ପ୍ରବୁତି ହ଼ଲେଏସି
1 ଏ଼ ସାମ୍ଦୁରି ମାଦି ମାନି ଟା଼ୟୁତି, ନା଼ କାତା କିର୍ୟୁଁ ଅଡାହାଁ ୱେନାମୁ;
ଏ଼ ହେକ ରା଼ଜିତି ଲ଼କୁ, ମ଼ନ ହୀହାଁ ୱେଞ୍ଜୁ;
ନା଼ନୁ ତାଲିନି ବାଣ୍ତିତା ମାଚାଟିଏ ପ୍ରବୁ ନାଙ୍ଗେ ଆ଼ଚାମାଞ୍ଜାନେସି;
ନା଼ନୁ ତାଲିନି ବାଣ୍ତିଟି ଜାର୍ନା ଆ଼ଆ ନ଼କେଏ ଏ଼ୱାସି ନା଼ ଦ଼ରୁ ୱେସାମାଚେସି;
2 ଇଞ୍ଜାଁ ଏ଼ୱାସି ନା଼ ଗୂତି ୱାସାମାନି କାଣ୍ତା ଲେହେଁ କିହାମାଞ୍ଜାନେସି,
ତାନି କେୟୁତି ସା଼ୟିଁତା ନାଙ୍ଗେ ଡ଼ୁକ୍ହା ମାଞ୍ଜାନେସି,
ଅ଼ଡ଼େ ଏ଼ୱାସି ନାଙ୍ଗେ ଅପ୍ହି ୱେଲୁ ଲେହେଁ କିହାଁ ତାନି ୱେଲୁ ଇଟିନି ଡୁଙ୍ଗାତା ଡ଼ୁକ୍ହା ଇଟାମାଞ୍ଜାନେସି;
3 ଇଞ୍ଜାଁ ଏ଼ୱାସି ନାଙ୍ଗେ ଏଲେଇଞ୍ଜାତେସି, "ନୀନୁ ନା଼ ହ଼ଲେଏଣାତି; ନୀନୁ ଇସ୍ରାୟେଲତି,
ନୀ ତା଼ଣାଟି ନା଼ନୁ ଗା଼ୱୁରମି ଆ଼ଇଁ।"
4 ସାମା ନା଼ନୁ ଏଲେଇଚେଏଁ, ନା଼ନୁ ଉଜେଏ କସ୍ତ କିହିମାଇଁ,
ନା଼ନୁ ଉଜେଏ ନା଼ ବା଼ଡ଼୍ୟୁ ରା଼ପ୍ହାମାଇଁ;
ଆ଼ତିଜିକେଏ ନା଼ ବିଚାରା ପ୍ରବୁ ତା଼ଣା ଅ଼ଡ଼େ ନା଼ କାମାତି ପା଼ଡ଼େୟି ନା଼ ମାହାପୂରୁ ତା଼ଣା ମାନେ।
5 ଇଞ୍ଜାଁ ନାଙ୍ଗେ ତାନି ସେ଼ବା କିନାସି ଆ଼ହାଲି ତାକି ଅ଼ଡ଼େ ଜାକୁବଇଁ ତାନି ନ଼କିତା ତାଚାଲି ତାକି
ଅ଼ଡ଼େ ଇସ୍ରାୟେଲତି ତାନି ନ଼କିତା କୂଡ଼ି କିହାଲି ତାକି ଆମ୍ବାଆସି ନାଙ୍ଗେ ତାଲିନି ବାଣ୍ତିଟିଏ ନାଙ୍ଗେ ରାଚି କିୟାତେସି,
ହେ଼ ପ୍ରବୁ ନୀଏଁ ଏଲେଇଞ୍ଜି ମାନେସି; ଇଚିହିଁ ନା଼ନୁ ପ୍ରବୁତି ନ଼କିତା ମା଼ନିଗାଟାତେଏଁ
