Isaías 45

କରସଇଁ ପ୍ରବୁ ଆ଼ଚିନାୟି

1 ପ୍ରବୁ ତାନି ଆ଼ଚାମାନି ମାଣ୍‌ସି, ଇଚିହିଁ କରସତି ଈ କାତା ଏଲେଇଞ୍ଜି ମାନେସି,

"ନା଼ନୁ ଏ଼ୱାଣି ନ଼କିତା ହା଼ରେକା କୂଡ଼ାତି ହା଼ରୱି କିହାଲି ତାକି ଏ଼ୱାଣି ଟିଃନି କେୟୁ ଆସାମାଇଁ ଅ଼ଡ଼େ ନା଼ନୁ ରାଜାୟାଁ ଟେଡେଲି ଉଗ୍‌ଡ଼ା କିଇଁ;

ନା଼ନୁ ଏ଼ୱାଣି ନ଼କିତା ଦା଼ରାୟାଁ ବାରେ ଦେଃଇଁ ଅ଼ଡ଼େ ଗା଼ଡ଼ା ଦୁୱେରିକା ସୁଣ୍ତ୍‌କି ଆ଼ଉ;

2 ନା଼ନୁ ନୀ ନ଼କି ନ଼କିତା ତା଼କିଇଁ, ଡେପା କାଡ଼୍‌ଦି ଲେହେଁ କିଇଁ;

ନା଼ନୁ ପିତାଡ଼ା ଦା଼ରାୟାଁ ଡିକ୍‌ହାଁ ଗାଣ୍ତ୍ରା ଗାଣ୍ତ୍ରା କିଇଁ ଅ଼ଡ଼େ ଲ଼ହତି ଅର୍ଗଡ଼ି ଦା଼ଚାତୁହ୍‌ଇଁ;

3 ଇଞ୍ଜାଁ ନା଼ନୁ ନିଙ୍ଗେ ଆନ୍ଦେରିତା ଡ଼ୁଗାମାନାଣି ଅ଼ଡ଼େ ମେହ୍‌ଆ ଟା଼ୟୁତା ଇଟାମାନି ଦ଼ନ ନିଙ୍ଗେ ହିୟାଇଁ,

ଏଚେଟିଏ ନୀ ଦ଼ରୁ ଆସାହାଁ ହା଼ଟାନାତେଏଁ ନା଼ନୁ ପ୍ରବୁ ଇସ୍ରାୟେଲତି ମାହାପୂରୁତେଏଁ,

ଈଦାଆଁ ନୀନୁ ପୁଞ୍ଜାଲି ଆ଼ଡିଦି।

4 ନା଼ ହ଼ଲେଏସି ଜାକୁବ ଅ଼ଡ଼େ ନା଼ ଆ଼ଚିତି ଇସ୍ରାୟେଲ ତାକି ନା଼ନୁ ନୀ ଦ଼ରୁ ଆସାହାଁ ନିଙ୍ଗେ ହା଼ଟାମାଞ୍ଜାଇଁ;

ନୀନୁ ନାଙ୍ଗେ ପୁଞ୍ଜାଆତି ଜିକେଏ ନା଼ନୁ ନିଙ୍ଗେ ପଦୁ ହୀହାମାଞ୍ଜାଇଁ।

5 ନା଼ନୁ ପ୍ରବୁ ଅ଼ଡ଼େ ଆମ୍ବାଆସି ହିଲଅସି;

ନା଼ ପିସ୍‌ପେ ଅ଼ଡ଼େ ମାହାପୂରୁ ହିଲଅସି;

ନୀନୁ ନାଙ୍ଗେ ପୁଞ୍ଜାଆତି ଜିକେଏ ନା଼ନୁ ନିଙ୍ଗେ ସା଼ସା ହିୟାଇଁ;

6 ଏଚେଟିଏ ନା଼ ପିସ୍‌ପେ ଅ଼ଡ଼େ ଆମ୍ବାଆସି ହିଲଅସି,

ଈଦାଆଁ ୱେ଼ଡ଼ା ହ଼ପୁଟିଏ ୱେ଼ଡ଼ା କୂଡ଼୍‌ନି ପାତେକା ଲ଼କୁ ପୁଞ୍ଜାନେରି;

ନା଼ନୁ ପ୍ରବୁ ଅ଼ଡ଼େ ରଅସି ଆମ୍ବାଆସି ହିଲଅସି।

7 ନା଼ନୁ ଉଜେଡ଼ି କେ଼ପିନାତେଏଁ ଅ଼ଡ଼େ ଆନ୍ଦେରି ଗା଼ଡ଼ି କିନାତେଏଁ;

