Isaías 29

ଜିରୁସାଲମ ଗୂର୍‌ନାୟି

1 ଅହ଼ତା, ଅରିୟେଲ, ଅରିୟେଲ ଦାୱୁଦତି ସାହ୍‌ଡ଼ାଗାଟି ଗା଼ଡ଼ା! ବାର୍ସା ତାକି ବାର୍ସା ଆଟ୍‌ହେମାଞ୍ଜୁ, ପାର୍ବୁୟାଁ ତାନି ପା଼ଲି ତାକି ପା଼ଲି ମା଼ନୱି ଆ଼ଦୁ; 2 ଏ଼ଦାଆଁତାକି ନା଼ନୁ ଅରିୟେଲକି ଦୁକୁ ପାଣ୍ତିଇଁ, ଏଚେଟିଏ ଦୁକୁ ଅ଼ଡ଼େ ଡ଼ୀକି ଆ଼ନେ ଅ଼ଡ଼େ ଏ଼ଦି ନା଼ ତାକି ଅରିୟେଲ*29:2 ଅରିୟେଲ/ହୂଡିନି ପିଣ୍ତା ସମାନା ଆ଼ନେ। 3 ଇଞ୍ଜାଁ, ନା଼ନୁ ସା଼ରିୱାକି ନୀ କ଼ପାଟି ସାହ୍‌ଡ଼ାୟାଁ କିୟାଇଁ କ଼ଟା କିହାଁ ନିଙ୍ଗେ ଗୂର୍‌ତାଇଁ ଅ଼ଡ଼େ ନୀ କ଼ପାଟି ମୁଚାଲି ଊପେୟି ତିୟାରା କିଇଁ। 4 ଏଚେଟିଏ ନୀନୁ ବୂମିତା ରିହାଁ ଡ଼ୟିଦି, ଅ଼ଡ଼େ ବୂମିଟି କାତା ଆ଼ଦି ଅ଼ଡ଼େ ଦୂଡ଼ିଟି ନୀ ହା଼ଡା ଊଣା ଗିୟାଁ ୱା଼ନେ; ବୂତୁୟାଁ ଲେହେଁ ନୀ ହା଼ଡା ବୂମିଟି ହ଼ନେ, ଅ଼ଡ଼େ ଦୂଡ଼ିଟି ନୀନୁ ଗୁଣୁ ଗୁଣୁ କାତା ଆ଼ଦି।

5 ସାମା ନୀ ସାତ୍ରୁୟାଁତି ଲ଼କୁ ପା଼ତାଡ଼ା ଦୂଡ଼ି ଲେହେଁ ଆ଼ନେ, ଅ଼ଡ଼େ ଆଜିହ଼ପେତାରା ଲ଼କୁ ଊମ୍ବାହାନି ପ଼ଡ଼ୁ ଲେହେଁ ଆ଼ନେ; କାନୁମିଟି କିନି ଦେବୁଣିଏ ଈ ବାରେ ଆ଼ନେ। 6 ବା଼ଡ଼୍‌ୟୁଗାଟି ପ୍ରବୁ ହା଼ଗୁ ଗୂଣ୍‌ନାଣି, ବୂମି ୱୀଡିନାୟି, କାଜା ହା଼ଡା, ରୁୱାଗା଼ଲି, ପିୟୁ ଅ଼ଡ଼େ ଗୂହ୍‌ନି ହିଚୁ ତଲେ ତାନି ତା଼ଣା ୱା଼ନେସି। 7 ଇଞ୍ଜାଁ ବାରେ କୂଡ଼ାତି ଏମିନି ଲ଼କୁ ଅରିୟେଲ ତଲେ ଜୁଜୁ କିନେରି, ଇଚିହିଁ, ଆମ୍ବାଆରି ତାନି ତଲେ ଅ଼ଡ଼େ ତାନି ଆ଼ଟ୍‌ୱା କ଼ଟା କ଼ପାଟି ଜୁଜୁ କିହାଁ ଏ଼ଦାଣି କସ୍ତ ହୀନେରି, ଏ଼ୱାରି ବାରେ ହାପାନା ଲେହେଁ, ଲା଼ଆଁୟାଁ ବେ଼ଲା ମେସିମାନି ସେୟାଁଣା ହାପାନା ଲେହେଁ ଆ଼ନେରି। 8 ଅ଼ଡ଼େ, ଏ଼ନିକିଁ ହାକିଗାଟାସି ହାପାନାତା ତିଞ୍ଜିମାନେସି ଇଞ୍ଜିଁ ମେହ୍‌ନେସି, ସାମା ତେଃଏଲିସାରେ ତାନି ବାଣ୍ତି ୱାର୍‌ଆୟି ଡ଼ୟିନେ; ଅ଼ଡ଼େ ଏ଼ନିକିଁ ଏ଼ସ୍‌କିଗାଟି ଲ଼କୁ ଏ଼ୟୁ ଗସିମାନେସି ଇଞ୍ଜିଁ ହାପାନାତା ମେହ୍‌ନେସି, ସାମା ତେଃଏଲିସାରେ ଏ଼ୱାସି ବା଼ଡ଼୍‌ୟୁ ହିଲାଆଗାଟାସି ଅ଼ଡ଼େ ଏ଼ୱାଣି ଜୀୱୁତା ଏ଼ସ୍‌କି ଡ଼ୟିନେ, ସିୟନ ହ଼ରୁ କ଼ପାଟି ଜୁଜୁ କିନି ବାରେ କୂଡ଼ାତି ଲ଼କୁ ଏଲେ ଆ଼ନେରି।

