1 ଏ଼ ସିୟନ, ତେଃଏଲାମୁ, ତେଃଏଲାମୁ, ନୀ ବା଼ଡ଼୍‌ୟୁ ଆହ୍‌ମୁ;

ଏ଼ ସୁଦୁ ଗା଼ଡ଼ା ଜିରୁସାଲମ, ନୀନୁ ନୀ ଅ଼ଜିତି ହିମ୍ବରିକା ହୁଚାମୁ;

ଇଚିହିଁ ନୀଏଁଟିଏ ନୀ ବିତ୍ରା ତ଼ଲୁ ଦା଼ଃଆତାସି କି ଲାଗେଏତି ଲ଼କୁ ଅ଼ଡ଼େ ୱା଼ଅସି।

2 ନୀନୁ ନୀ ଆଙ୍ଗାତି ଦୂଡ଼ି ହାଣ୍‌ମୁ; ଏ଼ ଜିରୁସାଲମ,

ନିଙ୍ଗାମୁ, ପା଼ସ୍‌ପନିତା କୁଗାମୁ;

ଆଲ, ସିୟନତି କା଼ୟିଦିତି ମା଼ଙ୍ଗା,

ନୀ ହେର୍‌କିତି ପୂସାୟାଁ ହୁକ୍‌ମୁ।

3 ଇଚିହିଁ ପ୍ରବୁ ଈ କାତା ଏଲେଇଞ୍ଜି ମାନେସି, "ମୀରୁ ଏ଼ନାଆଁ ହୀଆନା ପା଼ର୍‌ପି ଆ଼ହାମାଚେରି, ଅ଼ଡ଼େ ଏ଼ନାଆଁ ହୀଆନା ପିସ୍‌ପି କିୱିଆ଼ଦେରି।" 4 ଇଚିହିଁ ପ୍ରବୁ ଈ କାତା ଏଲେଇଞ୍ଜି ମାନେସି, "ନା଼ ଲ଼କୁ ନ଼କେଏ ବାସା କିହାଲି ତାକି ମିସରତା ହାଚେରି; ଇଞ୍ଜାଁ ଅସୁରିୟ ଉଜେ ଉଜେଏ ଏ଼ୱାରାଇଁ ଲାଗେଏ କିହି ଲେ଼ମ୍ବିତେସି।" 5 ଈଦାଆଁତାକି ପ୍ରବୁ ଏଲେଇଞ୍ଜି ମାନେସି, "ନା଼ ଲ଼କୁ ଉଜେ ଉଜେଏ ଅ଼ୱି ଆ଼ହାମାନେରି, ନା଼ନୁ ଇମ୍ବାଆଁ ମାଞ୍ଜାହାଁ ଏ଼ନାଆଁ କିହିମାଇଁ ?" ପ୍ରବୁ ଏଲେଇଞ୍ଜି ମାନେସି, "ଏ଼ୱାରାଇଁ ସା଼ଲୱି କିହିମାନାରି ଗାର୍ଜିମାନେରି ଅ଼ଡ଼େ ନା଼ ଦ଼ରୁ ୱେ଼ଡ଼ା ଡୁମ୍ବେ ନିନ୍ଦା ଆ଼ହିମାନେ। 6 ଈଦାଆଁତାକି ନା଼ ଲ଼କୁ ନା଼ ଦ଼ରୁ ପୁନେରି; ଏ଼ୱାରି ଏଚିବେ଼ଲା ପୁନେରି ଆମ୍ବାଆସି କାତା ଆ଼ହିମାନେସି ଏ଼ୱାସି ପ୍ରବୁ; ମେହ୍‌ଦୁ, ନା଼ନୁ, ଏ଼ୱାତେଏଁ।"

7 ଆମିନି ମାଣ୍‌ସି ନେହିଁ କାବ୍ରୁ ତାଚିମାନେସି, ଆମ୍ବାଆସି ହିତ୍‌ଡ଼ିତି କାତା ୱେସିମାନେସି,

ଆମ୍ବାଆସି ନେହିଁ ଆ଼ନି ନେହିଁ କାବ୍ରୁ ତାଚିମାନେସି, ଆମ୍ବାଆସି ଗେଲ୍‌ପିନାଣି ୱେ଼କ୍‌ହିମାନେସି,

ଆମ୍ବାଆସି ସିୟନତି ନୀ ମାହାପୂରୁ ସା଼ଲୱି କିନେସି ଇଞ୍ଜିଁ ୱେସିମାନେସି,

ତାନି ପା଼ୱୁଲି ହ଼ରୁ ଲାକ ଏଚେକା ଗା଼ୱୁରମି ଆ଼ନେ।

8 ୱେନାମୁ, ନୀ ସା଼ରିସୁଟୁ କା଼ଃନାରି ହା଼ଡା!

