1 ଆମ୍ବାଆରାଇଁ ନା଼ନୁ ଆହ୍‌ଇଁ, ଇଲେତି ନା଼ ହ଼ଲେଏଣାଇଁ,

ଆମ୍ବାଆରି ତା଼ଣା ନା଼ ହିୟାଁ ରା଼ହାଁ, ଇଲେତି ନା଼ ଆ଼ଚିତି ଲ଼କୁଇଁ ମେହ୍‌ମୁ;

ନା଼ନୁ ଏ଼ୱାଣି ଲାକ ନା଼ ଜୀୱୁ ହୀହାମାଇଁ;

ଏ଼ୱାସି ବାରେ ଦେ଼ସାତି ଲ଼କୁ ତା଼ଣା ବିଚାରା କିନେସି।

2 ଏ଼ୱାସି କା଼ଲୱି କି କାଜା ଗିୟାଁ କିଅସି,

କି କାଜା ପା଼ହେରିତା ତାନି ଗିୟାଁ ୱେଣ୍‌ମ୍ବି କିଅସି।

3 ଏ଼ୱାସି ପାଡାମାନି ନା଼ଡା ଡିକ୍‌ଅସି ଅ଼ଡ଼େ ବ଼ୟିଁ ଆ଼ହିଁ ଡ଼ୀଞ୍ଜିମାନି ଦୀୱଁ ଡୁପ୍‌ଅସି;

ଏ଼ୱାସି ସାତା ତଲେ ନୀହାଁୟି ବିଚାରା କିନେସି।

4 ଏ଼ୱାସି ଦାର୍‌ତିତି ନୀହାଁୟି ବିଚାରା କିଆ ପାତେକା ୱା଼ହଅସି କି ବା଼ଡ଼୍‌ୟୁ ଊଣା କିଅସି;

ଅ଼ଡ଼େ ସାମ୍‌ଦୁରି ମାଦି ମାନି ଲ଼କୁ ତାନି ମେ଼ରାତି କା଼ଚାହାଁ ଡ଼ୟିନେରି।

5 ଆମ୍ବାଆସି ହା଼ଗୁପା଼କା ଗା଼ଡ଼ି କିହାଁ ଦା଼ସ୍ତେସି;

ଆମ୍ବାଆସି ବୂମି ଅ଼ଡ଼େ ଏମ୍ବାଆଁ ନେୟିଁତାଣି ବାରେ ଏ଼ପି କିତେସି;

ଆମ୍ବାଆସି ଏ଼ ଲାକତି ବାରେ ଲ଼କୁକି ଊକ୍‌ଅଡ଼ି ହୀନେସି

ଅ଼ଡ଼େ ଏମ୍ବାଆଁ ତା଼କିନି ଲ଼କୁଣି ଜୀୱୁ ହୀନେସି,

ଏ଼ ପ୍ରବୁ ମାହାପୂରୁ ଈ କାତା ଏଲେଇଞ୍ଜି ମାନେସି;