ଅ଼ଡ଼େ ନା଼ ମାହାପୂରୁ ନା଼ ବା଼ଡ଼୍ୟୁ ଲେହେଁ ଆ଼ହାମାନେସି।
6 ଏ଼ଦାଆଁତାକି ଏ଼ୱାସି ଏଲେଇଞ୍ଜି ମାନେସି,
"ଈଦି ର଼ ଊଣାତି କାତା; ନୀନୁ ଜାକୁବ କୂଡ଼ାତି ଗେଲ୍ପାଲି ତାକି
ଅ଼ଡ଼େ ଇସ୍ରାୟେଲତି ଡ଼ୟାମାନି ଲ଼କୁଣି ୱେଣ୍ତେ ତାଚାଲି ତାକି
ନା଼ ସେ଼ବା କିନାତି ଆ଼ଦି,
ନୀନୁ ଦାର୍ତିତି ହାନ୍ଦି ପାତେକା ଏ଼ନିକିଁ ନା଼ ଗେଲ୍ପିନାତି ଲେହେଁ ଆ଼ଦି,
ଏ଼ଦାଆଁତାକି ନା଼ନୁ ନିଙ୍ଗେ ଏଟ୍କା ଦେ଼ସାତି ଲ଼କୁ ତା଼ଣା ଉଜେଡ଼ି ଲେହେଁ କିୟାଇଁ।"
7 ଆମ୍ବାଆରାଇଁ ମାଣ୍ସି ମା଼ନି କିଅସି, ଆମ୍ବାଆରାଇଁ ଦେ଼ସାତି ଲ଼କୁ ଅ଼ପଅରି,
ଆମ୍ବାଆସି ସା଼ଲୱି କିନାରି ହ଼ଲେଏସି, ଏ଼ୱାଣାଇଁ ଇସ୍ରାୟେଲତି ଗେଲ୍ପିନାସି, ଅ଼ଡ଼େ ଦାର୍ମୁଗାଟି ପ୍ରବୁ ଈ କାତା ଏଲେଇଞ୍ଜି ମାନେସି,
"ସାତା ଅ଼ଡ଼େ ଇସ୍ରାୟେଲତି ଦାର୍ମୁ ଲେହେଁତି ପ୍ରବୁ ନିଙ୍ଗେ ଆ଼ଚାମାଞ୍ଜାନେସି,
ଏ଼ୱାଣି ତାକି ରାଜାୟାଁ ନିଙ୍ଗେ ମେସ୍ତାସାରେ ନିନେରି;
ସା଼ଲୱି କିନାରି ନିଙ୍ଗେ ଜହରା କିୟାନେରି।"
ଜିରୁସାଲମତି ୱେଣ୍ତେ ତୀରି କିନାୟି
8 ପ୍ରବୁ ଈ କାତା ଏଲେଇଞ୍ଜି ମାନେସି, "ନା଼ ରା଼ହାଁତି ବେ଼ଲାତା ନା଼ନୁ ନୀ କାତା ୱେଞ୍ଜାମାଇଁ,
ଅ଼ଡ଼େ ଗେଲ୍ପିନି ଦିନାତା ନୀ ସା଼ୟେମି କିହାମାଞ୍ଜାଇଁ;
ଇଞ୍ଜାଁ, ନା଼ନୁ ନିଙ୍ଗେ ଗେଲ୍ପାଇଁ ଅ଼ଡ଼େ ଦେ଼ସାତି ନେହିଁ ତୀରି କିହାଲି
ଲ଼କୁଣି ତାମି ନା଼ସା ଆ଼ହାମାନି ଅଦିକାରା କିହାଲି ତାକି
ନା଼ନୁ ନିଙ୍ଗେ ଲ଼କୁତି ମେ଼ରା ସମାନା ହେର୍ପାଇଁ;