ନା଼ନୁ ହିତ୍‌ଡ଼ି ହୀନାତେଏଁ ଅ଼ଡ଼େ କସ୍ତତି ଗା଼ଡ଼ି କିନାତେଏଁ;

ନା଼ନୁ ପ୍ରବୁ ଈ ବାରେ କିନାତେଏଁ।

8 ଏ଼ ହା଼ଗୁପା଼କା ନୀନୁ ଲାକଟି ପିୟୁ ରିୱିକିମୁ,

ହା଼ଗୁ ଦୂନ୍ଦ୍ରା ଦାର୍ମୁତି ପିୟୁ ରିୱିକିମୁ; ଏ଼ନିକିଁ ଗେଲ୍‌ପିନାୟି ନେୟିଁନେ,

ଏ଼ଦାଆଁତାକି ଦାର୍‌ତି ଡ଼ାୟା ହାଲାପେ ଅ଼ଡ଼େ ଏ଼ ଦାର୍ମୁ ରହେଁଏ ନେୟିଁକିପେ;

ନା଼ନୁ ପ୍ରବୁ ଈ ବାରେ ଗା଼ଡ଼ି କିହାମାଇଁ।"

ପ୍ରବୁ ଗା଼ଡ଼ିକିତାସି ଅ଼ଡ଼େ ତାନି ଆ଼ତିକାତା

9 "ଅହ଼ତା, ଏ଼ୱାଣି ଡଣ୍ତ, ଆମ୍ବାଆସି ତାନି ଗା଼ଡ଼ି କିତାଣି କ଼ପାଟି ନିଙ୍ଗିନେସି,

ଇର୍‌ଆତି କିପ୍‌ରି ବିତ୍ରାଟି ର଼ ଊଣା କିପ୍‌ରି!

ଏ଼ ଇର୍‌ଆ ଏ଼ନାଆଁ ତାନି ଗା଼ଡ଼ି କିନି ମାଣ୍‌ସିଇଁ ଏଲେଇନେ,

‘ନୀନୁ ଏ଼ନାଆଁ ଗା଼ଡ଼ି କିହିମାଞ୍ଜି ?’

ଏ଼ନାଆଁ କୁମ୍ବ୍ରେଏଣା କିହାମାନାୟି ଏଲେଇନେ, ‘ଏ଼ୱାଣି କେୟୁ ହିଲେଏ ?’

10 ଅହ଼ତା, ଏ଼ୱାଣି ଡଣ୍ତ, ଆମ୍ବାଆସି ଜାହାରା ତାଲି ତାଞ୍ଜିଇଁ ଏଲେଇନେସି,

‘ମୀରୁ ଏ଼ନାଆଁ ଜାର୍ନି କିହିମାଞ୍ଜେରି ?’"

11 ପ୍ରବୁ ଇସ୍ରାୟେଲତି ଦାର୍ମୁଗାଟି ମାହାପୂରୁ ଅ଼ଡ଼େ ତାନି ଗା଼ଡ଼ିକିତାସି ଈ କାତା ଏଲେଇଞ୍ଜି ମାନେସି,

"ୱା଼ହିମାନି ଦିନାତା ଆ଼ନି କାତା ନାଙ୍ଗେ ୱେଞ୍ଜାଦୁ ?

ମୀରୁ ନା଼ ମୀର୍‌କାତି କାତା ଅ଼ଡ଼େ ନା଼ କେୟୁତି କାମା କାତା ନାଙ୍ଗେ ହୁକୁମି ହିୟାଦୁ ?

12 ନା଼ନୁ ଦାର୍‌ତି ତିୟାରା କିହାମାଇଁ ଅ଼ଡ଼େ ତାନି ବିତ୍ରା ମାଣ୍‌ସିଇଁ ଗା଼ଡ଼ି କିହାମାଇଁ;

ନା଼ନୁ ନା଼ କେୟୁଟି ହା଼ଗୁପା଼କା ଦା଼ସାମାଇଁ ଅ଼ଡ଼େ ଏମ୍ବାଆଁ ମାନି ବାରେତି ହୁକୁମି ହୀହାମାଇଁ।

13 ନା଼ନୁ ଦାର୍ମୁଟି ଏ଼ୱାଣାଇଁ ଗା଼ଡ଼ି କିହାମାଇଁ ଅ଼ଡ଼େ ନା଼ନୁ ତାନି ବାରେ ଜିରୁ ସଲ୍‌କେ କିଇଁ;

ଏ଼ୱାସି ନା଼ ଗା଼ଡ଼ା ୱେଣ୍ତେ ତିୟାରା କିନେସି,

ଅ଼ଡ଼େ ଏ଼ୱାସି ନା଼ ଦସ୍‌ପା ଅ଼ହାମାନି ଲ଼କୁଣି ଏ଼ନି ଦାରା କି ବାଦୁଲି ଅ଼ଆନା ପିସା ପାଣ୍ତାନେସି।"