6 "ନା଼ନୁ ପ୍ରବୁତେଏଁ, ଦାର୍ମୁଟି ନିଙ୍ଗେ ହା଼ଟାମାଞ୍ଜାଇଁ

ଅ଼ଡ଼େ ନୀ କେୟୁ ଆସାହାଁ ନିଙ୍ଗେ ଗେଲ୍‌ପାଇଁ,

ଅ଼ଡ଼େ କା଼ଣାୟାଁ କାଣ୍‌କା ଦେଚାଲି ତାକି,

କାୟିଦି ଗାଟାରାଇଁ କାୟିଦିଟି

ଅ଼ଡ଼େ ଆନ୍ଦେରିତା କୁଗାମାନି ଲ଼କୁଣି କାୟିଦିଟି ହ଼ପ୍‌ହା ତାଚାଲି ତାକି,

7 ନା଼ନୁ ନିଙ୍ଗେ ଲ଼କୁତି ମେ଼ରା ଲେହେଁ

ଅ଼ଡ଼େ ବାରେ ଦେ଼ସାତି ଲ଼କୁତି ଉଜେଡ଼ି ଲେହେଁ କିହାଁ ଆ଼ଚାଇଁ।

8 ନା଼ନୁ ପ୍ରବୁତେଏଁ, ନା଼ ଦ଼ରୁ ଈଦି; ଇଞ୍ଜାଁ, ନା଼ନୁ ନା଼ ଗା଼ୱୁରମି ଏଟ୍‌କା ତାଣାକି

ଅ଼ଡ଼େ ନା଼ ସାମ୍ବ୍ରମି ତୀର୍‌ସିତି ବମାୟାଁକି ହୀଅଁ।

9 ମେହ୍‌ଦୁ, ମୂଲୁତି କାତା ଆ଼ହାମାନେ,

ଅ଼ଡ଼େ ନା଼ନୁ ପୁଃନି କାତା ୱେସ୍ତାଇଁ;

ଏ଼ ବାରେ ଆ଼ନି ନ଼କେଏ ଏ଼ କାତା ନା଼ନୁ ମିଙ୍ଗେ ପୁଣ୍‌ମ୍ବି କିୟାଇଁ।"

10 ଏ଼ ସାମ୍‌ଦୁରିତା ହାନାତେରି ଅ଼ଡ଼େ ସାମ୍‌ଦୁରି ମାଦିତି ବାରେତେରି,

ଏ଼ ସାମ୍‌ଦୁରି ମାଦିମାନି କୁପ୍‌ଲି ଅ଼ଡ଼େ ଏମ୍ବାଆଁ ବାସା କିହାମାନାତେରି,

ମୀରୁ ବାରେ ପ୍ରବୁତି ତାକି ପୁଃନି ପା଼ଚୁ

ଅ଼ଡ଼େ ଦାର୍‌ତିତି ମୁଟ୍‌ପେଟି ତାନି ସାମ୍ବ୍ରମି ପା଼ଚାଦୁ।

11 ଜା଼ଡ଼ା ଅ଼ଡ଼େ ଏମ୍ବାତି ଗା଼ଡ଼ାୟାଁ ବାରେ,

କେଦାର ମାନି ନା଼ୟୁଁ ବାରେ କାଜା ଗିୟାଁ କିପୁ;

ସେଲାତା ବାସା କିହାମାନାରି ପା଼ଚାପେରି,

ହ଼ର୍‌କା ଲାକତି ସିଣ୍ତିଟି ଏ଼ୱାରି ରା଼ହାଁ ତଲେ କା଼ଲୱି ଆ଼ପେରି।

12 ଏ଼ୱାରି ପ୍ରବୁଇଁ ଗା଼ୱୁରମି ହୀପାରି

ଅ଼ଡ଼େ ସାମ୍‌ଦୁରି ମାଦିମାନି କୁପ୍‌ଲିତା ତାନି ସାମ୍ବ୍ରମି ୱେ଼ପ୍‌କାରି।

13 ପ୍ରବୁ ବା଼ଡ଼୍‌ୟୁ ଗାଟାସି ଲେହେଁ ହ଼ଚା ୱା଼ନେସି;

ଏ଼ୱାସି ବପୁ ଗାଟାଣି ଲେହେଁ ତାନି ଦାକା ହୀନେସି;

ଏ଼ୱାସି କାଜା ହା଼ଡା ତଲେ କା଼ଲୱି ଆ଼ନେସି,

ଏ଼ୱାସି ତାନି ସାତ୍ରୁୟାଁ କ଼ପାଟି ହା଼ରେକା ବା଼ଡ଼୍‌ୟୁତି କାମା କିନେସି।

14 ନା଼ନୁ ହା଼ରେକା କା଼ଲାଟିଏ ପାଲେଏ ଆ଼ହାମାଇଁ,

ନା଼ନୁ ତୀରି ଆ଼ହାଁ ଜାହାରାଇଁ ସାପି କିହାମାଇଁ;

