1 ପ୍ରବୁ ଏଲେଇଞ୍ଜି ମାନେସି, ଗଡ଼୍‌ହା କିନି ମୀର୍‌କା! କାତା ଆ଼ନେରି, ସାମା ନା଼ ତା଼ଣାଟି ଆ଼ଏ; ଇଞ୍ଜାଁ, ଆମ୍ବାଆରି ପା଼ପୁ ଲାକ ପା଼ପୁ କିହାଲି ତାକି ପ୍ଡିକ୍‌ନି ତା଼ଣା ପ୍ଡିକ୍‌ହାନେସି, ସାମା ନା଼ ଜୀୱୁ ତଲେ ଆ଼ଏ, ଏ଼ୱାରି ଡଣ୍ତ ବେଟାଆ଼ନେରି। 2 ଏ଼ୱାରି ନାଙ୍ଗେ ୱେଞ୍ଜାଆନା ପା଼ରତି ବପୁତଲେ ଜାହାରାଇଁ ବା଼ଡ଼୍‌ୟୁ କିହାଲି ଅ଼ଡ଼େ ମିସରତି ସା଼ୟିଁତା ଜ଼ମାଲି ମିସରତା ହାଜାଲି ତାକି ତା଼କି ମାନେରି। 3 ଏ଼ଦାଆଁତାକି ପା଼ରତି ବା଼ଡ଼୍‌ୟୁ ମିଙ୍ଗେ ଲାଜାଗାଟାୟି ଆ଼ନେ ଅ଼ଡ଼େ ମିସର ସା଼ୟିଁତା ଜ଼ମିନାୟି ମିଙ୍ଗେ ତାକି ନିନ୍ଦାଗାଟାୟି ଆ଼ନେ। 4 ଇଚିହିଁ ତାନି ସା଼ଲୱି କିନାରି ସୟନତା ମାନେରି ଅ଼ଡ଼େ ତାନି କାବ୍ରୁ ହୀନାରି ହାନେସତା ୱା଼ହାମାନେରି। 5 ଏମିନି କୂଡ଼ା ଏ଼ୱାରି ନେହିଁ କିହାଲି ଆ଼ଡଅରି, ଏ଼ୱାରି କାତାତାକି ଏ଼ ବାରେ ଲାଜା ଆ଼ନେରି, ଏ଼ କୂଡ଼ା ସା଼ୟେମି କିନାରି କି ନେହିଁ କିନାରି ଆ଼ଏ, ସାମା ଲାଜା ଅ଼ଡ଼େ ତାମି ଦ଼ରୁ ଲାଗେଏ କିନାରି ଲେହେଁ।"

6 ଟିଃନି ଦେ଼ସାତି ଜ଼ନ୍ତୟାଁତି ନ଼କିତା ଆ଼ନି କାତା, ଏ଼ୱାରି ତାନି ଦ଼ନତି ଦାଂଗ୍‌ଣା ଗା଼ଡ଼୍‌ଦେୟାଁ ଜେ଼ନୁ ଲାକ, ଅ଼ଡ଼େ ତାମି ବିତି ଊଟୁୟାଁ ଟୂଣ୍ଟୁ ଲାକ ଏକ୍‌ହାଁ, କସ୍ତ ଅ଼ଡ଼େ ବା଼ଦାଗାଟି ଦେ଼ସା ହୀହାଁ ଆମ୍ବିୟା ସିହଁ ଅ଼ଡ଼େ ତାଲି ସିହଁ, ନା଼ଗା ଅ଼ଡ଼େ ଊମ୍ବିନି ବୀସାଗାଟି ରା଼ଚୁ ଡ଼ୟିନେ, ଏ଼ ଲ଼କୁ ତା଼ଣା ହାଜିମାନେରି, ଆମ୍ବାଆରି ତା଼ଣାଟି ଏ଼ୱାରି ଏ଼ନି ଲା଼ବା ଆ଼ଏ। 7 ଇଚିହିଁ ମିସର ମିଚି ଅ଼ଡ଼େ ଉଜେଏ ସା଼ୟେମି କିନେ; ଏ଼ଦାଆଁତାକି ନା଼ନୁ ଏ଼ଦାନି କାମା କିଆନା କୁଗା ଡ଼ୟିନି ରାହବ* ଇଞ୍ଜିଁ ଦ଼ରୁ ହୀହାମାଇଁ।

