ଜିସାୟନ୍
1 ସିଲତ୍ତେ ପ୍ରବୁନ୍ ଞେନ୍ଆଡଙ୍ ବର୍ରିୟ୍, "ଆମନ୍ ଅବୟ୍ ସୋଡ଼ା ଅରିଡଲ୍ ପଟାନ୍ ପାଙ୍ଲେ ସୋଡ଼ାରା ଅକିଅରନ୍ ବାତ୍ତେ କେନ୍ ଆବର୍ନେ ଇଡା, ମଏର-ସାଲଲଆସ୍-ବସ୍ ଜନୁରୁନ୍ ଲଜିର୍ତାୟ୍, ଜନୁରୁନ୍ ଜନବନ୍ ଲଜିର୍ତେ । 2 ଆରି, ସାକି ଞେନ୍ ଆସନ୍ ଉରିୟ ରାଓଡ଼ାନ୍ ଡ ଜିବୋରିକିୟନ୍ ଆଡାଙ୍ଗାଡ଼ାଅନ୍ ଜିକରିୟନ୍ଆଡଙ୍ ଞେନ୍ ଡର୍ନେମର୍ ଆ ସାକି ଏମ୍ମେତାୟ୍ ।" 3 ତି ସିଲଡ୍ଲ୍ଲନ୍ ଞେନ୍ ପୁର୍ବାଃତେବର୍ନେବଜନ୍ ସରିନ୍ ଏଡକୋଲନାୟ୍, ଆନିନ୍ ତିଲ୍କୋଡେନ୍ ଆରି ଅବୟ୍ ଓବ୍ବାସିଜନ୍ କୋଡେନ୍ । ସିଲତ୍ତେ ପ୍ରବୁନ୍ ଞେନ୍ଆଡଙ୍ ବର୍ରିୟ୍, "ଆଞୁମନ୍ ମଏର-ସାଲଲଆସ୍-ବସ୍ ଅବ୍ଞୁମା । 4 ଇନିଆସନ୍ଗାମେଣ୍ତେନ୍ ପସିଜନ୍ ଆପେୟ୍ଞେନ୍ ଅୟୋଙ୍ଞେନ୍ ଗାମ୍ଲେ ଅନୋଡ୍ଡେନ୍ ଅନ୍ରଙ୍ ଗୟେନ୍ ଆମ୍ମୁଙ୍ ଦମେସକନ୍ ଆନର୍ଜେ ଆରି ସମରିୟାନ୍ ଆଜନୁରୁ ଅସୁର ରାଜାନ୍ ଆମ୍ମୁଙ୍ ଆମ୍ମୁଙ୍ ବୋୟ୍ଲେ ପନାଙନ୍ ଡେତେ ।"
ଅସୁର ରାଜାନ୍ ଆ ଜନୁରୁ
5 ତି ସିଲଡ୍ଲ୍ଲନ୍ ପ୍ରବୁନ୍ ଞେନ୍ଆଡଙ୍ ଆରି ବତର ବର୍ରିୟ୍ । 6 "କେନ୍ ଆମନ୍ରାଜି ସିଲୋନ୍ ସିଲଡ୍ ଲବିଡ୍ଡା ଆପ୍ରେତେନ୍ ଆ ଡାଆ ଅମ୍ରେଙ୍ଡାଲେ ରତ୍ସିନନ୍ ଡ ରମଲିଅନ୍ ଆଡାଙ୍ଗାଡ଼ାଅନ୍ ଆମଙ୍ ସର୍ଡାତଞ୍ଜି; 7 ତିଆସନ୍ ଗିଜା, ପ୍ରବୁନ୍ ନମି ଅଲନ୍ ଆଗଗଡା, ଗୋଗୋୟ୍ ଡାଆନ୍ ଅନ୍ତମ୍ ଅସୁର ଆରାଜାନ୍ଆଡଙ୍ ଡ ଆଗନୁଗୁନ୍ଆଡଙ୍ ଅଡ଼୍କୋନ୍ ଆଉପ୍ରେଙ୍ଲୋଙଞ୍ଜି ପାଙ୍ତାଜି; ସିଲତ୍ତେ ଆନିନ୍ ପରାତ ଅନାଡାନ୍ ଆତୋଣ୍ତୁ ଅଡ଼୍କୋନ୍ ବରିୟ୍ଡାଲେ ପେତେ । 8 ଆରି ଗଗଡାନ୍ ତାରଙନ୍ ଜାୟ୍ ଆଡ୍ରୋତନ୍ ଅନ୍ତମ୍ ଆନିଞ୍ଜି ସମ୍ପରା ଜିଉଦା ଡେସାନ୍ ଜାୟ୍ ଜିର୍ତେ ।"
