1 ଗିୟାଁ ଏ଼କ୍‌ହାଁ ୱେ଼କ୍‌ଦୁ, ଗିୟାଁ ଊଣା କିଆଦୁ, ତୀତ୍ରି ଲେହେଁ ଜାହାରା ଗିୟାଁ ଏ଼କ୍‌ଦୁ, ମା଼ ଲ଼କୁଣି ତାମି ଲାଗେଏତି କାମା ଅ଼ଡ଼େ ଜାକୁବ କୂଲୁତି ତାମି ପା଼ପୁ ବାରେ ପୁଣ୍‌ମ୍ବି କିଦୁ। 2 ଆ଼ତିଜିକେଏ ଏ଼ୱାରି ବାରେ ଦିନା ନାଙ୍ଗେ ପାରାନେରି ଅ଼ଡ଼େ ନା଼ ଜିରୁତି କାତା ପୁଞ୍ଜାଲି ରା଼ହାଁ ଆ଼ନେରି; ଏମିନି କୂଡ଼ାତି ଲ଼କୁ ଦାର୍ମୁକାମା କିନେରି ଅ଼ଡ଼େ ଜାହାରା ମାହାପୂରୁତି ମେ଼ରା ପିସାହିଲଅରି, ଏ଼ୱାରି ଲେହେଁ ଏ଼ୱାରି ଦାର୍ମୁ ମେ଼ରାତି କାତା ନାଙ୍ଗେ ୱେଞ୍ଜାନେରି ଅ଼ଡ଼େ ମାହାପୂରୁ ତା଼ଣା ୱା଼ହାଲି ରା଼ହାଁ ଆ଼ନେରି।

3 ଏ଼ୱାରି ଏଲେଇନେରି, "ମା଼ମ୍ବୁ ଏ଼ନାଆଁତାକି ଉପାସା କିହିମାନମି ଅ଼ଡ଼େ ନୀନୁ ସିନିକିହି ହିଲଅତି ?" ମା଼ମ୍ବୁ ଏ଼ନାଆଁତାକି ଜାହା ଜାହାରା ଜୀୱୁତି କସ୍ତ ହୀହିମାନମି ଅ଼ଡ଼େ ନୀନୁ ମ଼ନ ହୀହି ହିଲଅତି ? ମେହ୍‌ଦୁ, ମୀରୁ ଉପାସା ଦିନା ଜାହାରା ସୁକୁ ଅଣ୍‌ପିମାଞ୍ଜେରି ଅ଼ଡ଼େ ବା଼ଡ଼୍‌ୟୁ ତଲେ ବାରେ କାମା କିହିମାଞ୍ଜେରି। 4 ମେହ୍‌ଦୁ, ମୀରୁ ବା଼ଦ୍ରି ଅ଼ଡ଼େ ଗଡ଼୍‌ହା ତାକି, ଅ଼ଡ଼େ ଲାଗେଏତି ଗୁମ୍‌ସା ତଲେ ୱେ଼ଚାଲି ତାକି ଉପାସା କିହିମାଞ୍ଜେରି; ମୀ ହା଼ଡା ଲାକପୂରୁ ଏ଼ନିକିଁ ୱେଣ୍‌ମ୍ବିଆ଼ନେ, ଇଲେତି ଉପାସା ନୀଞ୍ଜୁ ମୀରୁ କିହି ହିଲଅତେରି। 5 ଇଲେତି ଉପାସା, ମାଣ୍‌ସି ଜାହାରା ଜୀୱୁତି କସ୍ତ ହୀହାଲି ତାକି ଇଲେତି ଦିନା, ନା଼ନୁ ଏ଼ନାଆଁ ଆ଼ଚାମାଇଁ ? ର଼ ନା଼ଡା ଲେହେଁ ତା଼ର୍ୟୁଁ ଲେ଼ହ୍‌ନାୟି, ଇଞ୍ଜାଁ ଗ଼ଣି ବାସ୍ତା ଅ଼ଡ଼େ ଦାର୍‌ମ୍ବୁ ଜାହାରା ଡ଼଼ଇ ପା଼ହ୍‌ନାୟି, ଈଦାନି ମୀରୁ ଉପାସା ଅ଼ଡ଼େ ପ୍ରବୁତି ତାକି ଅ଼ପିନି ଦିନା ଇଞ୍ଜିଁ ଏଲେଇଞ୍ଜେରି ?

