1 ଏ଼ ଦିନା ନୀନୁ ଏଲେଇଞ୍ଜି, ହେ଼ ପ୍ରବୁ, ନା଼ନୁ ନିଙ୍ଗେ ଜହରା କିୟାଇଁ; ଇଚିହିଁ ନୀନୁ ନାଙ୍ଗେ କାର୍‌ବି ଆ଼ହାମାଞ୍ଜାତି, ନୀ କାର୍‌ବି ହିତ୍‌ଡ଼ି ଆ଼ହାମାନେ ଅ଼ଡ଼େ ନୀନୁ ନାଙ୍ଗେ ସା଼ସା ହୀହିମାଞ୍ଜାଦି। 2 ମେହ୍‌ଦୁ, ମାହାପୂରୁ ମା଼ ଗେଲ୍‌ପାନାସି; ମା଼ର ନାମିନ ଅ଼ଡ଼େ ଆଜାଆପ; ଇଚିହିଁ ଜିହବା ପ୍ରବୁ ମା଼ ବା଼ଡ଼୍‌ୟୁ ଅ଼ଡ଼େ ପା଼ଚୁ; ଇଞ୍ଜାଁ ଏ଼ୱାସି ନା଼ ଗେଲ୍‌ପାନାସି ଆ଼ହାମାନେସି। 3 ଏ଼ଦାଆଁତାକି ମୀରୁ ରା଼ହାଁ ତଲେ ଗେଲ୍‌ପିନି କୁହିଟି ଏ଼ୟୁ ରେଜେରି।

4 ଇଞ୍ଜାଁ, ଏ଼ ଦିନାତା ମୀରୁ ଏଲେଇଞ୍ଜେରି, "ପ୍ରବୁତି ଜହରା କିଦୁ, ଅ଼ଡ଼େ ତାନି ଦ଼ରୁତା ପ୍ରା଼ତାନା କିଦୁ, କୂଡ଼ା ବିତ୍ରା ତାନି କାମା ବାରେ ୱେ଼କ୍‌ଦୁ, ତାନି ଦ଼ରୁ କାଜାୟି ଇଞ୍ଜିଁ ୱେ଼କ୍‌ଦୁ। 5 ପ୍ରବୁ ତାକି ପା଼ଚାଦୁ; ଇଚିହିଁ ଏ଼ୱାସି ଗା଼ୱୁରମିଗାଟି କାମା କିହାମାନେସି; ଏ଼ଦି ବାରେ ଦାର୍‌ତିତା ପୁଣ୍‌ମ୍ବି ଆ଼ପେ। 6 ଏ଼ ସିୟନତା ବାସା କିହାମାନି ଲ଼କୁ, ମୀରୁ କାଜା ଗିୟାଁ ତଲେ ରା଼ହାଁତି ପା଼ଚୁ ପା଼ଚାଦୁ; ଇଚିହିଁ ଆମ୍ବାଆସି ଇସ୍ରାୟେଲ ଦାର୍ମୁତି ମାହାପୂରୁ ଏ଼ୱାସି ମୀ ବିତ୍ରା କାଜାସି।"