1 ପ୍ରବୁନ୍‌ କେନ୍‌ ଆବର୍ନେ ବର୍ତନେ, "ରୁଆଙନ୍‌ ତରଙ୍ଗୁମ୍‌ଞେନ୍‌ ଆରି ପୁର୍ତିନ୍‌ ତାଲ୍‌ଜଙ୍‌ଞେନ୍‌ ଆଡ୍‌କୋ; ଆମ୍ବେଞ୍ଜି ଞେନ୍‌ ଆସନ୍‌ ଏଙ୍ଗାଗୋ ଆସିଙ୍‌ ଏଗୁତେ, ଅଙ୍ଗାଲୋଙ୍‌ ଲୋଲୋନେ ଜାଗାବେନ୍ ଡକୋ ? 2 ଇନିଆସନ୍‌ଗାମେଣ୍ଡେନ୍‌ କେନ୍‌ଅଡ଼୍‌କୋନ୍‌ ଅସିଞେନ୍‌ ବାତ୍ତେ ଗନବ୍‌ଡେଲନ୍‌ ଡେଏନ୍‌, ଆରି ତିଆସନ୍‌ କେନ୍‌ଅଡ଼୍‌କୋନ୍‌ ଗଡେଲେନ୍‌, କେନ୍‌ଆତେ ପ୍ରବୁନ୍‌ ବର୍ତନେ; ବନ୍‌ଡ କେନ୍‌ ଆମନ୍‌ରା ଆସନ୍‌ ଆଗରାମ୍‌ଗାମ୍‌ ଅଙ୍ଗା ଆମନ୍‌ରା ଡୁକି, ଲଗଡ୍‌ମର୍‌ ଆରି ଆନା ବର୍ନେଞେନ୍‌ ଅମ୍‌ଡଙ୍‌ଲେ ବତଙ୍‌ତେ ଆମଙ୍‌ବାନ୍‌ ଞେନ୍‌ ଗିୟ୍‌ଗିୟ୍‌ତାୟ୍‌ ।

3 ଆନା ତାଙ୍‌ଲେୟନ୍‌ ରବ୍ବୁତେ, ଆନିନ୍‌ ମନ୍‌ରାନ୍‌ ଆର୍ରବୁତେନ୍‌ ଅନ୍ତମ୍‌ ଡେତେ; ଆନା ମେଣ୍ଡାନ୍‌ ଅନମଙନ୍‌ ତିୟ୍‌ତେ, ଆନିନ୍‌ କିନ୍‍ସଡନ୍‍ ଆସଙ୍କା ଆଗ୍ରବ୍ବାତେନ୍‌ ଆମନ୍‌ରା ଅନ୍ତମ୍‌ ଡେତେ; ଆନା ଅନମଙନ୍‌ ସୋରୋପ୍ପାୟ୍‌ତେ, ଆନିନ୍‌ କିମ୍ବୋନନ୍‌ ଆମିଞାମ୍‌ ଆ ସରୋପ୍ପାୟ୍‌ତେନ୍‌ ଅନ୍ତମ୍‌ ଡେତେ ଆନା ଲଙିଡ୍‌ତରୁମୋଡନ୍‌ ସୟ୍‌ତେ ଆନିନ୍‌ ସନୁମନ୍‌ ଆସେଙ୍କେତେନ୍‌ ଅନ୍ତମ୍‌ ଡେତେ । ଓଓ, ଆନିଞ୍ଜି ଆ ତଙର୍‌ଡମଞ୍ଜିସେଡାଏଞ୍ଜି ଆରି ଆପରାନ୍ନାଞ୍ଜି ଆନିଞ୍ଜିଡମ୍‌ ଏଡ଼ୁର୍‌ମଡନ୍‌ ଆବର୍ନେଲୋଙ୍‌ ସର୍ଡାତଞ୍ଜି । 