6 ଏମିନି ଉପାସା ନା଼ନୁ ରା଼ହାଁ ଆ଼ଇଁ, ଏ଼ଦି କି ଈଦି ଆ଼ଏ ? ଉଜେ ଉଜେଏ ଆ଼ହାମାନି ହ଼ଲେଏସି, ଅ଼ଡ଼େ ବ଼ଜୁଗାଟି ଲ଼କୁଣି ଜୁୱେଡ଼ି ହୁକ୍‌ହାଁ ପିସ୍‌ପି କିନାୟି, ଇଞ୍ଜାଁ, ବାରେ ଜୁୱେଡ଼ିତି କୁଟୁକାଟା କିନାୟି। 7 ହାକି ଲ଼କୁକି ମୀ କା଼ଦି ବା଼ଟି କିନାୟି, ଅ଼ଡ଼େ ପେ଼ର୍‌ହାମାନି ଦୁକୁ ଲ଼କୁଣି ଜାହାରା ଇଲୁତା ତାନାୟି, ମୀରୁ ନା଼ଗ୍‌ଡ଼ା ଲ଼କୁଣି ମେସ୍ତିସାରେ, ଏ଼ୱାଣାକି ବାସ୍ତେରି ତୁର୍‌ୱି କିନାୟି ଅ଼ଡ଼େ ମୀ ଜାହାରା କୂଲୁତି ଲ଼କୁ ତା଼ଣାଟି ଜାହାରାତି ଡ଼ୁକ୍‌ନାୟି ଆ଼ଏ, ଇଲେତି ଉପାସା ନା଼ନୁ କି ଆ଼ଚା ହିଲଅଁ ?

8 ଈଦାଆଁ କିତିହିଁ, ଲା଼ଇତି ଲେହେଁ ମୀ ଉଜେଡ଼ି ତ଼ଞ୍ଜା ଆ଼ନେ ଅ଼ଡ଼େ ମୀ ନେହିଁ ଆ଼ନାୟି ତବେ ଆ଼ନେ; ଇଞ୍ଜାଁ, ମୀ ଦାର୍ମୁ ମୀ ନ଼କିତା ଆ଼ନେ; ପ୍ରବୁତି ଉଜେଡ଼ି ମିଙ୍ଗେ ଜେ଼ଚ ଗେଲ୍‌ପାନେ। 9 ଏଚିବେ଼ଲା ମୀରୁ ହା଼ଟିଦେରି ଅ଼ଡ଼େ ପ୍ରବୁ ମିଙ୍ଗେ ଏଲେଇଞ୍ଜାନେସି; ମୀରୁ ହା଼ଟିହିଁ ଡ଼ୀଦେରି, ଅ଼ଡ଼େ ଏ଼ୱାସି ଏଲେଇଞ୍ଜାନେସି, "ନା଼ନୁ ମାଇଁ।" ମୀରୁ ମୀ ବିତ୍ରାଟି ଲାଗେଏ କାମା କିହାଲି, ୱାଞ୍ଜୁ ହୂଟାଲି ଅ଼ଡ଼େ ଲାଗେଏତି କାତା ଜ଼ଲାଲି ପିହ୍‌ଦେରି; 10 ଇଞ୍ଜାଁ, ହାକିଗାଟାଣି ତାକି ମୀ ଜୀୱୁ ଜୂପ୍‌କା ଆ଼ନେ ଅ଼ଡ଼େ ଦୁକୁଗାଟାଣି ଜୀୱୁତି ପାଞ୍ଜିକିଦି, ଆତିହିଁ ଆନ୍ଦେରିତା ମୀ ଉଜେଡ଼ି ତ଼ଞ୍ଜାଆ଼ନେ ଅ଼ଡ଼େ ମୀ ଆନ୍ଦେରି ମାଦେନା