8 ନୀଏଁ ହାଲାମୁ, ଅ଼ଡ଼େ ଏ଼ୱାରି ନ଼କିତା ର଼ ପା଼ଟାତା ଏ଼ଦାଆଁ ରା଼ଚାମୁ ଅ଼ଡ଼େ ଏ଼ଦି ଏ଼ନିକିଁ ୱା଼ହିମାନି କା଼ଲା ପାତେକା କା଼ଲେଏ ଡ଼ୟିନେ, ଏ଼ଦାଆଁତାକି ର଼ ରୂପିତି ପତିତା ଏ଼ଦାଆଁ ରା଼ଚାମୁ। 9 ଇଚିହିଁ ଏ଼ୱାରି ଗଡ଼୍‌ହାଗାଟି କୂଡ଼ା, ମିଚିତି ମୀର୍‌କା, ଏ଼ୱାରି ପ୍ରବୁତି ମେ଼ରା ୱେଞ୍ଜାଲି କୂନି ମୀର୍‌କା; 10 ଏ଼ୱାରି ସେୟାଁଣା ତଲେ ମେହ୍‌ନାରାଇଁ ଏଲେଇନେରି, "ମୀରୁ ସେୟାଁଣା ତଲେ ମେହ୍‌ଆଦୁ।" ଅ଼ଡ଼େ ନ଼କିତା ଆ଼ନି କାତା ୱେହ୍‌ନାରାଇଁ ଏଲେଇନେରି, "ମୀରୁ ମା଼ ନ଼କିତା ସାତା ଆ଼ନି ବ଼ଲୁ ୱେହ୍‌ଆଦୁ, ମାଙ୍ଗେ ଡ଼ାକ୍‌ହି ବ଼ଲୁ ୱେସ୍ତାଦୁ ଅ଼ଡ଼େ ନା଼ଡ଼ିକିନି ବ଼ଲୁ ୱେସ୍ତାଦୁ; 11 ମୀରୁ ଜିରୁଟି ୱେଣ୍ତା ହାଜୁ, ଜିରୁ ପିସା ହିୟାଦୁ, ଇସ୍ରାୟେଲତି ଦାର୍ମୁ ଗାଟି ମାହାପୂରୁଇଁ ମା଼ ନ଼କିଟି ହେକ କିଦୁ।"

12 ଏ଼ଦାଆଁତାକି ଇସ୍ରାୟେଲତି ଦାର୍ମୁଗାଟି ମାହାପୂରୁ ଈ କାତା ଏଲେଇଞ୍ଜି ମାନେସି, "ମୀରୁ ଈ ବ଼ଲୁ ହୀଣି କିହିମାଞ୍ଜେରି, ଇଞ୍ଜାଁ ଲାଗେଏତାଣି ଅ଼ଡ଼େ କୁଟୁ କାତାତି ନାମାହାଁ ଏ଼ଦାଣି ବା଼ର୍ସୁ କିହିମାଞ୍ଜେରି; 13 ଏ଼ଦାଆଁତାକି ଈ ଲାଗେଏତି କାମା ମିଙ୍ଗେ ତାକି ପାଡାଆ଼ତି ଡୀହାମାନି କାତିତି ବା଼ଗା ଆ଼ନେ, ଏମିନାୟି ଡୀହାଁ ରିନାୟି ମାନେ, ଇଞ୍ଜାଁ ଏ଼ଦି ଦେବୁଣିଏ ଡୀହାଁ ରିହାହାନେ।" 14 ଇଞ୍ଜାଁ, ଏ଼ନିକିଁ କୁମ୍ବ୍ରେଏଣା ଡ:କା ଡିପ୍‌କିଆ଼ନେ, ଏଲେକିଁ ଏ଼ୱାସି ଇଚାଣି କାର୍ମା ମେହ୍‌ଆନା ଏ଼ଦାଆଁ ଗୁଣ୍ତୁଗୁଣ୍ତା କିହିଁ ଡିକ୍‌ନେସି; ଏମ୍ବାଟିଏ ହଲୁତି ହିଚୁ ଆ଼ଆତିଁ କୁଣ୍ତିଟି ଏ଼ୟୁ ଅ଼ନି ଲେହେଁ ଇଚି ପୀଣା ଜିକେଏ ଡ଼ୟେଏ।