4 ଞେନ୍‌ ନିୟ୍‌ ଆନିଞ୍ଜି ଆସନ୍‌ ଡନଣ୍ଡାୟନ୍‌ ସେଡାତାୟ୍; ଆଡଣ୍ଡାୟଞ୍ଜି ଆନିଞ୍ଜି ମା ଞାଙ୍‌ତଜି; ଇନିଆସନ୍‌ଗାମେଣ୍ଡେନ୍‌ ଞେନ୍‌ ଅରୋଡ୍ଡେଲାଞଞ୍ଜି ଆଡିଡ୍‌ ଆନ୍ନିଙ୍‌, ଞେନ୍‌ ବରର୍ରନାଞନ୍‌ ଆଡିଡ୍‌ ଆନିଞ୍ଜି ଅଃନ୍ନମ୍‌ଡଙ୍‌ଲଜି; ବନ୍‌ଡ ଗନିୟ୍‌ଗିୟ୍‌ଲୋଙ୍‌ଞେନ୍‌ ଅଙ୍ଗାଆତେ ମନଙ୍‌ତଡ୍‌ ତିଆତେ ଆନିଞ୍ଜି ଲୁମେଞ୍ଜି ଆରି ଅଙ୍ଗାଲୋଙ୍‌ ଞେନ୍‌ ଅଃସର୍ଡାଇନ୍‌ ତିଆତେ ସେଡାଏଞ୍ଜି ।"

5 ଆମ୍ବେଞ୍ଜି ପ୍ରବୁନ୍‌ ଆବର୍ନେ ବତଙ୍‌ତବେନ୍‌, ଆମ୍ବେଞ୍ଜି ଆ ବର୍ନେନ୍‌ ଅମ୍‌ଡଙ୍‌ବା; ଅଙ୍ଗା ବୋଞାଙ୍‌ଜି ଆମନ୍‌ଆଡଙ୍‌ ସଙ୍ଗତାତମ୍‌ଜି, ଅଞୁମ୍‌ଞେନ୍‌ ଆସନ୍‌ ଆମ୍ବେଞ୍ଜିଆଡଙ୍‌ ସବ୍‌ଞାଙ୍‌ତବେଞ୍ଜି ଆନିଞ୍ଜି ବର୍ତଞ୍ଜି, ଇନ୍‌ଲେଞ୍ଜି ଏଙ୍ଗାଲେ ସନର୍ଡାବେନ୍‌ ଗିୟ୍‌ଲେ ଏରପ୍ତିତାୟ୍‌ ତିଆସନ୍‌ ପ୍ରବୁନ୍‌ ସନେନ୍‌ସେନନ୍‌ ଡେଏତୋ, ବନ୍‌ଡ ଆନିଞ୍ଜି ଗରୟ୍‌ତଜି । 6 ଗଡ଼ାନ୍‌ ସିଲଡ୍‌ ବନାବ୍‌ବାବନ୍‌, ସରେବାସିଂଲୋଙନ୍‌ ସନଡ୍ଡାନ୍‌, ଆନା ଆବନେରାମରଞ୍ଜିଆଡଙ୍‌ ଡୁଲ୍‌ତଞ୍ଜି କେନ୍‌ ପ୍ରବୁନ୍‌ ଆସର୍ରଙ୍‌ ।

7 ଅନ୍‌ରଙ୍‌ ବତାଏନ୍‌ ଆନିନ୍‌ ଆମ୍ମୁଙ୍‌ କୋଡେନ୍‌, କୋକୋଡନ୍‌ ବତାନ୍‌ ଅନ୍‌ରଙ୍‌ ଡେଏନ୍‌ ଓବ୍ବାସିଜନ୍‌ କୋଡ୍‌ତେ । 