1 ମୀରୁ ଦୂହି ଆ଼ଆତି ଜିକେଏ ଦୂହି ମାଞ୍ଜେରି ମୀରୁ; ଇଞ୍ଜାଁ, ଲ଼କୁ ମିଙ୍ଗେ ନା଼ଡ଼ି କିୟାଆତି ଜିକେଏ ନା଼ଡ଼ି କିହିମାଞ୍ଜେରି ମୀରୁ, ମୀରୁ ଡଣ୍ତ ବେଟାଆ଼ନାତେରି! ମୀରୁ ଦୂହାଲି ରା଼ପ୍‌ହି ଡା଼ୟୁ ଦୂହି କିୱି ଆ଼ଦେରି ଅ଼ଡ଼େ ନା଼ଡ଼ିକିତି ଡା଼ୟୁ ଲ଼କୁ ମିଙ୍ଗେ ନା଼ଡ଼ି କିୟାନେରି।

2 ଏ଼ ପ୍ରବୁ, ମାଙ୍ଗେ କାର୍ମା ମେସ୍ତାମୁ; ମା଼ମ୍ବୁ ନିଙ୍ଗେ କା଼ଚା ମାଞ୍ଜାନମି; ନୀନୁ ବାରେ ଦିନା ଲା଼ଇ ତାମି ବାହା ଲେହେଁ ଆ଼ମୁ, କସ୍ତ ବେ଼ଲାତା ଜିକେଏ ମା଼ ଗେଲ୍‌ପାନାତି ଆ଼ମୁ। 3 କା଼ଲୱିତି ହା଼ଡା ୱେଣ୍‌ମ୍ବନିଏ ବାରେ କୂଡ଼ା ହଟେରି, ନୀନୁ ନିଙ୍ଗାଲିଏ, ଏଟ୍‌କା ଦେ଼ସାତାରି ସିନାସାତ୍ରା ଆ଼ତେରି। 4 ଇଞ୍ଜାଁ, କିସ୍‌କାୟାଁ ଏ଼ନିକିଁ କୂଡ଼ିକିନୁ, ଏଲେକିହିଁ ମୀ ସ଼ରୁ କିତାୟି କୂଡ଼ି କିୱିଆ଼ନେ; ଏ଼ନିକିଁ ଗ଼ପ୍‌ଏରିକା ଗେ଼ମ୍ବିନୁ, ଏଲେକିହିଁ ଲ଼କୁ ଏ଼ଦାନି ଲାକ ଗେ଼ମ୍ବିନେରି।

5 ପ୍ରବୁ କାଜାସି, ଇଚିହିଁ ଏ଼ୱାସି ଲାକ ବାସା କିନାସି; ଏ଼ୱାସି ସିୟନତି ନୀହାଁୟି ବିଚାରା ଅ଼ଡ଼େ ଦାର୍ମୁ ତଲେ ନେଞ୍ଜି କିହାମାନେସି। 6 ଇଞ୍ଜାଁ, ନୀ ବେ଼ଲାତା ସୂସ୍ତି ଆ଼ନେ; ଗେଲ୍‌ପିନାୟି, ଜ୍ଞାନ ଅ଼ଡ଼େ ବୁଦି ହା଼ରେକା ଆ଼ନେ; ପ୍ରବୁ କାତାତି ଆଜି ତାନି ଗା଼ଦେୟି।

7 ମେହ୍‌ଦୁ, ତାମି ବା଼ଡ଼୍‌ୟୁ ଗାଟାରି ପାଙ୍ଗାତା ଡ଼ୀହି ମାନେରି; ହାନ୍ଦି ପାରିନି କାବ୍ରୁ ହୀନାରି ହା଼ରେକା ଦୁକୁଟି ଡ଼ୀହି ମାନେରି। 8 କାଜା ଜିରୁ ନ଼ର ହିଲାଆ ଗାଟାୟି ଆ଼ହାମାନେ, ତା଼କିନାରି ଆମ୍ବାଆରି ହିଲଅରି, ଏ଼ୱାସି ରା଼ଜିମା଼ନା ଡିକ୍‌ହା ମାନେସି, ଏ଼ ଗା଼ଡ଼ା ବାରେ* ହୀଣି କିହାମାନେସି, ଏ଼ୱାସି ମାଣ୍‌ସିଇଁ ଏଜି କିଅସି। 9 ଦେ଼ସା ଡ଼ୀହିହିଁ ୱା଼ଡ଼ାମାନେ; ଲିବାନନ ଲାଜା ଆ଼ହାଁ ୱା଼ୟିମାନେ; ସାରଣ ଜା଼ଡ଼ା ଲେହେଁ ଆ଼ହାମାନେ; ଇଞ୍ଜାଁ ବାସନ ଅ଼ଡ଼େ କର୍ମିଲତି ଆ଼କା ଡୁଲିମାନୁ।