15 ଇଚିହିଁ ପ୍ରବୁ, ଇସ୍ରାୟେଲତି ପ୍ରବୁ ଦାର୍ମୁଗାଟି ମାହାପୂରୁ ଏଲେଇଚେସି, "ୱେଣ୍ତିତିହିଁ ଅ଼ଡ଼େ ସୁସ୍ତି ଆ଼ତିହିଁ ମୀରୁ ଗେଲ୍‌ପି ଆ଼ଦେରି; ସୁସ୍ତି ଅ଼ଡ଼େ ନାମୁତଲେ ମୀ ବା଼ଡ଼୍‌ୟୁ ଆ଼ନେ, ଇଞ୍ଜାଁ ମୀରୁ କୂତେରି। 16 ସାମା ମୀରୁ ଏଲେଇଚେରି, ‘ଆ଼ଏ, ମା଼ମ୍ବୁ ଗ଼ଡ଼ାତା ହ଼ଚାହାଁ ହଣ୍‌ନମି।’ ଏ଼ଦାଆଁତାକି ମୀରୁ ହଣ୍‌ନାତେରି ଆ଼ଦେରି; ଅ଼ଡ଼େ ଏଲେଇଚେରି, ‘ମା଼ମ୍ବୁ ଗାଡି ହଣ୍‌ନି ଗ଼ଡ଼ାତା ହ଼ନମି।’ ଏ଼ଦାଆଁତାକି ମୀ ଜେ଼ଚ ପେ଼ର୍‌ହାନାରି ମୀ କିହାଁ ହା଼ରେକା ହଣ୍‌ନାରି ଆ଼ନେରି। 17 ରଅସି ଦାକା ହୀତିସାରେ ର଼ ମା଼ଣା ଲ଼କୁ ହଣ୍‌ନେରି; ପା଼ସା ଜା଼ଣା ଦାକା ହୀତିସାରେ ମୀରୁ ହଣ୍‌ଦେରି; ଏଚେଟିଏ ମୀରୁ ହ଼ରୁ ସିଣ୍ତିତା ର଼ ସିନା ସମାନା ଅ଼ଡ଼େ କୁପ୍‌ଲି ହ଼ର୍‌କାଣା ସିରେଲି ଗ଼ଞ୍ଜିନି ବାଡ଼୍‌ଗା ଲେହେଁ ଡ଼ୟିଦେରି।" 18 ଇଞ୍ଜାଁ ଏ଼ଦାଆଁତାକି ପ୍ରବୁ ମିଙ୍ଗେ ତାକି କାର୍ମା ଆ଼ହାଁ କା଼ଚା ଡ଼ୟିନେସି, ଅ଼ଡ଼େ ଏ଼ଦାଆଁତାକି ଏ଼ୱାସି କାଜାସି ଆ଼ହାଁ ମିଙ୍ଗେ କାର୍ମା ଆୟାନେସି। ଇଚିହିଁ ପ୍ରବୁ ନୀହାଁୟି ବିଚାରା କିନି ମାହାପୂରୁ; ଆମ୍ବାଆରି ଏ଼ୱାଣାଇଁ କା଼ଚାହାଁ ଡ଼ୟିନେରି ଏ଼ୱାରି ନେହେଁ।

19 ସିୟନତି ଲ଼କୁ ଜିରୁସାଲମତା ବାସା କିନେରି; ମୀରୁ ଅ଼ଡ଼େ ଡ଼ୀଅତେରି; ଏ଼ୱାସି ମୀ ଡ଼ୀକି ହା଼ଡାତା ସାତେଏ ମିଙ୍ଗେ କାର୍ମା ମେସ୍ତାନେସି; ଏ଼ୱାସି ୱେଣ୍‌ମ୍ବନିଏ ମୀ କାତା ଆ଼ସ୍ତାନେସି। 20 ଇଞ୍ଜାଁ, ପ୍ରବୁ ମିଙ୍ଗେ ଦୁକୁ ଲେହେଁତି କା଼ଦି ଅ଼ଡ଼େ କସ୍ତ ଲେହେଁତି ଏ଼ୟୁ ହିୟାନେସି, ଆ଼ତିଜିକେଏ ମିଙ୍ଗେ ଜା଼ପ୍‌ହାନାରି ଅ଼ଡ଼େ ଡ଼ୁଗାହାଁ ଡ଼ୟଅରି, ସାମା ମୀ କାନୁ ମିଙ୍ଗେ ଜା଼ପ୍‌ନାରାଇଁ ମେହ୍‌ନେ। 