ହେଲା ଆ଼ନାରାକି ସେତ୍‌ନା

9 ମୀରୁ ଡ଼ୟାଦୁ ଅ଼ଡ଼େ କାବା ଆ଼ଦୁ; ଅ଼ଡ଼େ ମୀରୁ ରା଼ହାଁ କିହିଁ କା଼ଣା ଆ଼ଦୁ; ଏ଼ୱାରି ହ଼ଚାମାନେରି, ସାମା ଅଙ୍ଗୁରି ରାସା ତଲେ ଆ଼ଏ; ଏ଼ୱାରି ଲିଡ଼ଲା଼ଡ଼ା ଆ଼ନେରି ସାମା କା଼ଡ଼ୁ ତଲେ ଆ଼ଏ। 10 ଇଚିହିଁ ପ୍ରବୁ ମୀ ଲାକ ହା଼ରେକା ଇଦାତି ଜୀୱୁ ହୀହାମାଞ୍ଜାନେସି ଅ଼ଡ଼େ ମୀ ନ଼କିତା ଆ଼ନି କାତା ୱେହ୍‌ନାରି ଲେହେଁତି କାଣ୍‌କା ପଜାମାନେସି ଅ଼ଡ଼େ ସେୟାଁଣା ହାପାନା ମେହ୍‌ନାରି ଲେହେଁ ମୀ ତା଼ର୍ୟୁଁତି ଏ଼ୱାସି ପ୍ଡିକ୍‌ହାମାନେସି। 11 ଇଞ୍ଜାଁ, ବାରେ ସେୟାଁଣା ହାପାନା ମିଙ୍ଗେ ତାକି ବୁଟୁ ମୁଦ୍ରା କିହାମାନି ର଼ ପତିତି ବ଼ଲୁ ଲେହେଁ ଆ଼ହାମାନେ, ଆମ୍ବାଆସି ପ଼ଡ଼ୱି ଆ଼ହାଲି ପୁଚି ଲ଼କୁକି ଏ଼ଦାଆଁ ହୀହାଁ ଏଲେଇଞ୍ଜେରି, "କାର୍ମା ମେସାହାଁ ଈଦାଆଁ ପ଼ଡ଼ୱି ଆ଼ମୁ।" ଇଞ୍ଜାଁ ଏ଼ୱାସି ଏଲେଇନେସି, "ଈଦି ବୁଟୁ ମୁଦ୍ରା କିୱିଆ଼ହାମାନେ ଈଦାଣି ନା଼ନୁ ପ଼ଡ଼ୱି ଆ଼ହାଲି ଆ଼ଡଅଁ।" 12 ଅ଼ଡ଼େ ଏ଼ ପତିତି ପ଼ଡ଼ୱି ଆ଼ହାଲି ପୁନାଆତି ଲ଼କୁକି ହୀହାଁ ଏଲେଇଞ୍ଜେରି, "କାର୍ମା ମେସାହାଁ ଈଦାଆଁ ପ଼ଡ଼ୱି ଆ଼ମୁ।" ଇଞ୍ଜାଁ ଏ଼ୱାସି ଏଲେଇନେସି, "ନା଼ନୁ ପ଼ଡ଼ୱି ଆ଼ହାଲି ପୁଞ୍ଜାହିଲଅଁ।"