ନୀଏଁ ନା଼ନୁ ଜାର୍ନି କିନି ଇୟାନି ଲେହେଁ କା଼ଲୱି ଆ଼ଇଁ;

ନା଼ନୁ ଏକାବେ଼ଡ଼େଏ କାଜା ନେ଼ସ୍ତେରି ଅ଼ହାଁ ହ଼ଡ଼୍‌ନି ହିୟାଁ ଆ଼ହାମାଇଁ।

15 ନା଼ନୁ ହ଼ର୍‌କା ଅ଼ଡ଼େ ଊଣା ହ଼ର୍‌କା ନା଼ସା କିଇଁ

ଅ଼ଡ଼େ ଏମ୍ବାତି ମା଼ର୍‌କା ବାରେ ୱା଼ୟିକିଇଁ;

ଅ଼ଡ଼େ ନା଼ନୁ କାଡାୟାଁଣି ସାମ୍‌ଦୁରି ମାଦିତି ଟା଼ୟୁ

ଅ଼ଡ଼େ ଊବିୟାଁ ୱା଼ୟିକିଇଁ।

16 ଇଞ୍ଜାଁ ନା଼ନୁ କା଼ଣାୟାଁଇଁ ଏ଼ୱାରି ପୁନାଆତି ଜିରୁଟି ତାଇଁ;

ଏମିନି ଜିରୁ ଏ଼ୱାରି ପୁଞ୍ଜା ହିଲଅରି,

ଏ଼ ବାରେ ଜିରୁଟି ଏ଼ୱାରାଇଁ ତା଼କି କିଇଁ;

ନା଼ନୁ ଏ଼ୱାରି ନ଼କିତା ଆନ୍ଦେରିତି ଉଜେଡ଼ି

ଅ଼ଡ଼େ ଡ:କ୍‌ଣି ଜିରୁ ସଲ୍‌କେ କିଇଁ।

ନା଼ନୁ ଈ ବାରେ କାମା କିହାଁ ଏ଼ୱାରାଇଁ ପିହ୍‌ଅଁ।

17 ଆମ୍ବାଆରି ତୀର୍‌ସିତି ବମାୟାଁଣି ବା଼ର୍ସୁ କିନେରି

ଅ଼ଡ଼େ ଗାରାତା କେ଼ପିତି ବମାୟାଁଣି ନୀନୁ ନା଼ ମାହାପୂରୁ ଇନେରି

ଏ଼ୱାରି ଏଟ୍‌କା ହାଜାହାଁ ହା଼ରେକା ଲାଜା ଆ଼ନେରି।

18 ଏ଼ ବେ଼ରାୟାଁ ୱେଞ୍ଜୁ;

ଏ଼ କା଼ଣାୟାଁତେରି ମୀରୁ ମେସାଲି ତାକି ସିନିକିଦୁ।

19 ନା଼ ହ଼ଲେଏଣା ପିସ୍‌ପେ କା଼ଣା ଆମ୍ବାଆସି ?

ଇଞ୍ଜାଁ ନା଼ ପାଣ୍ତିତି କାବ୍ରୁ ୱେହ୍‌ନାସି ଲେହେଁ ବେ଼ରା ଆମ୍ବାଆସି ?

ନା଼ ତଲେ ଆଣ୍ତାମାନି ଲ଼କୁ ଲେହେଁ କା଼ଣା

ଅ଼ଡ଼େ ପ୍ରବୁତି ହ଼ଲେଏଣା ଲେହେଁ କା଼ଣା ଆମ୍ବାଆସି ?