ଆରି ଏ ଇମାନୁଏଲ୍ ଆରୁର୍ରାତେନ୍ ଆଡେନ୍ନା ଡେସାବେନ୍ ବକୁନେ ସିଲଡ୍ ଆରି ବକୁନେ ଜାୟ୍ ୟୁମ୍ଲେ ଡକ୍କୋତେ । 9 ଏ କେଜ୍ଜାଞ୍ଜି ଅଡ଼୍କୋନ୍, ଆମ୍ୱେଞ୍ଜି ୟୋଙ୍ୟାଙ୍ଲେ ଅମ୍ମେନାବା, ଆମ୍ୱେଞ୍ଜି ଅସେତବେନ୍; ଆରି, ଏ ସଙାୟ୍ ଡେସାବାଜି ଅଡ଼୍କୋନ୍, ଆମ୍ୱେଞ୍ଜି ଅମ୍ଡଙ୍ବା; ଆମ୍ୱେଞ୍ଜି ରେଡ୍ଡୁବ୍ନାବା, ବନ୍ଡ ଅସେଡ୍ତବେନ୍ । 10 ଆମ୍ବେନ୍ ରୁକ୍କୁଲନ୍ କଡାଡ଼ିନାବା, ବନ୍ଡ ତିଆତେ କାଜ୍ଜାନ୍ ଡେତେ; ଏବର୍ତନେ, ବନ୍ଡ ତିଆତେ ଅଃଗରିଏ; ଇନିଆସନ୍ଗାମେଣ୍ତେନ୍ ଇସ୍ୱରନ୍ ଇନ୍ଲେଞ୍ଜି ସରିନ୍ ଡକୋ ।
ଇସ୍ୱରନ୍ ଆବନାଁୟ୍
11 ଇନିଆସନ୍ଗାମେଣ୍ତେନ୍ ପ୍ରବୁନ୍ ଆବୋର୍ସା ଅସିନ୍ ବାତ୍ତେ ଞମ୍ଲେ ଞେନ୍ଆଡଙ୍ କେନ୍ଅନ୍ତମ୍ ବର୍ରିୟ୍ ଡ ଞେନ୍ ଏଙ୍ଗାଲେ କେନ୍ ଆମନ୍ରାଜି ଆତଙର୍ଗଡ୍ ଅଃତଙିୟ୍ନାୟ୍, ତିଆସନ୍ ଞେନ୍ଆଡଙ୍ ବାଁୟ୍ଲେ ବର୍ରିୟ୍, 12 କେନ୍ ଆମନ୍ରାଜି ଅଙ୍ଗା ଅଡ଼୍କୋନ୍ ଆବିସୟ କଡାଡ଼ି ଗାମ୍ଲେ ବର୍ତଞ୍ଜି; ଆମ୍ୱେଞ୍ଜି ତିଅଡ଼୍କୋନ୍ କଡାଡ଼ି ଗାମ୍ଲେ ଏବର୍ଡଙ୍ନେ; ଅଡ଼େ ଆବନତଙ୍ଙଞ୍ଜି ଆବିସୟ ଆମ୍ୱେଞ୍ଜି ବତଙ୍ଡଙ୍ବେନ୍, ଅଡ଼େ ତି ଆ ବିସୟଲୋଙ୍ ବତଙ୍ଡଙ୍ବେନ୍ । 13 ପ୍ରବୁନ୍ଆଡଙ୍ ତୁମ୍ ଆମ୍ୱେଞ୍ଜି ମଡ଼ିର୍ ଗାମ୍ଲେ ମାନ୍ନେବା, ଆରି ଆନିନ୍ ବତଙ୍ ଡରକୋନେବେନ୍ ଡେଏତୋ ଆରି ଆନିନ୍ ଆମ୍ୱେଞ୍ଜି ବତଙେତଜି । 14 ତିସିଲଡ୍ଲ୍ଲନ୍ ଆନିନ୍ ମଡ଼ିର୍ ଡରକୋନେନ୍ ଅନ୍ତମ୍ ଡେତେ, ବନ୍ଡ ଇସ୍ରାଏଲ କେଜ୍ଜାନ୍ଆଡଙ୍ ତନୁଡ୍ଡୁବ୍ ଅରେଙନ୍ ଡ ପନାବ୍ରା ଅରେଙନ୍ ଡେତେ, ଜିରୁସାଲମ୍ବାୟ୍ଜି ଆସନ୍ ପାସନ୍ ଡ ଜନ୍ତାନ୍ ଅନ୍ତମ୍ ଡେତଜି । 15 ଆରି ଲାଙ୍ଲେଡ୍ ମନ୍ରାନ୍ ତୁଡ୍ଡୁବ୍ତଜି ଆରି ତୁଡ୍ଡୁବ୍ଲେ ପଲାଙ୍ତଜି ଆରି ତନୋର୍ଲୋଙନ୍ ଗଲୋଲେ ଞନମ୍ଡାତଜି । 