8 ଏନ୍ନେଗନ୍‌ ଆବର୍ନେ ଆନା ଅମ୍‌ଡଙେଞ୍ଜି ? ଏନ୍ନେଗନ୍‌ ଆବର୍ନେ ଆନା ଗିଜେନ୍‌ ? କେନ୍‌ ଆଡିନ୍ନା ପଙ୍‌ ଅନ୍ନିଙ୍‌ ଆଡେସାରେନ୍‌ କୋଡ୍‌ତଜି ? ଅନ୍ନିଙ୍‌ ଆକେଜ୍ଜାମର୍‌ ପଙ୍‌ ଆବସାଣ୍ଡନ୍‌ କୋଡ୍‌ତଜି ? ସିଓନନ୍‌ କୋକୋଡନ୍‌ ବତାନ୍‌ ଡେଏନ୍‌ତୁମ୍‌ଡେନ୍‌, ଆଇନ୍‌ ଆ ଡାଙ୍ଗାଡ଼ାଅନଞ୍ଜି କୋଡ୍‌ତଜି । 9 ପ୍ରବୁନ୍‌ ବର୍ତନେ, ଞେନ୍‌ କୋକୋଡନ୍‌ ବତାନ୍‌ ଏମ୍ମେଡା ପଙ୍‌ ଏନବ୍‌ କୋକୋଡାୟ୍‌ ? ଇସ୍ୱରବେନ୍‌ ବର୍ତନେ, ଞେନ୍‌ ଏନବ୍‌କୋକୋଡ୍‌ତାଜି, ଞେନ୍‌ ପଙ୍‌ ଅଃନବ୍‌ ଆଜ୍ଜାଆଜି ?

10 ଏ ଜିରୁସାଲମନ୍‌ ଅଡ୍ରୁଙ୍‌ୟମ୍‌ତେ ଆମନ୍‌ରାଜି ଅଡ଼୍‌କୋନ୍‌, ଆମ୍ବେଞ୍ଜି ଆନିନ୍‌ ସରିନ୍‌ ସର୍ଡାନାବା ଆରି ଆନିନ୍‌ ଆସନ୍‌ ମଅୟ୍‌ନାବା; ଆବର୍ନେନ୍‌ ଆସନ୍‌ ଏଡ୍ରୁକତନ୍‌ ଆମନ୍‌ରାଜି ଅଡ଼୍‌କୋନ୍‌, ଆମ୍ବେଞ୍ଜି ସର୍ଡାନ୍‌ ଆସନ୍‌ ଆନିନ୍‌ ସରିନ୍‌ ମଅୟ୍‌ନାବା;

11 ତିଆସନ୍‌ ଆମ୍ବେଞ୍ଜି ମା ଆ ସନୟୁନ୍‌ ଅନ୍ତମ୍‌ ମେମେଅନ୍‌ବଜନ୍‌ ମେମେଲେ ବବ୍‌ୟୁତେ; ଆମ୍ବେଞ୍ଜି ମେମେନ୍‌ ଗାଲେ ସର୍ଡାତବେନ୍‌ ।

12 ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍‌ କେନ୍‌ ଆବର୍ନେ ବର୍ତନେ, ଗିୟ୍‌ବା, ଞେନ୍‌ ଆମଙ୍‌ବାନ୍‌ ଅଲନ୍‌ ଅନ୍ତମ୍‌ ସନୟୁ ଡୁଙ୍‌ଡମ୍‌ନେଡାନ୍‌ ଅନ୍ତମ୍‌ ବଡେସାବାଜି ଆନର୍ଜେରେଙ୍‌ ଏଅବ୍‌ପେପେବା, ଆରି ଆମ୍ବେଞ୍ଜି ତେତ୍ତେ ଏମେମେଅନ୍‌ତନ୍‌ ଆରି ଆମ୍ବେଞ୍ଜି ତାରଙ୍‌ଲୋଙନ୍‌ ବୋୟ୍‌ତବେଞ୍ଜି ଆରି ମେଡଡ଼ିଲୋଙନ୍‌ ଅବ୍‌ତଙ୍‌ତବେନ୍‌ । 