13 ଅ଼ଡ଼େ ପ୍ରବୁ ଏଲେଇଚେସି, "ଈ ଲ଼କୁ ନା଼ ଦାରିତା ୱା଼ନେରି ଅ଼ଡ଼େ ଏ଼ୱାରି ଜାହାରା ଗୂତିତା ଅ଼ଡ଼େ ଲୂଡ଼ା ତଲେ ନା଼ ମା଼ନି କିନେରି, ସାମା ଏ଼ୱାରି ଜାହାରା ହିୟାଁ ନା଼ ତା଼ଣାଟି ହେକ ଇଟାମାନେରି ଅ଼ଡ଼େ ନା଼ ତାକି ଏ଼ୱାରି ଏମିନି ଆଜି, ଏ଼ଦି ମାଣ୍‌ସି ତା଼ଣାଟି ଜା଼ପିତି ହୁକୁମି।" 14 ଈଦାଆଁତାକି ମେହ୍‌ଦୁ, ନା଼ନୁ ଈ ଲ଼କୁ ବିତ୍ରା ର଼ ଆ଼ଆଗାଟି କାମା, ଇଚିହିଁ, ଆ଼ଆଗାଟି କାବାଆ଼ନି କାମା କିଇଁ, ଇଞ୍ଜାଁ ଏ଼ୱାରି ବୁଦିଗାଟି ଲ଼କୁତି ବୁଦି ନା଼ସା ଆ଼ନେ ଅ଼ଡ଼େ ଏ଼ୱାରି ଅଣ୍‌ପୁ ଲ଼କୁତି ବୁଦି ଜା଼ଙ୍ଗାହାନେ।

ୱା଼ନି ଦିନାତି ଆ଼ସା

15 ଆମ୍ବାଆରି ପ୍ରବୁ ତା଼ଣାଟି ଜାହାରା କାତା ଡ଼ୁକ୍‌ହାଲି ହା଼ରେକା ଜାତ୍‌ନୁ କିନେରି, ଏ଼ୱାରି ଡଣ୍ତ ବେଟାଆ଼ନାରି! ଅ଼ଡ଼େ ଏ଼ୱାରି ଆନ୍ଦେରିତା ଜାହାରା କାମା କିହାଁ ଏଲେଇନେରି, "ମାଙ୍ଗେ ଆମ୍ବାଆସି ମେସି ମାଞ୍ଜାନେସି ? ଅ଼ଡ଼େ ଆମ୍ବାଆସି ମାଙ୍ଗେ ପୁଞ୍ଜାମାନେସି ?" 16 ମୀ ତେଲ୍‌ହିନାୟି ଏ଼ନିକିଁ ତିରି ମ୍ଣିହିମାନେ! କୁମ୍ବ୍ରେଏସି କି ଇର୍‌ଆ ସମାନା ଆ଼ନେସି; "ତିୟାରା କିତି ଆ଼ସ୍ତି ତିୟାରା କିତାଣାଇଁ ଏଲେଇନେ, ଈୱାସି ନାଙ୍ଗେ ତିୟାରା କିହାମାଞ୍ଜଅସି। ଇଚିହିଁ ଏ଼ୱାଣାକି ଇଚାୟି ବୁଦି ହିଲେଏ, ତିୟାରା ଆ଼ତି ଆ଼ସ୍ତି କି ତିୟାରା କିନି ମାଣ୍‌ସିଇଁ ଏଲେଇନେ ?"