ଈ କାତା ବା଼ଡ଼୍‌ୟୁଗାଟି ପ୍ରବୁ ଏଲେଇଞ୍ଜି ମାନେସି।

ପ୍ରବୁ ରଅସିଏ ଗେଲ୍‌ପିନାସି

14 ପ୍ରବୁ ଈ କାତା ଏଲେଇଞ୍ଜି ମାନେସି,

"ମିସରତି କସ୍ତ, କୂସତି ବେ଼ବାରାତି ଲା଼ବା ଅ଼ଡ଼େ ପାଡାଆ଼ତି ସବାୟିୟ ଲ଼କୁ ନୀ ତା଼ଣା ୱା଼ନେରି ଅ଼ଡ଼େ ନୀ ଲ଼କୁ ଆ଼ନେରି;

ଏ଼ୱାରି ନୀ ଜେ଼ଚ ତା଼କିନେରି; ଏ଼ୱାରି ହିକ୍‌ଣି ତଲେ ଦସ୍‌ପି ଆ଼ହାଁ ୱା଼ନେରି;

ଇଞ୍ଜାଁ ଏ଼ୱାରି ନିଙ୍ଗେ ଜହରା କିୟାନେରି ଅ଼ଡ଼େ ବାତିମା଼ଲାହାଁ ଏଲେଇଞ୍ଜାନେରି, ସାତେଏ ମାହାପୂରୁ ନୀ ତା଼ଣା ମାନେସି;

ଏ଼ୱାଣି ପିସ୍‌ପେ ଅ଼ଡ଼େ ଆମ୍ବାଆସି ହିଲଅସି, ଅ଼ଡ଼େ ଆମ୍ବାଆସି ମାହାପୂରୁ ହିଲଅସି।"

15 ଏ଼ ଗେଲ୍‌ପାନି ଇସ୍ରାୟେଲତି ମାହାପୂରୁ,

ସାତେଏ ନୀନୁ ଇଲେତି ମାହାପୂରୁ ଆମ୍ବାଆସି ଜାହାରାଇଁ ଡ଼ୁକ୍‌ହାଁ ଇଟିନେସି।

16 ପେ଼ଣ୍‌କା ବମାୟାଁ ତିୟାରା କିନାରି ବାରେ ଲାଜା ଅ଼ଡ଼େ ଆଡାଜାକା ଆ଼ନେରି,

ଏ଼ୱାରି ବାରେ କିଲିବିଲି ଆ଼ନେରି।

17 ସାମା ଇସ୍ରାୟେଲ ପ୍ରବୁ ତା଼ଣାଟି କା଼ଲେଏତି ଗେଲ୍‌ପିନାଣି ବେଟାଆ଼ନେ;

ମୀରୁ ଜୁଗୁ ଜୁଗୁ ତାକି ଏଚେଲା ଲାଜା କି କିଲିବିଲି ଆ଼ଅତେରି।

18 ଇଚିହିଁ ହା଼ଗୁପା଼କାତି ଗା଼ଡ଼ିକିତି ପ୍ରବୁ ଏଲେଇଞ୍ଜି ମାନେସି,

ଏ଼ୱାସି ମାହାପୂରୁ; ଏ଼ୱାସି ଦାର୍‌ତି ଗା଼ଡ଼ି କିହାଁ ତିୟାରା କିତେସି;

ଏ଼ୱାସି ଏ଼ଦାଆଁ ତୀରି କିତେସି, ଏ଼ୱାସି ଏ଼ଦାଆଁ ୱାର୍‌ଆଣି କିହିଁ ଗା଼ଡ଼ି କିଆନା ବାସା ଟା଼ୟୁ ଆ଼ହାଲି ତାକି ଗା଼ଡ଼ି କିତେସି,

ନା଼ନୁ ପ୍ରବୁତେଏଁ ଅ଼ଡ଼େ ଆମ୍ବାଆସି ହିଲଅସି।

19 ନା଼ନୁ ଡ଼ୁଗାହାଁ ଆନ୍ଦେରି ଦେ଼ସାତି ଏ଼ନି ଟା଼ୟୁତା ୱେସାହିଲଅଁ;