10 ପ୍ରବୁ ଏଲେଇଞ୍ଜି ମାନେସି, "ନୀଏଁ ନା଼ନୁ ନିଙ୍ଗିଇଁ, ନା଼ନୁ ନୀଏଁ ଜାହାରାଇଁ ନିକ୍‌ଇଁ; ନୀଏଁ ନା଼ନୁ କାଜାତେଏଁ ଆ଼ହାଁ ଗା଼ୱୁରମି ବେଟାଆ଼ନାତେଏଁ ଆ଼ଇଁ। 11 ମୀ ବାଣ୍ତିତା ୱା଼ୟିତି ପୂରାମା଼ସା ଆ଼ହାଁ ମୀ ତା଼ଣାଟି ନା଼ଡା ଜାର୍ନା ଆ଼ନେ ଅ଼ଡ଼େ ମୀ ହିଚୁ ଲେହେଁତି ନେ଼ସ୍ତେରି ମିଙ୍ଗେ ନା଼ସା କିୟାନେ। 12 ଇଞ୍ଜାଁ, କୂଡ଼ାତାରି ଦାରମ୍ବୁତି ଗୁଣ୍ତା ଲେହେଁ ଅ଼ଡ଼େ ହୂଡାଲି ରାତ୍‌ହି ହା଼ପ୍‌କା ଲେହେଁ ଆ଼ନେରି। 13 ଏ଼ ହେକତି ଲ଼କୁ ବାରେ, ମୀରୁ ନା଼ କିତି କାମାତି କାତା ୱେଞ୍ଜୁ; ଇଞ୍ଜାଁ, ଏ଼ ଡାଗେତି ଲ଼କୁ ବାରେ, ମୀରୁ ନା଼ ବା଼ଡ଼୍‌ୟୁତି ପୁଞ୍ଜୁ।"

14 ସିୟନତି ପା଼ପୁ ଗାଟାରି ଆଜିମାନେରି; ଦାର୍ମୁ ହିଲାଆଗାଟାରାଇଁ ତୀର୍‌ଗିନାୟି ଦେବୁଣିଏ ଆସାମାନେ। ମା଼ ବିତ୍ରାଟି ଆମ୍ବାଆସି ବାରେ ଗୂହ୍‌ନି ହିଚୁତା ବାସା କିହାଲି ଆ଼ଡିନେସି ? ମା଼ ବିତ୍ରାଟି ଆମ୍ବାଆସି କା଼ଲେଏ ଡ଼ୀଞ୍ଜିନି ତା଼ଣା ବାସା କିହାଲି ଆ଼ଡିନେସି ? 15 ଆମିନି ମାଣ୍‌ସି ଦାର୍ମୁତି ଜିରୁତା ତା଼କିନେସି ଅ଼ଡ଼େ ଆମ୍ବାଆସି ତୀର୍‌ପୁ କାତା ଜ଼ଲିନେସି; ଆମିନି ମାଣ୍‌ସି ଲାଗେଏତି ଜୂପ୍‌କା ହୀଣି କିନେସି, ଅ଼ଡ଼େ ଲା଼ଞ୍ଚା ଅ଼ନି ତା଼ଣାଟି ଜାହାରା କେୟୁ ହାଣ୍‌ନେସି, ଆମ୍ବାଆସି ଲ଼କୁଣି ପା଼ୟିନି କାତା ୱେନି ତା଼ଣାଟି ଜାହାରା କିର୍ୟୁଁ ମୁଚା କଡିନେସି, ଇଞ୍ଜାଁ ଲାଗେଏତି କାମା ମେହ୍‌ନି ତା଼ଣାଟି ଜାହାରା କାନୁ ପଜାକଡିନେସି; 16 ଏ଼ୱାସି ପାଡାଆ଼ତି ଟା଼ୟୁତା ବାସା କିନେସି; ୱାଲ୍‌କାତି କ଼ଟା ମୀ ଜ଼ମିନି ଟା଼ୟୁ ଲେହେଁ ଆ଼ନେ; ତାନି ରା଼ନ୍ଦା ତାଙ୍ଗେ ହୀପ୍‌କି ଆ଼ନେ; ଏ଼ୱାଣାକି ଏ଼ୟୁ ଊଣା ଆ଼ଉ।

