1 ଉସିୟ ରାଜାନ୍‌ ଆର୍ରବୁଏନ୍‌ ଆବର୍ସେଙ୍ ଞେନ୍‌ ପ୍ରବୁନ୍‌ଆଡଙ୍‌ ଅବୟ୍‌ ଡେଙ୍ଗା ଡ ମନରଙ୍‌ କୁର୍ସିଲୋଙନ୍‌ ଆତଙ୍କୁମ୍‌ ଗିୟ୍‌ଲାୟ୍‌, ଆରି ଆ ରାଜାକାବନ୍‌ ସରେବାସିଙନ୍‌ ଆୟୁମ୍‌ୟୁମ୍‌ ଡକୋଏନ୍‌ । 2 ଆମଙ୍‌ବାନ୍‌ ସରାପଞ୍ଜି ତନଙେଞ୍ଜି; ଆନିଞ୍ଜି ତର୍ଡମ୍‌ ତୁଡ୍ରୁଲେକାୟ୍‌ କାପ୍ପାନ୍‌ ଡକୋଏନ୍‌; ତର୍ଡମ୍‌ ଅନବ୍‌ବାଗୁ କାପ୍ପା ବାତ୍ତେ ରମ୍ମଙ୍‌ ରମ୍ମଙ୍‌ ଆମୁକା ଅବ୍‌ସସଏଞ୍ଜି, ଅନବ୍‌ବାଗୁ ଆକାପ୍ପା ବାତ୍ତେ ଅଜଙନ୍‌ ଅବ୍‌ସସଏଞ୍ଜି ଆରି ଅନବ୍‌ବାଗୁ କାପ୍ପା ବାତ୍ତେ ଏଙେଞ୍ଜି । 3 ଆରି ଆନିଞ୍ଜି ତର୍ଡମ୍‌ ଅଲ୍‌ନୋଡ୍ଡେଲେ ବର୍ରଞ୍ଜି, "ପ୍ରବୁନ୍‌ ମଡ଼ିର୍‌, ମଡ଼ିର୍‌, ମଡ଼ିର୍‌; ସମ୍ପରା ପୁର୍ତିନ୍‌ ଆ ଗନୁଗୁ ପନେମେଙ୍‌ ଆବରିୟ୍‌ ।" 4 ତିଆଡିଡ୍‌ ଆସରଙଞ୍ଜି ଆସନଡ୍ଡା ବାତ୍ତେ ଡାରନ୍ନିବାନ୍‌ ଆଜିମିତାଲ୍‌ ତକରେନ୍‌ ଆରି ସରେବାସିଙନ୍‌ ଓମୋଡନ୍‌ ବାତ୍ତେ ବରିଜେନ୍‌ । 5 ସିଲତ୍ତେ ଞେନ୍‌ ବର୍ରନାୟ୍‌, "ୟୋଙ୍‌ ୟୋଙ୍‌ ! ଞେନ୍‌ ଅସେଡ୍‌ଲିୟ୍‌; ଇନିଆସନ୍‌ଗାମେଣ୍ତେନ୍‌ ଞେନ୍‌ ଏର୍‌ମଡ଼ିର୍‌ ତଅଡ୍‌ମର୍‌ ଆରି ଞେନ୍‌ ଏର୍‌ମଡ଼ିର୍‌ ତଅଡ୍‌ମରଞ୍ଜି ଆକେଜ୍ଜାଲୋଙ୍‌ ଡକୋତନାୟ୍‌; ଡେଲୋଜନଙ୍‌ଡେନ୍‌ ଅମଡ୍‌ଞେନ୍‌ ସଦାପ୍ରବୁ ରାଜାନ୍‌ଆଡଙ୍‌ ଗିଜେନ୍‌ !" 6 ତି ସିଲଡ୍‌ଲନ୍‌ ତି ଆ ସରାପଜି ଆମଙ୍‌ସିଲଡ୍‌ ଅବୟ୍‌ନେ ଅମଙ୍‌ବାଞେନ୍‌ ଏଙ୍‌ଲେ ଜିର୍ରାୟ୍‌, ଆସିଲୋଙନ୍‌ ଅବୟ୍‌ ଆରଡ଼େତୋଡନ୍‌ ଡକୋଏନ୍‌, ଆନିନ୍‌ ତନମ୍ପିଲନ୍‌ ସିଲଡ୍‌ ସିପାନ୍‌ ବାତ୍ତେ ତିଆତେ ପାଙେନ୍‌ । 7 ଆରି ଆନିନ୍‌ ତିବାତ୍ତେ ମୁକାଞେନ୍‌ ସୁଙେଲେ ବର୍ରନେ, "ଗିଜା, କେନ୍‌ଆତେ ତଅଡ୍‌ନମ୍‌ ସୁଙେଏନ୍‌, ଆରି ଡୋସାନମ୍‌ ସଙାଜେନ୍‌ ଆରି ଇର୍ସେନମ୍‌ କେମାନ୍‌ ଡେଏନ୍‌ ।" 