ଏ଼ୱାରି କାଜା ଗିୟାଁ ତଲେ ଏଲେଇଞ୍ଜି ମାନେରି;

ଏ଼ୱାରି ରହେଁଏ ପା଼ଚି ମାନେରି;

ଇଚିହିଁ ପ୍ରବୁ ସିୟନତା ୱେଣ୍ତା ୱା଼ନାଟି ଏ଼ୱାରି ହାରିମ଼ହାଣା ମେହ୍‌ନେରି।

9 ଏ଼ ଜିରୁସାଲମତି ଡୀହାମାନି ଟା଼ସ୍‌କା,

ରା଼ହାଁଟି ରହେଁଏ କାଜା ଗିୟାଁତଲେ ପା଼ଚାଦୁ;

ଇଚିହିଁ ପ୍ରବୁ ତାନି ଲ଼କୁଣି ହିତ୍‌ଡ଼ି ହୀହାମାନେସି,

ଏ଼ୱାସି ଜିରୁସାଲମତି ପିସ୍‌ପି କିହାମାନେସି।

10 ପ୍ରବୁ ବାରେ ଦେ଼ସାତି ଲ଼କୁ ନ଼କିତା ତାନି ସୁଦୁ ବାହାତି ବା଼ଡ଼୍‌ୟୁ ତ଼ହ୍‌ନେସି,

ଅ଼ଡ଼େ ଦାର୍‌ତିତି ହେକ ଦେ଼ସା ବାରେ ମା଼ ମାହାପୂରୁତି ଗେଲ୍‌ପିନାଣି ମେହ୍‌ନେରି।

11 ମୀରୁ ହ଼ଚା ହାଜୁ, ହ଼ଚା ହାଜୁ, ଏ଼ ଟା଼ୟୁଟି ହ଼ଚା ହାଜୁ,

ଏ଼ନି ଲାଗେଏତି ଆ଼ସ୍ତି ଡୀଗାଆଦୁ;

ମୀରୁ ତାନି ତା଼ଣାଟି ହ଼ଚା ହାଜୁ;

ଏ଼ ପ୍ରବୁତି ଆ଼ସ୍ତି ଡେ଼କିନାତେରି ମୀରୁ ସୁଦୁ ଆ଼ଦୁ।

12 ଇଚିହିଁ ମୀରୁ ଦାଗାମାରା ଆ଼ହି ହ଼ଚା ହାଲଅତେରି କି ମୀରୁ ହଟି ହଟିହିଁ ହ଼ଚା ହାଲଅତେରି;

ଇଚିହିଁ ପ୍ରବୁ ମୀ ନ଼କି ନ଼କିତା ହାନେସି ଅ଼ଡ଼େ ଇସ୍ରାୟେଲତି ମାହାପୂରୁ ମୀ ଜେ଼ଚ ଆ଼ନେସି।

13 ମେହ୍‌ଦୁ, ନା଼ ହ଼ଲେଏତି ନେହିଁ ଅଣ୍‌ପୁ ତଲେ କାମା କିନେସି,

ଏ଼ୱାସି କାଜାସି, କାଜା ପା଼ଣା ବେଟାଆ଼ହାଁ ଗା଼ୱୁରମି ଆ଼ନେସି।

14 ମାଣ୍‌ସି କିହାଁ ତାନି ୱା଼ଣା ଅ଼ଡ଼େ ମାଣ୍‌ସି ମୀର୍‌କା କିହାଁ ତାନି ୱା଼ଣା ହା଼ରେକା ଏଟ୍‌କା ଆ଼ତାକି

ଏ଼ନିକିଁ ହା଼ରେକା ଏ଼ୱାଣି କାତା ତାକି ଆଡାଜାକା ଆ଼ହାମାଚେରି।

15 ଏଲେକିହିଁ ଏ଼ୱାସି ହା଼ରେକା ଦେ଼ସାତି ଲ଼କୁଣି ସୁଦୁ କିନେସି;

ରାଜାୟାଁ ଏ଼ୱାଣି ନ଼କିତା ଜାହା ଜାହାରା ଗୂତି ସାପି କିନେରି;

ଇଚିହିଁ ଏ଼ନାଆଁ ଏ଼ୱାରାଇଁ ୱେସ୍‌ପି ଆ଼ହା ହିଲାଆତେ,

ଏ଼ଦାଆଁ ଏ଼ୱାରି ମେହ୍‌ନେରି ଅ଼ଡ଼େ ଏ଼ନାଆଁ ଏ଼ୱାରି ୱେଞ୍ଜା ହିଲାଆତେରି,

ଏ଼ଦାଆଁ ଏ଼ୱାରି ତେଲ୍‌ହିନେରି।