜାଡେନ୍‌ ଆମନ୍‌ ମନଙ୍‌ କାବ୍ବାଡ଼ାନ୍‌ ଲୁମା ଇଜ୍ଜାନ୍‌ ଇର୍ସେ କାବ୍ବାଡ଼ାନ୍‌ ଲୁମା ଏତ୍ତେଲ୍‌ଡେନ୍‌ ବନ୍ତଙନ୍‌ ବାତ୍ତେ ଇନ୍‌ଲେଞ୍ଜି ସାନ୍ନିଡେତେଲେନ୍‌ ।

24 ଗିଜ୍ଜା ଆମନ୍‌ ଇନିଜି ଅଡ଼୍‌କୋନ୍‌ ଲୁମ୍‌ତେ ଇନ୍ନିଙ୍‌ ତଡ୍‌; ଆନାଜି ଆମନ୍‌ଆଡଙ୍‌ ପୁର୍‌ତମ୍‌ଜି ଆନିଞ୍ଜି ଏଡ଼ୁର୍‌ମଡ୍‌ଜି ।

25 ଡରୁଙ୍‌ୟୋଙ୍‌ଗଡ୍‌ ସିଲଡ୍‌ ଅବୟ୍‌ ମନ୍‌ରାନ୍‌ଆଡଙ୍‌ ଞେନ୍‌ ସେଡାଲାୟ୍‌; ଅର୍‌କାବଡ଼ିସିଗଡ୍‌ ସିଲଡ୍‌ ଆମନ୍‌ଆଡଙ୍‌ ଆନବ୍‌ଗେଗେନ୍‌ ଆସନ୍‌ ଞେନ୍‌ ଆନିନ୍‌ଆଡଙ୍‌ ଓରୋଙ୍‌ଲାୟ୍‌ । ଆନିନ୍‌ ଆସ୍ରାସନତେଞ୍ଜି ଆମନ୍‌ରାଜିଆଡଙ୍‌ କାଡ୍ଡୋନ୍‌ କିନ୍ତାଲ୍‌ଲୋଙନ୍‌ ଆଜର୍ରବ୍‌ଡିତ୍ତାଲନ୍‌ ଆରି କୁମ୍ବିଜନ୍‌ ତାଲ୍‌ଜଙନ୍‌ ବାତ୍ତେ ଞାଡାତେ ।

26 ଆମ୍ବେଞ୍ଜିଲୋଙ୍‌ ସିଲଡ୍‌ ଆନ୍ନିଙ୍‌ କେନ୍‌ ଆବର୍ନେ ଆସନ୍‌ ପୁର୍ବାଃତେବରନ୍‌ ବର୍ରନ୍‌ ଅବ୍‌ଜାଲଲେଡେନ୍‌, ଏତ୍ତେଲ୍‌ଡେନ୍‌ ଆମନ୍‌ଆଡଙ୍‌ ଆଜାଡ଼ି ଇସ୍ୱର ଗାମ୍‌ଲେ ଞେନ୍‌ ଏବର୍ତନାୟ୍‌ବନ୍‌ ? ବନ୍‌ଡ କେନ୍‌ ଆବର୍ନେ ଆନ୍ନିଙ୍‌ ଜା ବପଦ ଅଃବ୍ବର୍ନେଜି; ଆମନ୍‌ ଏନ୍ନେଲେ ବର୍ରନେ ଆସନ୍‌ ଆନ୍ନିଙ୍‌ ଅନ୍‌ରଙ୍‌ଅମ୍‌ଡଙେଜି ।

27 ଞେନ୍‌, ପ୍ରବୁ, ଆପର୍ତମ୍ମୁନ୍‌ କେନ୍‌ ଆବର୍ନେ ସିଓନନ୍‌ଆଡଙ୍‌ ଅବ୍‌ଜନାଲାୟ୍‌; ଜିରୁସାମ ଗଡ଼ାନ୍‌ ନିୟ୍‌ ଅବୟ୍‌ ମନଙ୍‌ବର୍ରନ୍‌ ପନାଙନ୍‌ ଆସନ୍ ଅବୟ୍‌ ମନ୍‌ରାନମ୍‌ଜି ଏତିୟ୍‌ବା।

28 ଞେନ୍‌ ଆଗ୍ରିୟ୍‌ଲାଙନ୍‌ ଆଡିନ୍ନା ଆନ୍ନିଙ୍‌ ଅଃଗିୟ୍‌ଲାୟ୍‌, ଆନିଞ୍ଜିଲୋଙ୍‌ ସିଲଡ୍‌ ଆନ୍ନିଙ୍‌ ଇନ୍ନିଙ୍‌ ଅଃବ୍ବର୍ରଞ୍ଜି; ଆନ୍ନିଙ୍‌ ଜା ବର୍ନେଞେନ୍‌ ଅଃଜ୍ଜାଲଙ୍‌ଲିଁୟ୍‌ଜି । ଆନିଞ୍ଜିଲୋଙନ୍‌ ଞନଙ୍‌ତିୟ୍‌ମର୍ରନ୍‌ ଆନ୍ନିଙ୍‌ ତଡ୍‌ ।

29 ଗିୟ୍‌ବା, କେନ୍‌ ଅଡ଼୍‌କୋନ୍‌ ଆକାବାଡ଼ା ଇନ୍ନିଙ୍‌ ତଡ୍‌; କେନ୍‌ଆନିଞ୍ଜି ଇନ୍ନିଙ୍‌ ବର୍ରନ୍‌ ଅଃରପ୍ତିଏଜି କେନ୍‌ ଆମପ୍ରୁଜି ରିଙ୍ଗେନ୍‌ ଅନ୍ତମ୍‌ ।