ସମାନା ଆ଼ନେ; 11 ଅ଼ଡ଼େ, ପ୍ରବୁ କା଼ଲେଏ ମୀ ଜିରୁତା ସା଼ଲୱି କିୟାନେସି ଅ଼ଡ଼େ ବାଃଲି ବାଟାତା ମୀ ଜୀୱୁ ପାଞ୍ଜି କିୟାନେସି ଅ଼ଡ଼େ ମୀ ଡୁମ୍‌କା ପେ଼ଡ଼୍‌କା ବାରେ ବା଼ଡ଼୍‌ୟୁ କିୟାନେସି; ଏଚେଟିଏ ମୀରୁ ଏ଼ୟୁ ଡ଼ାଞ୍ଜିତି ବା଼ଡ଼ା ଲେହେଁ ଅ଼ଡ଼େ ଏ଼ୟୁ ଊଣା ଆ଼ଆ ଜାର୍‌ଣା ଲେହେଁ ଆ଼ଦେରି। 12 ଇଞ୍ଜାଁ, ନୀ କୂଲୁତି ଲ଼କୁ ପ୍ଣାଃଇ ନା଼ସାଆ଼ତି ଟା଼ୟୁ ବାରେ ୱେଣ୍ତେ କେ଼ପିନେରି; ମୀରୁ ପୁର୍ବେ କା଼ଲାତି ହା଼ରେକା ପୁନାଦି ଲାକ କେ଼ପିଦେରି, ଇଞ୍ଜାଁ, "ଡୀତି କାତି କେ଼ପିନାରି ଅ଼ଡ଼େ ବାସା ତାକି ୱେଣ୍ତେ ଜିରୁ କେ଼ପିନାରି ଇଞ୍ଜିଁ ୱେ଼ଙ୍ଗିଦେରି।"

13 "ମୀରୁ ଜ଼ମିନି ଦିନାତି ଊରିନି ତା଼ଣାଟି, ନା଼ ସୁଦୁ ଦିନାତା ଜାହାରା ଜୂପ୍‌କା ଅଣ୍‌ପୁଟି ଜାହାରାଇଁ ୱେଟ୍‌ହା କଡାଦୁ; ଇଞ୍ଜାଁ, ଜ଼ମିନି ଦିନାତି ରା଼ହାଁତି ଦିନା ଅ଼ଡ଼େ ପ୍ରବୁତି ସୁଦୁ କିହାମାନି ଦିନା ଇଞ୍ଜିଁ ଅଣ୍‌ପାହାଁ ମା଼ନୱି ଆ଼ଦେରି; ଅ଼ଡ଼େ ଜାହାରା କାମା କିଆନା କି ଜାହାରା ଜୂପ୍‌କାତି ଅଣ୍‌ପାଆନା କି ଜାହାରା କାତା ୱେହ୍‌ଆନା ମା଼ନି କିଦେରି; 14 ଆତିହିଁ ମୀରୁ ପ୍ରବୁ ତା଼ଣା ରା଼ହାଁ କିଦେରି; ଇଞ୍ଜାଁ, ନା଼ନୁ ମିଙ୍ଗେ ଦାର୍‌ତିତି ପାଡାଆ଼ତି ଟା଼ୟୁତା ଅୟାଇଁ; ଅ଼ଡ଼େ, ମୀ ତାଞ୍ଜି ଜାକୁବତି ଅଦିକାରା ମିଙ୍ଗେ ତିଞ୍ଜାଲି ହିୟାଇଁ, ଇଚିହିଁ ପ୍ରବୁତି ଗୂତି ଈ କାତା ଜ଼ଲାମାନେ।"