8 ତିସିଲଡ୍‌ଲନ୍‌ ପ୍ରବୁନ୍‌ ଆସର୍ରଙ୍‌ ଞେନ୍‌ ଅମ୍‌ଡଙ୍‌ଲାୟ୍‌, "ଞେନ୍‌ ଆନା ଆପ୍ପାୟାୟ୍‌ ? ଆରି ଞେନ୍‌ ଆସନ୍‌ ଆନା ଇୟ୍‌ତେ ?" ସିଲତ୍ତେ ଞେନ୍‌ ବର୍ରନାୟ୍‌, "ଞେନ୍‌ ଡକୋ, ଞେନ୍‌ଆଡଙ୍‌ ଆପ୍ପାୟିନ୍‌ ।" 9 ସିଲତ୍ତେ ଆନିନ୍‌ ବର୍ରନେ, "ଜିରା ଡ କେନ୍‌ ଆକେଜ୍ଜାଆଡଙ୍‌ ବରାଜି, ଆମ୍ୱେଞ୍ଜି ଆଜାଡ଼ିନ୍‌ ଏଅମ୍‌ଡଙ୍‌ତେ, ବନ୍‌ଡ ଅଜ୍ଜନାବେନ୍‌ ଆରି ଆଜାଡ଼ିନ୍‌ ଏଗିୟ୍‌ତେ, ବନ୍‌ଡ ଅଜ୍ଜନାବେନ୍‌ । 10 କେନ୍‌ ଆମନ୍‌ରାଜି ରମ୍ମଙ୍‌ ରମ୍ମଙ୍‌ ଆମଡ୍‌ଲୋଙ୍‌ ଗିୟ୍‌ଲେ ଆରି ଅଲୁଡନ୍‌ ବାତ୍ତେ ଅମ୍‌ଡଙ୍‌ଲେ ଆରି ଉଗର୍‌ଲୋଙନ୍‌ ଜନାଲେ ଆବ୍‌ୟର୍‌ବଡ୍ଡିଲନ୍‌ ଏଙ୍ଗାଲେ ଅସୁକ୍କାଏଜି, ତିଆସନ୍‌ ଆମନ୍‌ ଆଉଗରଞ୍ଜି ରବ୍‌ଡୋଆ ଆରି ଆଲୁଡଞ୍ଜି ଅବ୍‌କାଲାଆ ଡ ଅବ୍‌ପିଡ୍‌ମଡାଜି ।" 11 ସିଲତ୍ତେ ଞେନ୍‌ ବର୍ରାୟ୍‌, "ଏ ପ୍ରବୁ, ଡିଅଙ୍ଗା ଡିନାଜାୟ୍‌ ଜାୟ୍‌ ?" ସିଲତ୍ତେ ଆନିନ୍‌ ଜାଲଙ୍‌ଲିଁୟ୍‌, ଗଡ଼ାଞ୍ଜି ଅନ୍‌ର୍ରଙ୍‌ ଅସେଡେନ୍‌ଜାୟ୍‌ ଆରି ମନ୍‌ରାନ୍‌ ଆରସେଡ୍‌ତେଞ୍ଜି ଜାୟ୍‌ । ବମନ୍‌ରାନିୟ୍‌ ମନ୍‌ରାନ୍‌ ଅସିଙନ୍‌ ଅଃଡକୋନେଞ୍ଜି ଜାୟ୍‌ କେନ୍‌ ଏନ୍ନେଲେ ଲୁମା । 12 ଆରି ପ୍ରବୁନ୍‌ ମନ୍‌ରାଞ୍ଜିଆଡଙ୍‌ ସଙାୟ୍‌ ଅଃନେମେଏଜି ଆରି ଡେସାଲୋଙନ୍‌ ଅମ୍‌ରେଙ୍‌ଲେ ଆଜନିର୍‌ ଆସନ୍ ତିଜାୟ୍‌ ଗୋଗୋୟ୍‌ତଡ୍ । 13 ଆରି ଡେସାଲୋଙନ୍‌ ଦସ ବନ୍ତା ସିଲଡ୍‌ ବବନ୍ତା ଡକୋଏନ୍‌ ଜନଙ୍‌ଡେନ୍‌, ତିଆତେ ଅନବ୍‌ଗୁରୁଡ୍ଡେନ୍‌ ଡେତେ; ଏଲା ଡ ଅଲୋନ ନୁବନ୍‌ ଅନଡନ୍‌ ଡେଏନ୍‌ ଜନଙ୍‌ଡେନ୍‌ ଏଙ୍ଗାଲେ ଆଗଣ୍ତିନ୍‌ ରଏତେ; ତିଅନ୍ତମ୍‌ ତି ମଡ଼ିର୍‌ କେଜ୍ଜାନ୍‌ କେନ୍‌ ଆକେଜ୍ଜା ଆଗଣ୍ତି ଅନ୍ତମ୍‌ ଡେତେ ।