17 ହା଼ରେକା ଊଣା କା଼ଲାତି ଜେ଼ଚ ଲିବାନନ କି ପା଼ଡ଼େୟି କାମ୍ବିନି ଗୁଡିୟା ତିରିମ୍ଣିଏ ? ଅ଼ଡ଼େ ପା଼ଡ଼େୟି କାମ୍ବିନି ଗୁଡିୟା କି କାଜା ଜା଼ଡ଼ା ଇଞ୍ଜିଁ ୱେ଼ଙ୍ଗେଏ ?

18 ଇଞ୍ଜାଁ, ଏ଼ ଦିନା ବେ଼ରା ପତିତି ବ଼ଲୁ ୱେନେସି, ଇଞ୍ଜାଁ କା଼ଡ଼କି ଅ଼ଡ଼େ ଆନ୍ଦେରି ବିତ୍ରାଟି କା଼ଣାତି କାନୁ ମେହ୍‌ନେ। 19 କ଼ପା ହିଲାଆଗାଟି ଲ଼କୁ ପ୍ରବୁ ତା଼ଣା ଜାହାରା ରା଼ହାଁ ପାଡିକିନେରି ଅ଼ଡ଼େ ମାଣ୍‌ସିୟାଁ ବିତ୍ରା କା଼କୁଲି ଗାଟାରି ଇସ୍ରାୟେଲତି ଦାର୍ମୁ ଗାଟି ମାହାପୂରୁ ତା଼ଣା ରା଼ହାଁ କିନେରି। 20 ଇଚିହିଁ କାର୍ମା ମେହ୍‌ଆଗାଟାରି ଡ଼ୟଅରି ଅ଼ଡ଼େ ନିନ୍ଦା କିନାରି ସାପି ଆ଼ହିମାନେରି ଅ଼ଡ଼େ ଆମ୍ବାଆରି ଲାଗେଏ କାମା କିହାଲି କା଼ଚାହାଁ ଡ଼ୟିନେରି, ଏ଼ୱାରି ବାରେ ନା଼ସା ଆ଼ନେରି; 21 ଏ଼ୱାରି କାତା ତଲେ ମାଣ୍‌ସିଇଁ ଦ଼ହ କିନେରି ଅ଼ଡ଼େ ଗା଼ଡ଼ା ଦୁୱେରିତା ଲାଗେଏ କାତା ୱେସାଲି ପା଼ନ୍ଦା ଅଡିନେରି ଅ଼ଡ଼େ ଦାର୍ମୁ ଗାଟାରାଇଁ ଉଜେଏତି କାତା ତଲେ ଲାଗେଏ କିନେରି।

22 ଈଦାଆଁତାକି ଅବ୍ରାହାମଇଁ ଗେଲ୍‌ପିନି ପ୍ରବୁ ଜାକୁବ କୂଲୁତି ଏଲେଇନେସି, "ନୀଏଁ ଜାକୁବ ଲାଜା ଆ଼ଅସି କି ଏ଼ୱାଣି ମୂମ୍ବୁ ୱା଼ଡ଼େଏ। 23 ସାମା ଏଚିବେ଼ଲା ଏ଼ୱାସି ନା଼ କେୟୁତି କାମା ଲେହେଁ ତାନି ମୀର୍‌କାଣି ନା଼ ତା଼ଣା ମେହ୍‌ନେସି, ଏଚିବେ଼ଲା ଏ଼ୱାରି ନା଼ ଦ଼ରୁତି ସୁଦୁ ଇଞ୍ଜିଁ ମା଼ନୱି ଆ଼ନେରି; ହାଅ, ଏ଼ୱାରି ଜାକୁବତି ମାହାପୂରୁଇଁ ସୁଦୁଗାଟାସି ଇଞ୍ଜିଁ ମା଼ନୱି ଆ଼ନେରି ଅ଼ଡ଼େ ଇସ୍ରାୟେଲତି ମାହାପୂରୁଇଁ ହା଼ରେକା ଗା଼ୱୁରମି କିନେରି। 24 ଆମ୍ବାଆରି ନା଼ଡ଼ିକିୱି ଆ଼ହାମାନେରି ଏ଼ୱାରି ଜିକେଏ ବୁଦି ବେଟାଆ଼ନେରି, ଅ଼ଡ଼େ ବା଼ଚା କିନାରି ନେହିଁ କାତା ଜା଼ପିନେରି।