16 ଆମନ୍ ସାକିବରନ୍ ଜିବାଡା, ଞଙ୍ନେମର୍ଞେଞ୍ଜି ଆମଙ୍ଲୋଙ୍ ବନାଁୟ୍ବରନ୍ ସିଲୁଆ । 17 ଆରି, ଆନା ଜାକୁବନ୍ ଆକେଜ୍ଜା ସିଲଡ୍ ଆମୁକାନ୍ ଅବ୍ସସତେ, ଞେନ୍ ତି ଆ ସଦାପ୍ରବୁଆଡଙ୍ ଜଗ୍ଗେତାୟ୍ ଆରି ଆନିନ୍ଆଡଙ୍ ଆଙାଙ୍ଲେ ଡକୋତନାୟ୍ ।
18 ଗିଜା, ଞେନ୍ ଡ ପ୍ରବୁନ୍ ବାତ୍ତେ ଞେନ୍ଆଡଙ୍ ତନିୟନ୍ ଆଡ୍ରେନ୍ ଆପସିୟ୍ଜି ସିଓନ ବରୁନ୍ ଆଡ୍ରକୋତଞ୍ଜି ଆମନ୍ରାଜି ପ୍ରବୁନ୍ ଆମଙ୍ସିଲଡ୍ ଇସ୍ରାଏଲଞ୍ଜି ଆସନ୍ ଅରମ୍ମଡନ୍ ଡ ସରାନ୍ନିଡାନ୍ ଆରମ୍ମଡ୍ ଅନ୍ତମ୍ ଡକୋ ।
19 ବନ୍ଡ ମନ୍ରାଞ୍ଜି କରମ୍ମାଗିୟ୍ମରଞ୍ଜି ଡ ତନେୟ୍ମରଞ୍ଜି ଆମଙ୍ କେନ୍ ଆବର୍ନେ ସାୟ୍ବା ଗାମ୍ଲେ ଅଙ୍ଗାଆଡିଡ୍ ଡଅଙ୍ବେନ୍ ବର୍ତବେଞ୍ଜି, ସିଲତ୍ତେ ମନ୍ରାଞ୍ଜି ଆନିଞ୍ଜିଡମନ୍ ଆ ଇସ୍ୱରଅଃସାଜେଜି ପଙ୍ ? ଇନିଆସନ୍ଗାମେଣ୍ତେନ୍ ଆନିଞ୍ଜି ଆମେଙ୍ମରଞ୍ଜି ଆସନ୍ ଡନ୍ନେଲେ ଆରବୁମରଞ୍ଜିଆଡଙ୍ ଅଃସାଜେଜି ?
20 ବନାଁୟ୍ବରନ୍ ଡ ସାକିବରନ୍ ସାୟ୍ବା । ଅସମୟ୍ ଆନିଞ୍ଜି କେନ୍ ଆବର୍ନେ ଅନ୍ତମ୍ ଅଃବର୍ରିୟ୍ଡେନ୍, ତିଡେନ୍ ଆଜାଡ଼ିନ୍ ଆନିଞ୍ଜି ଆସନ୍ ଇନ୍ନିଙ୍ ବରାଁୟ୍ବାଁୟ୍ତଡ୍ ।
ଏର୍ରମନଙ୍ ଡିନ୍ନାନ୍
21 ଆରି ଆନିଞ୍ଜି ପରାନ୍ଡଣ୍ଡନ୍ ଡ ଡୋଲେଜନ୍ ବାତ୍ତେ ଡେସାନ୍ ଆମଡ୍ଡିଗଡ୍ ତଙିୟ୍ଲନ୍ ଜିର୍ତଜି, ଆନିଞ୍ଜି ଡୋଲେଜନ୍ ଆସନ୍ ଆବନ୍ର୍ରାବ୍ ଆ ରାଜାନ୍ ଡ ଆ ଇସ୍ୱରଞ୍ଜିଆଡଙ୍ ସୟ୍ପଲେ ରୁଆଙନ୍ ତର୍ଡମ୍ ତର୍ଡମ୍ ଆଙାଙାଞେଞ୍ଜି । 22 ଆରି, ଆନିଞ୍ଜି ଲବନ୍ ଆଙ୍ଗାଙ୍ତଜି ବନ୍ଡ ଡଣ୍ତନ୍ ଡ ଲୋଙଡନ୍, ବରନ୍ତଙ୍ଡାନ୍ ଆଲୋଙଡ୍ ଗିୟ୍ତଜି; ଆରି ଆନିଞ୍ଜି ଜବ୍ର ଲୋଙଡ୍ରେଙନ୍ ଗନଙ୍ତିଡନ୍ ଡେତଜି ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)