13 ଏଙ୍ଗାଲେ ଅବୟ୍‌ନେ ଆୟୋଙନ୍‌ ବବ୍‌ୟୁତେ, ତି ଅନ୍ତମ୍‌ ଞେନ୍‌ ଆମ୍ବେଞ୍ଜିଆଡଙ୍‌ ବବ୍‌ୟୁତବେନ୍‌ ଆରି ଆମ୍ବେନ୍‌ ଜିରୁସାଲମଲୋଙନ୍‌ ବନବ୍‌ୟୁନ୍‌ ଏଞାଙ୍‌ତେ । 14 ଆମ୍ବେନ୍‌ କେନ୍‌ଆତେ ଏଗିୟ୍‌ତେ ଆରି ଉଗ୍‌ଗର୍‌ବେନ୍‌ ସର୍ଡାତେ, ଆରି ଅଜାଙ୍‌ବେନ୍‌ ଅଜିଙଞ୍ଜି ଅନ୍ତମ୍‌ ଅଜାଙ୍‌ବେନ୍‌ ରଡୋତେ; ଆରି ପ୍ରବୁନ୍‌ ଆସିଆ କମ୍ବାରିମରଞ୍ଜି ଆଡନେଗଡ୍‌ ଡେତେ ଆରି ଆନିନ୍‌ ଆ ବନେରାମରଞ୍ଜି ଆସଙ୍ଗତାଲୋଙ୍‌ ବନ୍‌ରାବ୍‌ଞେନ୍‌ ଡେତେ ।

15 ଇନିଆସନ୍‌ଗାମେଣ୍ଡେନ୍‌ ଆଡୁଡୁତୋଡନ୍‌ ଅନ୍ତମ୍‌ ବନ୍‌ରାବ୍‌ଞେନ୍‌ ବାତ୍ତେ ଗନବ୍‌ରୟ୍‌ଞେନ୍‌ ଡନୁଲନ୍‌ ଆସନ୍‌ ପ୍ରବୁନ୍‌ ତଗୋନ୍‌ ଅନ୍ତମ୍‌ ଜିର୍ତାୟା ଆରି ଆରତ୍ତାଞ୍ଜି ଅଡ଼୍‌କୋନ୍‌ ଗାବ୍‌ୟାର୍‌ରିଙନ୍‌ ଅନ୍ତମ୍‌ ଡେତେ । 16 ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍‌ ଆତଗୋ ବାତ୍ତେ ଡ ତର୍ଡମ୍‌ ଆ କଡ଼ିବ୍‌ ବାତ୍ତେ ଅଡ଼୍‌କୋ ପୁର୍ତିନ୍‌ ସରିନ୍‌ ଗଡ଼େଏନ୍‌ ଏଗବ୍‌ରିବ୍‌; ତେତ୍ତେ ପ୍ରବୁନ୍‌ ଆସି ବାତ୍ତେ ଆର୍ରବୁଏଞ୍ଜି ଆମନ୍‌ରାଜି ଗୋଗୋୟ୍‌ନେ ଡେତଜି ।

17 ପ୍ରବୁନ୍‌ ବର୍ତନେ, ଆନାଜି ମଡ୍ଡିନ୍‌ ଡକୋଡାଲନ୍‌ ଅବୟ୍‌ ମନ୍‌ରାନ୍‌ ସଣ୍ଡୋଙ୍‌ଲେ କୋତ୍ତାନ୍‌ ଆନିୟ୍‌ ଆସନ୍‌ ଆନିଞ୍ଜିଡମ୍‌ ମଡ଼ିର୍‌ ଡ ଗନବରେଡତଞ୍ଜି, ଆନିଞ୍ଜି କୁମ୍ବୋନ୍‌ ଜେଲନ୍‌ ଡ ଅରର୍‌ସମିୟ୍‌ଡାନ୍‌ ଆ ଜିନିସଜି ଡ କୁମ୍ବୁଲନ୍‌ ଜୋମ୍‌ତଜି, ଆନିଞ୍ଜି ଆବସାଣ୍ଡନ୍‌ ଅସେଡ୍‌ତଜି । 