21 ଇଞ୍ଜାଁ, ଟିଃନି କି ଟେ଼ବ୍ରିୱାକି ୱେଣ୍ତିନି ବେ଼ଲା ମୀ କିର୍ୟୁଁ ମୀ ଡା଼ୟୁୱାକି ଈ କାତା ୱେନେ, "ଜିରୁ ଈଦି, ଇମ୍ବାଟି ମୀରୁ ତା଼କାଦୁ।" 22 ଅ଼ଡ଼େ ମୀରୁ ମୀ ୱେଣ୍ତିତି ଊସ୍‌ପିତି ବମାୟାଁ ଅ଼ଡ଼େ ଗାରାତଲେ କେ଼ପିତି ବାଂଗାରା ବମାୟାଁ ସାଜୁ ଲାଗେଏ କିଦେରି; ମୀରୁ ଏ଼ ବାରେତି ଲାଗେଏତି ଆ଼ସ୍ତି ଲେହେଁ କୁତୁହ୍‌ଦେରି; ଅ଼ଡ଼େ ଏଲେଇଞ୍ଜେରି, "ଇମ୍ବାଟି ହ଼ଚା ହାଜୁ।" 23 ଇଞ୍ଜାଁ ବୂମିତା ମାଟାଲି ତାକି ଏ଼ୱାସି ମୀ ବିଚା ତାକି ପିୟୁ ହିୟାନେସି; ବୂମିତା କାମ୍ବିତି କା଼ଦି ହିୟାନେସି, ଏ଼ଦି ନେହାୟି ଅ଼ଡ଼େ ହା଼ରେକା ଆ଼ନେ; ଏ଼ ଦିନା ମୀ କ଼ଡି ଗରି ଅ଼ସାରା ଟା଼ୟୁତା ମେୟିଁନୁ। 24 ବୂମିତା ଡ଼ୂନି ଡ଼ୁକିୟାଁ, ବାଚା ଗା଼ଡ଼୍‌ଦେୟାଁ, ହା଼ଣି ଅ଼ଡ଼େ ହେ଼ଚି ତଲେ ଏ଼ର୍‌ସିତି ନେହିଁ କା଼ଦି ତିନୁ। 25 ଅ଼ଡ଼େ ଏମିନି ନା଼ସା କିନି ଦିନାତା କ଼ଟାତି କ୍ଡାଃନି ଇଲ୍‌କା ରିହାହାନୁ ଏ଼ ଦିନା ବାରେ ପାଡାଆ଼ତି ହ଼ର୍‌କାଣା ଅ଼ଡ଼େ ବାରେ କୁପ୍‌ଲିୟାଁଣା କାଡା ଅ଼ଡ଼େ ଏ଼ୟୁ ଜାର୍‌ଣା ଆ଼ନୁ। 26 ଅ଼ଡ଼େ ଏମିନି ଦିନା ପ୍ରବୁ ତାନି ଲ଼କୁତି ଗା଼ହାଁ ଦହ୍‌ନେସି ଅ଼ଡ଼େ ମା଼ଡା ଆ଼ହାମାନି ଗା଼ହାଁ ନେହିଁ କିନେସି, ଏ଼ ଦିନା ଲେ଼ଞ୍ଜୁତି ଉଜେଡ଼ି ୱେ଼ଡ଼ା ଲେହେଁ ଆ଼ନେ, ଅ଼ଡ଼େ ୱେ଼ଡ଼ାତି ଉଜେଡ଼ି ସା଼ତା ଦିନାତି ଉଜେଡ଼ି ଲେହେଁ ସା଼ତା ଗୂଣୁ ଆ଼ନେ।

27 ମେହ୍‌ଦୁ ପ୍ରବୁତି ଦ଼ରୁ ତାନି କାର୍‌ବି ତଲେ ଡ଼ୀଞ୍ଜାମାନେ ଅ଼ଡ଼େ ହା଼ରେକା ବ଼ୟିଁତି ଦୂନ୍ଦ୍ରା ଲେହେଁ ହେକଟି ୱା଼ହିମାନେସି; ତାନି ଗୂତି କାର୍‌ବିତଲେ ନେଞ୍ଜାମାନେ ଅ଼ଡ଼େ ତାନି ୱେନ୍ଦରି ବାରେ ନା଼ସା