1 ଜା଼ଡ଼ା ଅ଼ଡ଼େ ୱାର୍‌ଇ ଟା଼ୟୁ ରା଼ହାଁ କିନେ,

ଅ଼ଡ଼େ ବାଃଲି ବୂମି ରା଼ହାଁ ଆ଼ହାଁ ପୂୟୁ ଲେହେଁ ଦା଼ଲିନେ।

2 ଏ଼ଦି ହା଼ରେକା ପାର୍‌ସାଡ଼ା ଆ଼ନେ, ଇଞ୍ଜାଁ ରା଼ହାଁ ଅ଼ଡ଼େ ପା଼ଚାହାଁ ରା଼ହାଁ ଆ଼ନେ;

ଲିବାନନତି ଉଜେଡ଼ି, କର୍ମିଲ ଅ଼ଡ଼େ ସାରଣତି ଅ଼ଜୁ ଏ଼ଦାନାକି ହୀପ୍‌କି ଆ଼ନେ;

ଏ଼ୱାରି ପ୍ରବୁତି ଉଜେଡ଼ି ଅ଼ଡ଼େ ମା଼ ମାହାପୂରୁତି ଅ଼ଜୁ ମେହ୍‌ନେରି।

3 ମୀରୁ ବା଼ଡ଼୍‌ୟୁ ହିଲାଆ କେୟୁତି ଆ଼ଟ୍‌ୱା କିଦୁ

ଅ଼ଡ଼େ ତାରାତାରା ମେଣ୍ତାତି ସୁସ୍ତି କିଦୁ।

4 ଆଜି ହିୟାଁଗାଟାରାଇଁ ଏଲେଇଞ୍ଜୁ, ସା଼ସା ଆହ୍‌ଦୁ, ଆଜାଆଦୁ;

ମେହ୍‌ଦୁ, ମୀ ମାହାପୂରୁ ବାଦୁଲି ତଲେ,

ମାହାପୂରୁତି ପା଼ଡ଼େୟି ହୀହାଲି ୱା଼ନେସି;

ଏ଼ୱାସି ୱା଼ହାଁ ମିଙ୍ଗେ ଗେଲ୍‌ପାନେସି।

5 ଏଚିବେ଼ଲା କା଼ଣାୟାଁତି କାଣ୍‌କା ଦେପି ଆ଼ନୁ

ଅ଼ଡ଼େ ବେ଼ରାୟାଁତି କୀର୍କା ମୁକ୍‌ଲୱି ଆ଼ନୁ।

6 ଏଚିବେ଼ଲା ସଟା ଲ଼କୁ କୂର୍‌ହୁ ଲେହେଁ ଗେ଼ମିନେସି

ଅ଼ଡ଼େ ଗୁଲାୟାଁତି ୱେନ୍ଦରି ପା଼ଚିନେ;

ଇଚିହିଁ ବାଟାତା ଏ଼ୟୁ ଅ଼ଡ଼େ ବାଃଲି ବୂମିତା ଜାର୍‌ଣା ହ଼ନୁ।

7 ୱେହିମାନି ବାଃଲି ବାନ୍ଦା ଆ଼ନେ ଅ଼ଡ଼େ ୱା଼ୟିତି ବୂମି ଏ଼ୟୁ ତଲେ ନେଞ୍ଜିନେ;

ଏମିନି ଟା଼ୟୁତା ନାକାୟାଁ ବାସା କିହିମାଚୁ

ଏ଼ ଟା଼ୟୁତା ନା଼ଡା, କୁପିୟାଁ ଜା଼ଡ଼ା ଅ଼ଡ଼େ ଡାଣ୍ତି ଜା଼ଡ଼ା ଆ଼ନେ।

8 ଇଞ୍ଜାଁ, ଏମ୍ବାଆଁ ର଼ କାଜା ପା଼ହେରି ଅ଼ଡ଼େ ଜିରୁ ଆ଼ନେ,

ଏ଼ଦି ସୁଦୁତି ଜିରୁ ଇଞ୍ଜିଁ ୱେ଼ଙ୍ଗିନେ; ଏ଼ଦି ୱାର୍‌ଇ ଏ଼ୱାରି ତାକି ଆ଼ନେ,

ସାମା ଏ଼ନି ପା଼ପୁ ଲ଼କୁ ଏ଼ ଜିରୁତା ତା଼କଅରି;

ଏ଼ ଜିରୁଟି ତା଼କିନାରି ବୁଦି ହିଲାଆଗାଟାରି ଜିକେଏ ଜିରୁ ବା଼ଣା ଆ଼ଅରି।

9 ଏମ୍ବାଆଁ ଏ଼ନି ସିହଁ କ୍ଡାଃନି ଡ଼ୟେଏ, କି ଏ଼ନି ନା଼ସା କିନି ଜ଼ନ୍ତ ଏ଼ ଲାକ ହାଲେଏ,

ଏ଼ୱି ଏମ୍ବାଆଁ ତ଼ଞ୍ଜା ଆ଼ଉ; ସାମା ଗେଲ୍‌ପିଆ଼ତି ଲ଼କୁ ଏମ୍ବାଆଁ ତା଼କିନେରି;

10 ଇଞ୍ଜାଁ, ପ୍ରବୁତି ଗେଲ୍‌ପିଆ଼ତି ଲ଼କୁ ୱେଣ୍ତା ୱା଼ନେରି

ଅ଼ଡ଼େ ପା଼ଚୁ ପା଼ଚି ପା଼ଚିହିଁ ସିୟନତା ୱା଼ନେରି;

ଅ଼ଡ଼େ କା଼ଲେଏତି ରା଼ହାଁ ଏ଼ୱାରି ତା଼ର୍ୟୁଁତି ଟ଼ପେରି ଆ଼ନେ;

ଏ଼ୱାରି କା଼ଲେଏ ରା଼ହାଁ ଆ଼ନେରି, ଦୁକୁ ଅ଼ଡ଼େ ଡ଼ୀକି ହା଼ଡା ହେକ ଆ଼ନେ।