18 ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆକାବଡ଼ାଞ୍ଜି ଡ ଆନିୟମଞ୍ଜି ଜନା, ଅଡ଼୍‌କୋନ୍‌ ଆଡେସାବାଜି ଆରି ଆନ୍ନା ଲଙ୍‌ଲଙ୍‌ ଆମନ୍‌ରାଜିଆଡଙ୍‌ ଇନ୍‌ଲେଞ୍ଜିଆଡଙ୍‌ ଅନବ୍‌ରୁକ୍କୁନ୍‌ ଆବେଡ଼ା ଅଡ଼ୋଲାୟ୍‌ ଆରି ଆନିଞ୍ଜି ଜିର୍ରେ ଞେନ୍‌ଆଡଙ୍‌ ଗନୁଗୁପନେମେଙ୍‌ଞେନ୍‌ ଗିୟ୍‌ତଜି । 19 ଞେନ୍‌ ଆମଙ୍‌ଲୋଙଞ୍ଜି ଅବୟ୍‌ ଅରମ୍ମଡନ୍‌ ଡକ୍କୋତାୟ୍‌ ଆରି ଆନିଞ୍ଜିଲୋଙ୍‌ ସିଲଡ୍‌ ଆନାଜି ଡନୋବନ୍‌ ଆଞରାଙେଞ୍ଜି ଆମନ୍‌ରାଜିଆଡଙ୍‌ ଞେନ୍‌ ଆନ୍ନା ଆନ୍ନା ଡେସାବାଜି ଆମଙ୍‌ବା, ତର୍ସିସନ୍‌, ପୁଲନ୍‌, ଡ ଲୁଦନ୍‌, ଆନାଜି ଞାଙାଞମ୍‌ମରନ୍‌, ତୁବଲନ୍‌ ଡ ଜବନନ୍‌, ସଙାୟ୍‌ ମଡ୍ଡି ସମେଁୟ୍‌ଣ୍ଡ୍ରାନ୍‌ ଆମନ୍‌ରାଜି ଆଙ୍ଗିୟ୍‌ ବର୍ନେଲେନ୍‌ ଅନ୍‌ରଙ୍‌ ଅମ୍‌ଡଙେଜି, ଅଡ଼େ ବୋର୍ସଞେନ୍‌ ଆଙ୍ଗିୟ୍‌ ଗିଜେଞ୍ଜି, ଆମନଙ୍‌ବାଞ୍ଜି ଏଅପ୍ପାୟ୍‌ବାଜି ଆରି ଆନିଞ୍ଜି ଆନ୍ନା ଆନ୍ନା ବଡେସାବାଜି ଆମଙ୍‌ଲୋଙ୍‌ ଗୁନୁଗୁପନେମେଙ୍‌ଞେନ୍‌ ଜନାଏତଜି । 20 ପ୍ରବୁନ୍‌ ବର୍ତନେ, ଇସ୍ରାଏଲନ୍‌ ଆ ଅନ୍‌ଞ୍ଜି ଏଙ୍ଗାଲେ ମଡ଼ିର୍‌ ସିମ୍ମାଲୋଙନ୍‌ ପ୍ରବୁନ୍‌ ଆସିଙ୍‌ ତନିୟ୍‌ତିୟନ୍‌ ପାଙ୍‍ତାଜି ତିଅନ୍ତମ୍‌ ଆନିଞ୍ଜି ବୋଞାଙ୍‌ବେଞ୍ଜି ଅଡ଼୍‌କୋମନ୍‌ରାନ୍ ପ୍ରବୁନ୍‌ ଆସନ୍‌ ତନିୟ୍‌ତିୟନ୍‌ ଆସନ୍‌ ଅଡ଼୍‌କୋ ଡେସାବଜିଆମଙ୍‌ଲୋଙ୍‌ସିଲଡ୍‌ ଆଜିଞ୍ଜି କୁର୍ତାନ୍‌, ରତ୍ତାନ୍‌, ଡ ଚଉଦଡ଼ନ୍‌, ଗୋଡୋଞନ୍‌ ଆରି ଡଡଡ୍‌ ଆଜିର୍ତେନ୍‌ ଆଜନ୍ତୁଜି ଆଉପରେଙ୍‌ ମଡ଼ିର୍‌ ବରୁଲୋଙ୍‌ଞେନ୍‌ ଜିରୁସାଲମ୍‌ବା ପାଙ୍‍ତାଜି । 21 ଞେନ୍‌ ଆମଙ୍‌ଲୋଞଞ୍ଜିଲୋଙ୍‌ ରାଓଡ଼ାନ୍‌ ଡ ଲେବିଅନ୍‌ ଆଡନେ ଆସନ୍‌ ମନ୍‌ରାଞ୍ଜି ଏଜାବାଜି ।

22 ଞେନ୍‌ ଅଙ୍ଗା ରଙ୍‌ ରୁଆଙନ୍‌ ଡ ରଙ୍‌ ପୁର୍ତିନ୍‌ ବୋର୍ସାଞେନ୍‌ ବାତ୍ତେ ଗବ୍‌ଡେଲ୍‌ତାୟ୍‌, ତିଆତେ ଏଙ୍ଗାଲେ ମୁକାବାଞେନ୍‌ ନଗରିଡେତେ, ତି ଅନ୍ତମ୍‌ କେଜ୍ଜାବେଞ୍ଜି ଡ ଅଞୁମ୍‌ବେଞ୍ଜି ନଗରିଡେତେ । କେନ୍‌ ଆତେ ପ୍ରବୁନ୍‌ ବର୍ତନେ । 23 ଅବୟ୍‌ ଅମାସିଆନ୍‌ ସିଲଡ୍‌ ଆରି ଅବୟ୍‌ ଆ ଅମାସିଆନ୍‌ ଜାୟ୍‌ ଆରି ଅବୟ୍‌ ତରୋଲୋନେ ଡିନ୍ନାନ୍‌ ସିଲଡ୍‌ ଆରି ଅବୟ୍‌ ଆ ଲରୋଲୋନେ ଡିନ୍ନାନ୍‌ ଜାୟ୍‌ ପୁର୍ତଲୋଙନ୍‌ ଡକୋନ୍‌ ଅଡ଼୍‌କୋନ୍‌ ଞେନ୍‌ଆଡଙ୍‌ ଆସନେଙ୍କେ ଆସନ୍‌ ଜିର୍ତାଜି । 24 ଆନିଞ୍ଜି ଡାଣ୍ଡନ୍‌ ଡୁଙ୍‌ଲନ୍‌, ଆନାଜି ସଙ୍ଗତାଲୋଙ୍‌ଲେନ୍‌ ଏର୍‌ଡରମ୍ମ କାବ୍ବାଡ଼ାନ୍‌ ଲୁମ୍‌ତଜି, ତି ଆମନ୍‌ରାଜି ଆମରା ଗିୟ୍‌ତଜି; ଇନିଆସନ୍‌ଗାମେଣ୍ଡେନ୍‌ ଆ ଡଅଙ୍‌ଲୋଞଞ୍ଜି ଆ ବୋବୋଡନ୍‌ ଅଃର୍ରବୁଏଜି; ଆରି ଆନିଞ୍ଜି ଅଡ଼୍‌କୋ ମନ୍‌ରାଞ୍ଜି ଆଗନିୟ୍‌ଗିୟ୍‌ଲୋଙ୍‌ କରୋଡ଼େଡାନ୍‌ ଡେତଜି ।