9 କା଼ୟିଦିଗାଟାରାଇଁ ହ଼ଚା ହାଜୁ ଇଞ୍ଜିଁ, ଆମ୍ବାଆରି ଆନ୍ଦେରିତା ମାନେରି
ଏ଼ୱାରାଇଁ ‘ଜାହାରାଇଁ ତ଼ସା କଡାଦୁ ଇଞ୍ଜିଁ ଏଲେଇନାମୁ।’
ଏ଼ୱାରି ଜିରୁ ଦାରିତା ମେୟିଁନେରି ଅ଼ଡ଼େ ମା଼ର୍ନୁ ହିଲାଆ ପାଡାଆ଼ତି ଟା଼ୟୁ ଏ଼ୱାରି ମେୟିଁନି ଟା଼ୟୁ ଆ଼ନେ।
10 ଏ଼ୱାରି ହାକି କି ଏ଼ସ୍କି ଆ଼ଅରି; କାରା କି ୱେ଼ଡ଼ାତି ତା଼ତି ଏ଼ୱାରାଇଁ ଆ଼ଡେଏ;
ଇଚିହିଁ ଆମ୍ବାଆସି ଏ଼ୱାରାଇଁ କାର୍ମା ଆ଼ନେସି,
ଏ଼ୱାସି ଏ଼ୱାରାଇଁ ତା଼କି କିନେସି,
ଏ଼ୟୁତି ଜାର୍ଣା ଦାରିଟି ଏ଼ୱାସି ଏ଼ୱାରାଇଁ ତା଼କି କିହା ଅ଼ନେସି।
11 ଇଞ୍ଜାଁ ନା଼ନୁ ନା଼ ବାରେ ହ଼ର୍କାଣି ର଼ ଜିରୁ କିଇଁ
ଅ଼ଡ଼େ ନା଼ କାଜା ପା଼ହେରି ପାଡି କିୱିଆ଼ନେ।
12 ମେହ୍ଦୁ ଈୱାରି ହେକଟି ୱା଼ନେରି; ଅ଼ଡ଼େ ମେହ୍ଦୁ ଈୱାରି ଟେ଼ବ୍ରି ଅ଼ଡ଼େ ୱେ଼ଡ଼ା ହାଲ୍ୱୁ ୱାକିଟି ୱା଼ନେରି;
ଇଞ୍ଜାଁ ଈୱାରି ସିନିମ୍ ଦେ଼ସାଟି ୱା଼ନେରି।
13 ଏ଼ ହା଼ଗୁପା଼କା ପା଼ଚାଦୁ; ଏ଼ ଦାର୍ତି ରା଼ହାଁ କିମୁ;
ଏ଼ ହ଼ର୍କା କାଜା ଗିୟାଁ ତଲେ ପା଼ଚାଦୁ;
ଇଚିହିଁ ପ୍ରବୁ ତାନି ଲ଼କୁଣି ହିତ୍ଡ଼ି ହୀହାମାନେସି
ଅ଼ଡ଼େ ତାନି କସ୍ତଗାଟି ଲ଼କୁଣି କାର୍ମା ମେହ୍ନେସି।
14 ସାମା ସିୟନ ଏଲେଇଚେ, ପ୍ରବୁ ନାଙ୍ଗେ ପିସାମାଞ୍ଜାନେସି,
ପ୍ରବୁ ନାଙ୍ଗେ ବା଼ଣା ଆ଼ହାମାଞ୍ଜାନେସି।"
15 "ଇୟା ଜାହାରା ଜାର୍ନି କିତି ମୀର୍ଏଣାଇଁ ଜୀୱୁ ନ଼ଆନା
କି ଜାହାରା ପା଼ଲୁ ଊଟ୍ହି ଡା଼ଲୁଇଁ ବା଼ଣା ଆୟାଲି ଆ଼ଡିନେ ?