ନା଼ନୁ ଜାକୁବ କୂଲୁତି ଏଲେଇଞ୍ଜା

ହିଲଅଁ, ମୀରୁ ଉଜେଏ ନାଙ୍ଗେ ପାରାଦୁ।

ନା଼ନୁ ଦାର୍ମୁତି ପ୍ରବୁ ସାତା ଜ଼ଲିଇଁ, ନା଼ନୁ ନେହିଁ କାତା ୱେହ୍‌ଇଁ।

ଦାର୍‌ତିତି ପ୍ରବୁ ଅ଼ଡ଼େ ବାବିଲନତି ବମାୟାଁ

20 ଏ଼ ହା଼ରେକା କୂଡ଼ାଟି ଗେଲ୍‌ପି ଆ଼ହାମାନି ଲ଼କୁତେରି,

ମୀରୁ ରୁଣ୍ତା ଆ଼ହାଁ ୱା଼ଦୁ, ରହେଁଏ ନା଼ ଡାଗେ ୱା଼ଦୁ;

ଆମ୍ବାଆରି ତାମି କେ଼ପାମାନି ବମାୟାଁତି ମା଼ର୍‌କା ଡେ଼କିହିଁ ରେ଼ନେରି

ଅ଼ଡ଼େ ଗେଲ୍‌ପାଲି ଆ଼ଡାଆଗାଟି ପେ଼ନୁତି ନ଼କିତା ପ୍ରା଼ତାନା କିନେରି,

ଏ଼ୱାରାକି ଇଚାୟି ବୁଦି ହିଲେଏ।

21 ମୀରୁ ଏ଼ୱାରାଇଁ ୱେ଼କ୍‌ଦୁ ଅ଼ଡ଼େ ଏ଼ଦାଆଁ ତ଼ହ୍‌ଦୁ;

ହାଅ, ଏ଼ୱାରି ତା଼ମ୍ବୁ ତା଼ମ୍ବୁ କାତା ଆ଼ପେରି;

ତଲି କା଼ଲାତା ଆମ୍ବାଆସି ଈଦାଆଁ ୱେସାମାନେସି ?

ତଲି କା଼ଲାଟିଏ ଆମ୍ବାଆସି ଈଦାଆଁ ତ଼ସାମାନେସି ?

ନା଼ନୁ ପ୍ରବୁତେଏଁ କି ଈଦାଆଁ କିହା ହିଲଅଁ ?

ନା଼ ପିସ୍‌ପେ ଏଟ୍‌କାତି ମାହାପୂରୁ ହିଲଅସି,

ନା଼ନୁ ଦାର୍ମୁ ଅ଼ଡ଼େ ଗେଲ୍‌ପିନି ମାହାପୂରୁତେଏଁ;

ନା଼ ପିସ୍‌ପେ ଅ଼ଡ଼େ ଆମ୍ବାଆସି ହିଲଅସି।

22 ଏ଼ ଦାର୍‌ତିତି ହେକ ଦେ଼ସାତା ମାନି ବାରେ ଲ଼କୁ,

ମୀରୁ ନା଼ ୱାକି ସିନିକିହାଁ ଗେଲ୍‌ପିନାଣି ବେଟାଆ଼ଦୁ;

ଇଚିହିଁ ନା଼ନୁ ମାହାପୂରୁତେଏଁ ନା଼ ପିସ୍‌ପେ ଅ଼ଡ଼େ ଆମ୍ବାଆସି ହିଲଅସି।

23 ନା଼ନୁ ନା଼ ଦ଼ରୁଟି ପାର୍‌ମାଣା କିହାମାଇଁ ଅ଼ଡ଼େ ଦାର୍ମୁତି ବ଼ଲୁ ନା଼ ଗୂତିଟି ହ଼ଚାମାନେ,

ଏ଼ଦି ଏଟ୍‌କା ଆ଼ହାଲି ଆ଼ଡେଏ,

ନା଼ ନ଼କିତା ବାରେ ମେଣ୍ତାୟାଁ କୁତିନୁ ଅ଼ଡ଼େ ବାରେ ୱେନ୍ଦରିକା ପାର୍‌ମାଣା କିନୁ।

24 ଲ଼କୁ ନା଼ କାତା ଏଲେଇନେରି, "ୱାର୍‌ଇ ପ୍ରବୁ ତା଼ଣା ଦାର୍ମୁ ଅ଼ଡ଼େ ବା଼ଡ଼୍‌ୟୁ ମାନେ।"

ଏ଼ୱାଣି ତା଼ଣା ଲ଼କୁ ୱା଼ନେରି ଇଞ୍ଜାଁ ଆମିନିଗାଟାରି ଏ଼ୱାଣି କ଼ପାଟି କାର୍‌ବି ଆ଼ହାମାଚେରି,

ଏ଼ୱାରି ବାରେ ଲାଜା ଆ଼ନେରି।

25 ଇସ୍ରାୟେଲତି ବାରେ କୂଲୁତି ଲ଼କୁ ପ୍ରବୁ ତା଼ଣା ଦାର୍ମୁଗାଟାରି ଆ଼ନେରି,

ଅ଼ଡ଼େ ବଡପଣ କିନେରି।