17 ମୀ କାନୁ ରାଜାଇଁ ତାନି ଅ଼ଜୁ ତଲେ ମେହ୍‌ନେ; ର଼ ଲାମ୍ବା ଅ଼ସାରା ଦେ଼ସା ମେହ୍‌ନେ। 18 ନୀ ହିୟାଁ ଆଜିତି କାତା ଅଣ୍‌ପିନେ; ଏ଼ ଏଜି କିନାସି ଆମ୍ବିୟା ? ଡାବୁୟାଁ ତୂକ୍‌ନାସି ଆମ୍ବିୟା ? କ଼ଟା ଏଜି କିନାସି ଆମ୍ବିୟା ? 19 ନୀନୁ ଏ଼ ହେକତି କୂଡ଼ା ଇଚିହିଁ, ଆମ୍ବାଆରି ହା଼ଡା ନୀନୁ ପୁଞ୍ଜାଲି ଆ଼ଡାଆତି, ଆମ୍ବାଆରି ଏଟ୍‌କା ଦେ଼ସାତି ହା଼ଡା ନୀନୁ ତେଲ୍‌ହାଲି ଆ଼ଡାଆତି, ଏ଼ କୂଡ଼ାତି ଅ଼ଡ଼େ ମେହ୍‌ଅତି। 20 ମା଼ ସୁଦୁ କୂଡ଼ାଆ଼ନି ବେ଼ରଣି ଟା଼ୟୁ ସିୟନ ଗା଼ଡ଼ାତି ସିନିକିମୁ; ନୀ କାନୁ ହିତ୍‌ଡ଼ି ଡ଼ୟିନି ବାସା ଟା଼ୟୁ ଜିରୁସାଲମ ମେହ୍‌ନେ, ଏ଼ଦି ଆ଼ଟ୍‌ୱା ତୂମୁ ଲେହେଁ, ଏମ୍ବାତି କୁଟ୍‌ରୁୟାଁ ଏଚେଲା ରେୱିଆ଼ଉ, କି ଏମ୍ବାତି ଏ଼ନି ଡ:ରି ଡାମ୍ବେଏ। 21 ସାମା ଏମ୍ବାଆଁ ବା଼ଡ଼୍‌ୟୁଗାଟି ପ୍ରବୁ ମା଼ ଡାଗେ ଡ଼ୟିନେସି, ଅ଼ସାରା କାଡାୟାଁ ଜାର୍‌ଣା ସମାନା ଆ଼ନୁ; ଏ଼ ଟା଼ୟୁତା ଏ଼ନି ହାଟ୍‌ୱା ତଲେ ଡା଼କ୍‌ନି ଡଂଗୟାଁ ତା଼କାଉ, କି କାଜା କାଜା ଜା଼ଜାୟାଁ ଏମ୍ବାଟି ହାଲାଉ। 22 ଇଚିହିଁ ପ୍ରବୁ ମା଼ ବିଚାରା କିୟାନାସି, ପ୍ରବୁ ମା଼ ମେ଼ରା ହିୟାନାସି, ପ୍ରବୁ ମା଼ ରାଜା, ଏ଼ୱାସି ମାଙ୍ଗେ ଗେଲ୍‌ପାନେସି। 23 ମୀ ପୀଚୁ ଡ:ର୍‌କା ବାରେ ଉଗ୍‌ଡ଼ା ଆ଼ହାମାନୁ, ଏ଼ ବାରେ ତାନି ମୁଣ୍ତାୟାଁ ଆ଼ଟ୍‌ୱା ଅ଼ଡ଼େ ହିମ୍ବରି ଅ଼ସାରା କିହାଲି ଆ଼ଡାଆତୁ; ଏଚିବେ଼ଲା ଦୂହିତି ଆ଼ସ୍ତି ବା଼ଗା କିୱିଆ଼ତେ; ସଟା ଲ଼କୁ ଦୂହିତି ଆ଼ସ୍ତି ବା଼ଗା ଆସ୍ତେସି। 24 ଇଞ୍ଜାଁ, ନା଼ନୁ ର଼ଗଗାଟାତେଏଁ ଇଞ୍ଜିଁ ସିୟନତା ବାସା କିହିମାନି ଲ଼କୁ ଏଲେଇନଅରି; ଏମ୍ବାଆଁ ବାସା କିହିମାନାରି ଦ଼ହ କେମା କିୱିଆ଼ନେ।