ହାଅ, ଈୱାରି ବା଼ଣା ଆୟାଲି ଆ଼ଡିନେରି,
ଆ଼ତିଜିକେଏ ନା଼ନୁ ମିଙ୍ଗେ ବା଼ଣା ଆୟଅଁ।
16 ମେହ୍ଦୁ, ନା଼ନୁ ଜାହାରା ରୀ କେୟୁତି ପାସିତା ମୀ ଦ଼ରୁ ରା଼ଚାମାଇଁ;
ମୀ ଗା଼ଡ଼ାତି କ଼ଟା କା଼ଲେଏ ନା଼ ନ଼କିତା ମାନେ।
17 ନୀ ମୀର୍କା ତବେ ୱା଼ହିମାନେରି, ନିଙ୍ଗେ କୁଟୁକାଟା କିୟାନାରି
ଅ଼ଡ଼େ ଆମ୍ବାଆରି ନିଙ୍ଗେ ନା଼ସା କିୟାନାରି, ଏ଼ୱାରି ନୀ ତା଼ଣାଟି ହ଼ଚା ହାନେରି।
18 ନୀ କାନୁ ଦେଚାହାଁ ସା଼ରିୱାକି ସିନିକିମୁ;
ଏ଼ୱାରି ବାରେ ରୁଣ୍ତା ଆ଼ହାଁ ନୀ ତା଼ଣା ୱା଼ହିମାନେରି।
ପ୍ରବୁ ଏଲେଇଞ୍ଜି ମାନେସି, ନା଼ନୁ ନୀଡାମାନି ପାତେକା ନୀନୁ ସାଜୁ ଲେହେଁ ଈ ବାରେ ତୁର୍ଦି,
ଇଞ୍ଜାଁ ବୀହା ମା଼ଙ୍ଗା ଲେହେଁ ନୀ ଆଙ୍ଗାତା ଏ଼ ବାରେ ଦସାକଡିଦି।"
19 ଇଚିହିଁ ସାତେଏ ନୀଏଁ ନୀନୁ, ନୀ ନା଼ସା ଅ଼ଡ଼େ ୱାର୍ଆୟି ମାନି ଟା଼ୟୁ ବାରେ ଅ଼ଡ଼େ ନୀ ନା଼ସା ଆ଼ହାମାନି ଦେ଼ସା,
ବାସା କିନାରାକି ଊଣା ଆ଼ନେ ଅ଼ଡ଼େ ନିଙ୍ଗେ ନା଼ସା କିୟାନାରି ହେକ ଡ଼ୟିନେରି।
20 ନୀ ତା଼ଣାଟି ଅ଼ହାମାନି ମୀର୍କା ୱେଣ୍ତେ ନୀ କିର୍ୟୁଁତା ଏଲେଇଞ୍ଜାନେରି,
ନାଙ୍ଗେ ତାକି ଈ ଟା଼ୟୁ ହା଼ରେକା ଊଣା;
ନାଙ୍ଗେ ଟା଼ୟୁ ହିୟାମୁ, ନା଼ନୁ ବାସା କିଇଁ।
21 ଏଚିବେ଼ଲା ନୀନୁ ମ଼ନ ମ଼ନତା ଏଲେଇଞ୍ଜି,
"ନା଼ ମୀର୍କା ଅ଼ୱି ଆ଼ହାମାନେରି, ନା଼ନୁ ରଅତେଏଁ,
ହ଼ଲେଣି ଆ଼ହାଁ ଇତାଲା ଆତାଲା ରେ଼ଜିମାଇଁ, ନା଼ ଈ ମୀର୍କାଣି ଆମ୍ବାଆୟି ଜାର୍ନି କିହାମାନେ ?
ଅ଼ଡ଼େ ଈୱାରାଇଁ ଆମ୍ବାଆୟି ପ଼ହି କିହାମାନେ ?
ମେହ୍ଦୁ ନା଼ନୁ ରଅତେଏଁ ମାଚେଏଁ; ଈୱାରି ଆମ୍ବିୟା ମାଚେରି ?"