20 ମୀରୁ ହା଼ରେକା କାତା ମେସି ମାଞ୍ଜେରି,

ସାମା ମ଼ନ ହୀହି ହିଲଅତେରି;

ଏ଼ୱାଣି କିର୍ୟୁଁ ଦେପି ଆ଼ହାମାନେ,

ସାମା ଏ଼ୱାସି ୱେଞ୍ଜିହିଲଅସି।

21 ପ୍ରବୁ ତାନି ଦାର୍ମୁ ତାକି ମେ଼ରାତି କାଜାଣି

ଅ଼ଡ଼େ ଗା଼ୱୁରମି କିହାଲି ରା଼ହାଁ ଆ଼ତେସି।

22 ସାମା ଈ ଲ଼କୁ ସ଼ରୁ କିୱିଆ଼ହାଁ ଅ଼ଡ଼େ ମା଼ଣ୍‌ପି ଆ଼ହାମାନେରି;

ଏ଼ୱାରି ବାରେ ଗା଼ଡ଼୍‌ୟୁତା ମେଦାମାନେରି ଅ଼ଡ଼େ କା଼ୟିଦିତା ସୁଣ୍ତ୍‌କି ଆ଼ହାମାନେରି;

ଏ଼ୱାରି ଆସ୍‌ପି ଆ଼ହାମାନେରି, ଇଞ୍ଜାଁ ଏ଼ୱାରାଇଁ ପିସ୍‌ପି କିନାରି ଆମ୍ବାଆରି ହିଲଅରି;

ଏ଼ୱାରି ସ଼ରୁ କିୱିଆ଼ତି ଲେହେଁ ଆ଼ହା ମାନେରି ଅ଼ଡ଼େ ୱେଣ୍ତେ ପାଣ୍ତାଦୁ ଇନାସି ଆମ୍ବାଆସି ହିଲଅସି।

23 ଈ କାତାତା ଆମ୍ବାଆସି କିର୍ୟୁଁ ଅଡିନେସି

ଅ଼ଡ଼େ ୱେଞ୍ଜାହାଁ ୱା଼ହିମାନି କା଼ଲା ତାକି ମ଼ନ ହୀନେସି,

ଇଲେତି ଲ଼କୁ ମୀ ବିତ୍ରା ଆମ୍ବାଆସି ମାନେସି ?

24 ଜାକୁବଇଁ ସ଼ରୁ କିୱିଆ଼ତି ଲେହେଁ ଆ଼ହାଲି ଅ଼ଡ଼େ ଇସ୍ରାୟେଲଇଁ ସ଼ର୍‌କାତି କେୟୁତା ଆମ୍ବାଆସି ହେର୍‌ପିତେସି ?

ଆମ୍ବାଆରି କ଼ପାଟି ମା଼ର ପା଼ପୁ କିହାମାନାୟି ଅ଼ଡ଼େ ଆମ୍ବାଆରି ଜିରୁତା ଲ଼କୁ ତା଼କାଲି ମ଼ନ କିଆତେରି,

ଅ଼ଡ଼େ ଏ଼ୱାରି ଆମ୍ବାଆରି ହୁକୁମି ମା଼ନୱି ଆ଼ଆତେରି,

ଏ଼ ପ୍ରବୁ କି ଈ ବାରେ କିହା ହିଲଅସି ?

25 ଏ଼ଦାଆଁତାକି ଏ଼ୱାସି ତାନି ମୁହେଁ ତାନି ହା଼ରେକା କାର୍‌ବି

ଅ଼ଡ଼େ ଜୁଜୁତି ବା଼ଡ଼୍‌ୟୁ ହୀତେସି;

ଏଚେଟିଏ ତାନି ସା଼ରିୱାକି ହିଚୁ ଡ଼ୀଞ୍ଜିତେ,

ସାମା ଏ଼ୱାସି ପୁନାଆତେସି;

ଇଞ୍ଜାଁ ହିଚୁ ଏ଼ୱାଣାଇଁ ହୂଡିତେ ଆ଼ତିଜିକେଏ ଏ଼ୱାସି ମ଼ନ ହୀଆତେସି।