କିନି ହିଚୁ ଲେହେଁ; 28 ଇଞ୍ଜାଁ ଏ଼ୱାଣି ଊକ୍‌ଅଡ଼ି ରେ଼ଚା ୱା଼ହିମାନି କାଡା ଲେହେଁ, ବାରେ ଦେ଼ସାତି ଲ଼କୁଣି ନା଼ସା କିନି ହା଼ଣି ତଲେ ହା଼ଣି କିହାଲି ତାକି ଏ଼ଦି ହେର୍‌କି ପାତେକା ନେଞ୍ଜିମାନେ; ଅ଼ଡ଼େ ବାରେ ଦେ଼ସାତି ଲ଼କୁତି ଗୂତିତା ନା଼ଡ଼ି କିନି ବାକେରି ହୀପ୍‌କି ଆ଼ନେ। 29 ସୁଦୁ ପାର୍ବୁ କିନି ଲା଼ଆଁୟାଁ ଏ଼ନିକିଁ, ଏଲେକିଁ ମୀରୁ ପା଼ଚିଦେରି; ଇଞ୍ଜାଁ ଲ଼କୁ ଏ଼ନିକିଁ ପ୍ରବୁତି ହ଼ରୁତା, ଇସ୍ରାୟେଲତି ପା଼କାତା ହାଜାଲି ତାକି ପୀରୁଡ଼ି ଊକିହିଁ ତା଼କିନେରି, ଏଲେକିଁ ମୀ ହିୟାଁ ରା଼ହାଁ ଆ଼ନେ।

30 ଇଞ୍ଜାଁ ପ୍ରବୁ ତାନି ହା଼ରେକା କାର୍‌ବି ଅ଼ଡ଼େ ବାରେ ନା଼ସା କିନି ହିଚୁ ଗୁଦ୍‌ୱା, ଗା଼ଲି ପିୟୁ ଅ଼ଡ଼େ ଆ଼ଜିୟାଁ ତଲେ ତାନି ବା଼ଡ଼୍‌ୟୁତି ହା଼ଡା ୱେଣ୍‌ମ୍ବି କିୟାନେସି ଅ଼ଡ଼େ ତାନି କେୟୁତି ବା଼ଡ଼୍‌ୟୁ ତ଼ସ୍ତାନେସି। 31 ଇଚିହିଁ ପ୍ରବୁତି ହା଼ଡା ତଲେ ଅସୁର ଗାଣ୍ତ୍ରା ଗାଣ୍ତ୍ରା ଆ଼ହିଁ ନା଼ସା ଆ଼ନେ, ଏ଼ୱାସି ଏ଼ଦାଣି ବାଡ଼୍‌ଗା ତଲେ ଡଣ୍ତ ହୀନେସି। 32 ଇଞ୍ଜାଁ ଏମିନି ତୀରି କିହାମାନି ଡଣ୍ତ ପ୍ରବୁ ଏ଼ଦାନାକି ହୀନେସି, ଏଚେଟିଏ ବାରେ ଡଣ୍ତ ବେ଼ଲାତା ଡାପୁ ଅ଼ଡ଼େ ସେର୍‌ଙ୍ଗି ଡ଼ୀନେ ଅ଼ଡ଼େ ଏ଼ୱାସି ଏ଼ୱାରି ତଲେ ହା଼ରେକା ଜୁଜୁ କିନେସି। 33 ଇଚିହିଁ ତପତ୍‌* ଦ଼ରୁତି ହିଚୁ ଗା଼ଡ଼୍‌ୟୁ ତଲି କା଼ଲାଟିଏ ତିୟାରା ଆ଼ହାମାନେ ଅ଼ଡ଼େ ଏ଼ଦି ରାଜାକି ତିୟାରା ଆ଼ହାମାନେ; ଏ଼ୱାସି ଏ଼ଦାଆଁ ଅ଼ସାରା ଅ଼ଡ଼େ କୂଡ଼୍‌ହାଣି କିହାମାନେସି, ଏମ୍ବାତି ଗୁଦ୍‌ୱା ହିଚୁ ଅ଼ଡ଼େ ହା଼ରେକା ୱେସ୍‌କା; ଇଞ୍ଜାଁ ପ୍ରବୁତି ଊକ୍‌ଅଡ଼ି ଗାନ୍ଦୁକି କାଡା ସମାନା ଡ଼ୀଞ୍ଜିକିନେ।