22 ପ୍ରବୁ ଈ କାତା ଏଲେଇଞ୍ଜି ମାନେସି,
"ମେହ୍ଦୁ ନା଼ନୁ ଏଟ୍କା ଦେ଼ସାତି ଲ଼କୁ ତାକି ନା଼ କେୟୁ ପେର୍ଇଁ
ଅ଼ଡ଼େ ଦେ଼ସା ଦେ଼ସାତି ଲ଼କୁ ନ଼କିତା ନା଼ ଜୀଣାଆ଼ତି ସିରେଲି ଗ଼ଞ୍ଜିଇଁ;
ଏଚେଟିଏ ଏ଼ୱାରି ନୀ ମୀର୍କାଣି ନୀ କଡାୟାଁଣା ତାନେରି
ଅ଼ଡ଼େ ନୀ ମା଼ସ୍କାଣି ତାମି ବମିତା ଡେ଼କାହାଁ ନୀ ତା଼ଣା ତାନେରି।
23 ଇଞ୍ଜାଁ ରାଜାୟାଁ ନିଙ୍ଗେ ପ଼ହିକିୟାନି ତାଞ୍ଜି
ଅ଼ଡ଼େ ଏ଼ୱାରି ରା଼ଣିସିକା ନିଙ୍ଗେ ପ଼ହିକିୟାନି ତାଲି ଆ଼ନୁ;
ଏ଼ୱାରି ବୂମିତା ମୁନୁ କୁତାହାଁ ନିଙ୍ଗେ ଜହରା କିୟାନେରି ଅ଼ଡ଼େ ନୀ ପା଼ୱୁଲିତି ଦୂଡ଼ି ନା଼କିନେରି;
ଏଚେଟିଏ ନା଼ନୁ ପ୍ରବୁତେଏଁ ଅ଼ଡ଼େ ନାଙ୍ଗେ କା଼ଚାହାଁ ଡ଼ୟିନାରି ଏଚେଲା ଲାଜା ଆ଼ଅରି, ଈଦାଆଁ ନୀନୁ ପୁଞ୍ଜି।"
24 ବା଼ଡ଼୍ୟୁ ଗାଟାଣି ତା଼ଣାଟି ସ଼ରୁ କିହାମାନି ଆ଼ସ୍ତି ମୀଞ୍ଜାଲି ଆ଼ନେ ?
ଅ଼ଡ଼େ ନୀହାଁୟି ତଲେ କା଼ୟିଦିତା ମାନାରି ପିସ୍ପି କିୱିଆ଼ନେରି ?
25 ସାମା ପ୍ରବୁ ଈ କାତା ଏଲେଇଞ୍ଜି ମାନେସି,
"ବା଼ଡ଼୍ୟୁ ଗାଟାଣି ତା଼ଣାଟି ଦସ୍ପି ଆ଼ହାମାନି ଲ଼କୁ ମୀଞ୍ଜ୍ୱି ଆ଼ନେରି ଅ଼ଡ଼େ ଆଜିହ଼ପେତି ଲ଼କୁତି ସ଼ରୁ କିତି ଆ଼ସ୍ତି ପିସ୍ପି କିୱିଆ଼ନେ;
ଇଚିହିଁ ନୀ କ଼ପାଗାଟାଣି କ଼ପାଟି ତଲେ ନା଼ନୁ କ଼ପା ଆ଼ଇଁ
ଅ଼ଡ଼େ ନୀ ମୀର୍କାଣି ନା଼ନୁ ଗେଲ୍ପିଇଁ।
26 ଇଞ୍ଜାଁ ନା଼ନୁ ନୀ ଲାଗେଏ କିୟାନାରାଇଁ ତାମି ଜାହାରା ଊଙ୍ଗା ତୀହ୍ଇଁ
ଅ଼ଡ଼େ ଡ଼ାକ୍ହି ଅଙ୍ଗୁରି ରାସାତା ହ଼ଚିନି ଲେହେଁ ଏ଼ୱାରି ଜାହାରା ନେତେରି ତଲେ ହ଼ଚିନେରି;
ଏଚେଟିଏ ନା଼ନୁ ପ୍ରବୁତେଏଁ, ନିଙ୍ଗେ ଗେଲ୍ପାନାତେଏଁ ଅ଼ଡ଼େ ନିଙ୍ଗେ ପିସ୍ପି କିୟାନାତେଏଁ,
ଜାକୁବତି ବା଼ଡ଼୍ୟୁ ହୀନାତେଏଁ, ଈଦାଆଁ ବାରେ ଜୀୱୁ ଗାଟାରି ପୁନେରି।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)